جزء جديد من Warzone وMortal Kombat وأخبار تانية في الملخص الأسبوعي

يا مساء الجمال على مجتمع الجيمرز بكل أنواعهم، سواء من مستخدمين الـPC أو أجهزة الكونسول سواء Xbox أو PS تحديدا، ده مش عشان أنا بحبه ولكن عشان أول خبر هنبدأ بيه الملخص الأسبوعي هيكون مهم لمستخدمين PS.

استوديو “لندن” والتابع لشركة سوني أعلن إنه بيقوم بتطوير لعبة جماعية جديدة وهتتوفر بشكل حصري على PlayStation 5.

وده تم الإعلان عنه من خلال حسابهم على تويتر لما فتحوا باب التقديم لعدد كبير من الوظائف وإنهم شغالين على مشروع جديد للعبة جماعية أونلاين ومتحمسين جدا ليها ولكن مفيش أي تفاصيل زيادة ولكن إحنا عارفين إن مفيش حاجة بتستخبى والأيام هتقولنا إيه هو المشروع ده.

سمعت قبل كده عن لعبة اسمها Hyper Scape؟ سواء سمعت أو مسمعتش مش مهم الحقيقة لإن اللعبة اتوقف الدعم عليها.

وده اللي أعلنت عنه شركة Ubisoft في بيان ليها، إن لعبة الباتل رويال هيتم إغلاقها في 28 أبريل، فا للأسف هي ملحقتش تكمل سنتين تقريبا.. لو لعبت اللعبة دي إبقى قولنا رأيك فيها في كومنت على فيسبوك أو تويتر.

في تقارير بتقول إن الجزء الـ12 من لعبة Mortal Kombat الشهيرة جايلنا في السكة.

الموضوع بدء بصورة نشرها مدير الانتاج في استوديو “Nether Realm” على حسابه عبر تويتر، وظهر على شاشة الكمبيوتر ملف باسم MK12 ولكن هو مسح الصورة بسرعة، طبعا مش معروف هل ده إعلان بطريقة غير مباشرة ولا هو كان خطأ منه.. لإني أنا شخصيا اتعميت عشان أشوف اسم الفايل في الصورة ولكن لو ده صحيح فا الشكر لأول شخص أخد باله ونشر الملاحظة دي.

وعلى سيرة الألعاب الجديدة، في طراطيش كلام كده إن التحضير لجزء جديد من COD: Warzone بدء بالفعل، وإنه هيتم طرحها على الـPC والمنصات المنزلية ولكن الجيل الجديد منها فقط بالإضافة إلى إن اللعبة هتكون جديد ومختلفة عن الموجودة حاليا ولكن طبعا دي معلومات مش مؤكدة ومفيش أي معلومات عن معاد إصدارها وكل الكلام ده.. خدوا وقتكم يا جماعة عشان متطلعش بمشاكل بس زي اللي موجودة دلوقتي.

النجم الكبير “دوين جونسون” الشهير بـ “ذا روك” أعلن في مقابلة مع موقع “Men’s Journal” إنه هيلعب دور البطولة في فيلم مستوحي من لعبة.

وقال في المقابلة، إن اللعبة دي من أكبر ألعاب الفيديو وإنه كان لعبها لسنين طويلة وإنه متحمس للفيلم ده وهيبذل هو وفريق العمل أقصى جهد عشان يقدموا لمجتمع الجيمرز، فيلم كويس ويعجبهم.

Related Articles

Back to top button