اعرف السبب ورا إنك تقوم من النوم جسمك واجعك وتعبان!

النوم شئ مهم جدًا بالنسبة لنا.. ومسكن لكل الارهاق اللي بنتعرض له طول اليوم.. وأثناء النوم الجسم بيكون ثابت لفترات طويلة على وضعيات معينة.. فيه منها الصح وتقوم بعدها فايق ونشيط وتعب اليوم يضيع.. وفيه وضعيات نوم بتصحيك مكسر ورقبتك وظهرك بيوجعوك..

والباحثين صنفوا وضعيات النوم لـ3 وضعيات رئيسية بتختلف حسب الحالة الصحية لكل شخص..

طب إيه هي وضعيات النوم المريحة وإيه المضرة بالنسبة لك؟
  هو ده اللي إحنا هنقولك عليه وفقًا لمقال في موقع Cleveland clinic و news medicalو sleep foundation

 

النوم على الجنب:

– حوالي 54٪من الناس بيناموا على جنبهم والوضعية دي بتفضلها الستات أكتر من الرجالة

– وضعية مريحة لأصحاب أمراض العمود الفقري والرقبة.. لكن مع وضع مخدة عند الركبة هيكون مريح أكتر

– النوم على الجانب الأيسر للحوامل لأن البطن بتغط أقل على القلب وتسهل تدفق الدم

– النوم على الجنب اليمين بيخفف من الضغط على الأعضاء الداخلية .. والشمال بيمنع ارتجاع حموضة المعدة للمرئ.. عشان كده الدكاترة بينصحوا بالتغيير بين الجانبين

– بتسهل وضعية النفس وتمنع الشخير

 
النوم على الظهر:

– حوالي 38% من الناس بيحبوا يناموا على ظهرهم وتعتبر تاني أكتر نومة مشهورة 

– وضعية مثالية لآلام الظهر والرقبة .. وعشان تحس بالراحة.. ممكن تحط مخدة تحت ركبتك وأسفل ظهرك وعند رقبتك .. عشان تتجنب تقوس العمود الفقري

– بتساعد الجسم على توزيع أحماله ومايبقاش فيه ضغط على جزء معين

– ممنوع على الحوامل وكبار السن وأصحاب المشكلة التنفسية

النوم على البطن:

– حوالي7% من الناس بيناموا بالشكل ده

–  أطباء العمود الفقري بيعتبروا الوضعية دي خطيرة.. ومعظم حالات آلام الضهر والرقبة بيكون بسببها

– بتزود من الشخير وارتجاع المرئ

– بتأثر بالسلب على عضلات الوجه وبتزود التجاعيد