6 نصائح تساعدك تتعامل مع الصيام في ال

بعد ما هيئة الأرصاد أعلنت عن استمرار الارتفاع في درجات الحرارة.. اللي هتوصل في بعض المناطق لـ 36 درجة بدأنا نفكر ايه الحاجات اللي ممكن نعملها عشان نسهل على نفسنا الصيام.. بس في ناس ممكن يكون الصيام في الحر مشكلة بتهدد صحتهم..

على حسب كلام منظمة الصحة العالمية.. ارتفاع درجات الحرارة بيعرض الجسم لخطر الجفاف وده نتيجة فقدان السوائل اللي في الجسم عن طريق العرق.. وده ممكن يكون مشكلة لناس كتير خاصة اللي بيعانوا من أمراض مزمنة زي الضغط والسكر وأمراض القلب والكلى..

طيب نعمل إيه علشان نخفف على نفسنا أو على حد نعرفه مريض بمرض مزمن صعوبة الصيام في الحر؟

1- ماتنساش تشرب مياه.. شرب المياه بكميات كافية بين الفطار والسحور هيساعدك تقلل الجفاف اللي بيتعرضله جسمك طول اليوم.

2- ظبط أكلك.. خلي الفطار والسحور فيهم خضروات وفواكه والياف كتير عشان دول بيحتفظوا بالمياه لوقت طويل.. وحاول تقلل من المقليات لأنها هتخليك تعطش أكتر .

3- حاول تقلل العصاير والسكريات لانهم بيزودوا الاحساس بالعطش.
4- خفف من الكافيين.. مشاريب زي الشاي والقهوة بيخلوا الجسم يفقد المياه بسرعة.. حاول تبدلهم بشرب الأعشاب زي الينسون أو النعناع والكركديه.
5- خلي لبسك مرحرح.. وطبعًا حاول تخلي لبسك قطن قدر الإمكان.. علشان تمتص العرق وكمان تهوي على جسمك.
6- حاول تقعد في حتة طراوة.. على قد ما تقدر قلل تعرضك للشمس وللأماكن الحر والزحمة.. ولو مضطر تنزل مشوار حاول توصل للتكييف بسرعة.

وحابين نفكرك لو انت مريض مرض مزمن إن قرار الصيام لازم تاخده من الدكتور اللي متابع حالتك هو اكتر واحد هيقدر يفيدك عشان تقدر تصوم وانت متطمن.