بين إنقاذ الموقف والخوف من الأذى.. نعمل إيه في الحوادث والحالات الطارئة؟
مؤخرًا بقينا نشوف على السوشيال ميديا حوادث متصورة سواء خناقات..أو تعدي على المارة.. تنمر.. تحرش أو حتى حوادث عربيات.. وبنلاحظ أوقات كتير إن ماحدش بيساعد وبيكتفي بالتصوير.. حتى لو كان الموقف محتاج مساعدة فورية بدل التصوير.. السلوك ده ممكن يبان غريب أو قاسي لكنه مرتبط بحاجات نفسية واجتماعية كتير.. تعالوا نعرف إيه هي؟ والمفروض نعمل إيه في المواقف دي؟
حسب موقع medium و psychology today فالتصرف ده بيفسره الآتي:
1- نظرية تأثير المتفرج (Bystander Effect):
ودي معناها إن كل ما زادت الناس حوالين موقف طارئ قل شعور الأشخاص بالمسؤولية تجاه الموقف.. وكل واحد بيتوقع إن حد تاني هيتصرف.. وده اللي بيخلي البعض يكتفي بالفرجة أو التصوير بدل ما يدخل يساعد.
2- التصوير كطريقة للتعامل مع الموقف:
لما الواحد يلاقي نفسه مش عارف يتصرف أو خايف يساعد ممكن يمسك الموبايل ويبدأ يصور ده بيديه إحساس إنه بيعمل حاجة حتى لو مش بيساعد بشكل مباشر.
3- تأثير وسائل التواصل الاجتماعي:
بالنسبة للمراهقين الموضوع عادة بيكون إنهم مش عارفين التصرف الصح اللي لازم يعملوه.. لأن عقولهم لسه بتتطور زي التحكم في الدوافع والنضج الأخلاقي وساعات هم ما بيصدقوش أصلاً إن اللي بيحصل ده حقيقي.
وإنهم ممكن يوصلوا لأنهم مش فارق معاهم بسبب تعرضهم لمشاهد عنف وحوادث وحاجات بشعة على السوشيال ميديا وفي الأخبار.
4- الصدمة والخوف:
من الطبيعي جدًا إن الناس تتصدم أو تتجمد لما يشوفوا حد في حالة طارئة أو بيتعرض لهجوم.. ده غالبًا رد فعل للخوف.. خوف إنك تكون مش قادر تساعد لأنك ضعيف جدًا.. أو إنك تفسر الموقف غلط وتشوف تهديد وهو مش موجود أصلاً.. خوف إن تدخلك يعرض حياتك للخطر.. أو الخوف من الانتقام.
طب نعمل إيه لو شوفنا قدامنا حادثة أو عنف أو حالة طوارئ؟
1- تقييم الوضع بسرعة
شوف هل الموقف خطر على حياتك لو تدخلت؟
ولا تقدر تنقذ الموضوع؟
2- اتصرف لو تقدر بأمان
لو الموضوع بسيط زي خناقة كلامية أو حادثة بس وأنت شايف نفسك قادر.. ساعد بشكل مباشر مثلًا لو حد وقع أو محتاج مساعدة بسيطة.. حاول تقدّم له المساعدة.
ولو هتفصل بين شخصين في خناقة خليك هادي وما تبقاش مستفز أو منحاز لأي طرف.. ولو مش عارف تعمل إيه حاول تطلب من الناس حواليك المساعدة.. ساعات صوتك بس يحفز حد عنده خبرة إنه يتدخل.
3- طلب المساعدة الفورية
لو شوفت خناقة أو تعدي فيه عنف شديد أو أسلحة.. كده الوضع خطير جدًا متدخلش بنفسك وابعد عن الخطر سلامتك الشخصية هي الأولوية.. اطلب مساعدة الإسعاف أو الشرطة وبلغهم بكل التفاصيل.. المكان.. عدد الأشخاص المصابين.. ونوع المشكلة.. ولو انت طالب بلغ المشرفين والأمن في المدرسة أو الجامعة.
4- استخدام التصوير بطريقة مسؤولة
لو مش قادر تساعد فعليًا والموقف خطر جدًا ممكن تصور علشان توثق اللي بيحصل وتوصل الفيديو للمسؤولين.. ده غير إن فيه دراسة في 2013 أثبتت إن وجود الكاميرات ممكن يشجع الناس إنها تتصرف بشكل إيجابي وتدخل لأنهم بيحسوا إن فيه عين عليهم.. وبيكونوا أكتر شجاعة في المساعدة..
بس أهم حاجة ما تصورش علشان تتفرج بعدين أو تحط الفيديو على السوشيال ميديا للجدل والريتش.
ورغم الخطر.. في النهاية لازم نفتكر إن كلنا عندنا دور مجتمعي تجاه بعض
المساعدة ممكن تكون بشكل بسيط مش شرط بشكل مباشر.. بس مساعدتك ممكن تنقذ شخص أو تحميه من أذى نفسي وجسدي ممكن يتعرضله.
قولنا.. انت لو اتحطيت في مواقف زي دي هتتعامل إزاي؟
