امتى تعاتب شخص وامتى تعمل بمدرسة “عتاب الندل اجتنابه”؟

العتاب سلاح ذو حدين.. أغلبنا أو كلنا تقريبًا بيدخل علاقة سواء حب أو صداقة أو حتى زمالة وزي كل حاجة بيكون ليها نهاية وهنا بنروح لنقطة العتاب الأخير وبيكون السؤال هل نعاتب ولازم العلاقة تنتهي بعتاب ولا نطنش ونقفل الموضوع وخلاص؟

الأول إيه هي أهمية العتاب؟

حسب TheGuardian العتاب بيكون صحي عشان:-

1- بتحافظ على الناحية النفسية:

أيًا كان نوع العلاقة فلما تيجي تنتهي بيكون عندك مشاعر متراكمة أو تساؤلات كتير محتاجة إجابة.. وهنا العتاب هيسهل حاجات كتير وهتفرغ كل الطاقة أو المشاعر اللي عندك وكمان هتلاقي إجابات لأغلب الأسئلة اللي في دماغك عشان لو اتسابت كده هتسوحك فترة طويلة وممكن تفضل مكملة معاك

2- تفهم الغلطات وتتعلم منها:

أحيانا العتاب بيديك فرصة تعرف اللي حصل وتفهمه وإيه الأسباب اللي وصلته لكده.. كلنا بشر وحتى لو الشخص اللي قدامك هو اللي قفل الموضوع أو كان السبب فأكيد أنت كمان عندك أخطاء محتاج تعرفها وده هيساعدك تتجنبها وتتعلم منها في العلاقات المستقبلية

3- تجنب الندم:

العتاب هيخليك تقول كل اللي عندك وماتسيبش مجال للندم أو لـ “ياريتني”.. ومش هتقعد تفكر كتير ده أنا كان زماني قولت كذا أو محتاج أقول كذا.. هتخلص من الحتة دي نهائي

طب امتى العتاب مالوش لازمة؟

وحسب موقع Medium العتاب بيكون مضر لما:-

1- يكون اللي قدامك مش مهتم:

طبعًا أنت مع الشخص ده من زمان فأكيد جربت العتاب في مواقف صغيرة أو بسيطة في العلاقة وعارف رد فعله بيكون عامل إزاي.. فلو الشخص ده في أي نوع من العتاب سواء كان صغير أو كبير في نهاية العلاقة أنت عارف إنه ما بيهتمش أو مابيقدرش العتاب فهنا العتاب غالبًا هيكون بيعملك مشاكل أكتر ودي الحالة اللي بنقول فيها “عتاب الندل اجتنابه”

2- العلاقة يبقى اتحرق فيها زيادة عن اللزوم:

قبل نهاية أي علاقة بيكون فيه محاولات كتير وكمان احتمالات كتير إنها كانت تنتهي في مرحلة معينة.. فلو في مرحلة العتاب الأخير لقيت إنك حرقت كتير أوي في العتاب أو حتى أنتوا الاتنين بشكل مشترك حرقتوا كتير في العتاب وطلع مش جايب فايدة فلازم تقتنعوا إن العلاقة وصلت حيطة سد والنقاش اللي هيدور هيفضل يدور بنفس الشكل ودوامة مش هتخلص 

3- العتاب يعطل مرحلة التعافي:

وهدف العتاب ساعات بيكون تصليح العلاقة مرة تانية وإنها تكون أحسن.. أو إنهاء علاقة تمامًا فهنا لازم يكون فيه سؤال.. هل العتاب ده في مصلحة إننا نتعافى ونعدي العلاقة دي ولا هيعطلها ويزود المشاكل أكتر بينك وبين الشخص فالموضوع هيبقى صعب يتلم كل ما يزيد مشكل؟ ولو هيعمل كده يبقى مالوش لازمة العتاب 

في النهاية في مدرستين للعتاب.. واحدة منهم بتشوف العتاب ضرورة وحاجة مهمة وجزء أساسي من نهاية أي علاقة أو حتى حل لاستمرارها وماينفعش يسيب حاجة إلا لما تكون واضحة بالنسباله.. والتانية بتشوف العتاب حاجة مالهاش لازمة وإن فيه ناس أصلا ماتستحقش العتاب ولا يستحقوا أي مجهود إضافي منهم

قولنا أنت من أنهي مدرسة.. العتاب مهم ولا مالوش لازمة؟