الانفصال بين “الواقع وخطط المستقبل” العالم بينهار ولا تخطط لـ 2050 عادي؟
خلال الكام سنة اللي فاتوا حصل كوارث وأحداث كبير بس كانت بتحصل بشكل منفصل وتاخد وقتها وتعدي.. لكن الفترة دي فيه حاجات كتير بتحصل في نفس الوقت من حروب لزلازل لمشاكل اقتصادية وغيرهم بس بتلاقي ناس بتخطط للمستقبل سواء القريب أو البعيد.. طب يا ترى نقف عند الواقع ولا نخطط للمستقبل؟
حسب VeryWellMind و WashingtonPost و PracticalJournal و Scribbr
1- ليه في ناس بتميل للسلبيات أكتر من نظرة الأمل؟
فيه حاجة اسمها “التحيز السلبي – Negativity Bias” وده بيخليك تميل أكتر للأخبار السلبية وتتأثر بيها.. اللي هو آه العالم هينتهي ومستحيل الخطط اللي بتتحط دي تكمل للأسبوع الجاي مش 5 سنين جايين
2- سبب الانفصال عن الواقع والتخطيط للمستقبل
دلوقتي انت شايف حروب وكوارث وكوكب بينتهي وتلاقي ناس بتخطط للمستقبل كأن شيئًا لم يكن.. وده عشان حاجة اسمها “التنافر المعرفي – Cognitive Dissonance”.. انت أو المؤسسات بتشوفوا الدنيا مولعة فبتقعوا بين اختيارين وهما:
- تتصرفوا بإحباط وإن خلاص الدنيا هتقف كمان كام يوم وماتعملوش حساب لباقي الأسبوع حتى
- تتمسكوا بالأمل رغم الظروف المحيطة وده لأن رؤية الجانب الإيجابي في المستقبل بتزقك في الحياة عامة وتساعدك تعدي حاجات وأوقات صعبة كتير
3- طب هل التخطيط للمستقبل ده إنكار للواقع؟
الحاجة التالتة عندنا اسمها نظرية “التناقض الإداري – Paradox Theory” ودي نظرية بيتم استخدامها أكتر في الإدارة.. النقطة اللي قبل دي كنت بتختار حاجة من اتنين يا إما تكون نظرتك سلبية يا إما تكون إيجابية.. هنا بقى انت بتتقبل الأمر الواقع وانت عارف إن فيه مصيبة كبيرة أو سلبيات كتير قدامك بس لازم تكمل أو لازم تخطط لقدام
بعد تقبلك للحاجات السلبية اللي بتحصل دي خلال طريقك لتحقيق أو تنفيذ الخطط بتلاقي نفسك بتلاقي علاج ليها وبتوصل لحل وهنا ده بيحصل في الحاجات اللي بنتحكم فيها.. يا إما الحاجات دي بتكون عالمية وفي الغالب بتاخد وقتها وتتحل وأكيد مش لوحدها
4- طب ده إيجابي ولا سلبي؟
لو قرأت كل حاجة من اللي فوق هتلاقي ليها ناحية إيجابية وناحية سلبية.. إيجابية عشان بتدي أمل وزقة كده لإنك تكمل وتستمر.. وسلبية لو انت منفصل عن الواقع وبتتجاهل الحقيقة اللي بتحصل دلوقتي وبعدها تلبس في حيط لأنك مش عامل توازن
5- الحل
- مبدئيا مهم مواجهة الواقع والاعتراف بالمخاطر اللي حاصلة بدون ما نقفل على نفسنا ونفضل قاعدين نتفرج طول ما في إيدينا نعمل حاجة
- ثانيا خطط للمستقبل عادي بس بهدوء وبالعقل يعني ماتسرحش بخيالك.. وده لأن التخطيط مهم وبيديك إحساس بإنك مسيطر على الأوضاع واللي جاي بشكل ما
- استخدم حاجات نفسية تقلل من التحيز “سواء السلبي أو الإيجابي” يعني جزّء الأهداف كذا جزء وخطط حسب تجارب حقيقية” عشان ماتبقاش بتحط خطة وهمية مش مبنية على أساس لـ 2050 وانت مش عارف هتكمل لآخر 2025 إزاي أساسًا
- الماضي مهم جدًا.. زي ما بقولك كده استخدم ذاكرتك وارجع لورا شوية هتلاقي إن كان فيه نفس الحاجات دي زمان أو كوراث شبهها وعدينا بيها فشوفها معيار للي بيحصل دلوقتي وده هيخفف من حدة اللي بيحصل
إحنا آه عايشين في عالم مجنون تلاقي كوارث وبلاوي والناحية التانية خطط لـ 2030 و 2050 بس ده العادي.. دي طريقة الإنسان عشان ينجو ويعيش ويمكن ده السر “اختيار الأمل على الخوف”.. المهم تعيش وتتعايش مع الاتنين وتستغلهم يدوك دفعة تكمل لحد الآخر ولما الآخر ييجي نبقى نشوف وقتها
