25 جملة بيقولهم الأشخاص غير المحترفين في الشغل

الناس اللي عندها ذكاء اجتماعي أو بيركزوا بشكل عام مع كلام الأشخاص اللي قدامهم بيقدروا يحللوا نوعا ما شخصية اللي بيتكلم من خلال كلامه أو الجمل اللي بيقولها بشكل متكرر، ووفقا لده لقينا إن موقع Inc ذكر بعض الجمل أو الكلمات اللي بيقولها الأشخاص اللي مش بيتمتعوا بالاحترافية في بيئة العمل، ودي بعض الجمل اللي ذكرها المقال وبنسمعها كتير في الشغل:

1- “مش حاسس إني كويس كفاية”: أكيد كلنا بنحس إننا مش كويسين في بعض الأوقات، لكن دايما الأشخاص غير المحترفين ما بيستخدموا الجملة دي بشكل متكرر كمبرر وعذر لفشلهم في إتمام شىء ما.

2- “أنا عملت اللي إنت قولتلي عليه”: غالبا دي بتبقى قصة حياة الشخص اللي مش عايز يتجاوز مرحلة المبتدئ في الشغل، وهي إنه يعلق فشله على الأشخاص التانية أو بمعنى أصح إنه يستخدمهم شماعة عشان يعلق عليها أخطاءه.

3- “ده مش شغلك”: طبعا أكيد لازم يكون فيه خصوصية ومساحة شخصية، لكن لما يكون فيه رفض قاطع وغير منطقي بشكل مكرر فده بيبقى بنسبة كبيرة دلالة على تغطية الشخص ده لعدم نجاحه أو كفائته في إتمام شغله.

4- “دي كانت فكرتي”: الأشخاص غير المحترفين مابيكونش مدركين إن الأفكار الجميلة ما ينفعش توقف عند مجرد فكرة، لكن الأهم هو تطوير وتنفيذ الفكرة.

5- “قبل ما تقول ده، خليني بس أقولك” : الغير محترفين ما بيسمحوش لحد غيرهم يتكلم وبيتعمدوا يسيطروا على المناقشة كلها.

6- “ده مش من شغلي”: هما دايما الأشخاص اللي بيبعدوا عنهم المسؤولية لما بيكون فيه حاجة مهمة، زي الموظفين الروتينين اللي دايما بيقولوا “ده مش شغلي، روح لمدام عفاف”، التخصص مهم ولكن إيقاف الشغل على أمور بسيطة مش تصرف سليم.

7- “أسف أنا اتأخرت”: كلنا ممكن نتأخر في بعض الأوقات، لكن لما يبقى ده شعارك، فأنت شخص مابتقدرش قيمة الوقت ولا مجهود الناس التانية.

8- “عندنا خطط كبيرة”: الخطط دايما والتخيلات دايما جميلة، لكن الأحلى هو إنجاز الخطط دي وتحقيقها على أرض الواقع.

9- “مش هيلاحظوا ده أبدا – بصوت حسن حسني – بس على الله ماحدش ينخرب ورانا”: الأشخاص غير المحترفين دايما “بيطلسقوا” الشغل أو المهمة المكلفين بيها عشان كده بيعتمدوا على الفهلوة وإن محدش يلاحظ اللي عملوه.

10- “أنا عارف إنت المفروض تمشي، بس خليني أقولك حاجة كمان”: وده بيجمع بين رقم 5، ورقم 7، هو شخص أناني وشايف إنه محور مدار الكون، ده غير إنه بيتجاهل رغبات وحياة الناس التانية.

11- “أنا مش قادر أسامح”: رفض المسامحة أو الاعتذار هو غالبا أصعب من التسامح.

12- “خليني أخد الأضواء منك”: محدش هيقول ده بشكل لفظي مباشر ولكن بالفعل، الأشخاص غير المحترفين بيعملوا كده، بياخدوا الأضواء من على الشخص اللي بيتكلم بمقاطعته دايما في نص كلامه.

13- “أنا بس كنت عايز”: ممكن الجملة دي تدل على إن الشخص مش معترف بحقه في اللي عايز يقوله أو يعبر عنه.

14- “ده استحالة يحصل أبدا”: أبدا هو وقت بعيد جدا، فكون الشخص يستعمل الجمل دي بيدل على إنه غير محترف.

15- “أنا هبدأ بكرة”: بكل بساطة لإن التأجيل هو علامة واضحة على الفشل يعني زي ما اتعلمنا لا تؤجل عمل اليوم للغد.

16- “أنت بتعمل ده غلط”: دي علامة على شخص غير محترف صغنن كده 

17- “آسف، مش آسف”: شخص بيبقى عارف إنه لازم يعتذر ومع ذلك هو مش هيعتذر.

18- “آسف، أنا نسيت”: نفس الكلام في رقم 7، عادي كلنا ممكن ننسى ونعتذر على النسيان، بس الأشخاص غير المحترفين بيقولوا ده باستمرار.

19- “أنا زهقان جدا”: بيفشل الأشخاص الغير محترفين إنهم يلاقوا سبب زهقهم في وقت الشغل، واللي هو غالبا بيكون من نفسهم لإن ماعندهمش حاجة بيسمتعتوا بيها أو حاجة بيتعلموها جديدة.

20- “أنا مش حاسس ده”: الجملة دي بيقولها الأشخاص اللي مش قادرين يعبروا عن إحساسهم أو يردوا على سؤال “ليه” لما بينتقدوا حاجة في الشغل، أو بيحاول يخبي عن الناس اللي حاسس بيه فعلا.

21- “عشان أنا قولت كدة”: الحجة دي هي أضعف حجة ممكن تقنع بيها اللي قدامك في الشغل يعني ممكن تستخدمها مع أطفال من سن 9 سنين وأنت راجع بس.

22- “أنا مش عارف ليه إنت مش شايفني”: الأشخاص غير المحترفين غالبا ما بيستخدموا كل الأعذار عشان يبرروا عدم وجودهم للمساعدة. 

23- “ده مش عدل”: أو الحياة غير عادلة عموما، كل الناس غالبا عارفة المبرر ده، بس محدش بيستخدم الجملة دي بشكل مكرر كمبرر إلا الأشخاص غير المحترفين.

24- “إحنا دايما بنعمله بالطريقة دي”: الأشخاص دي بيستخدموا الجملة دي لإنها قادرة تنهي كل الجدل اللي ممكن يخليهم يتطوروا أو يتغيروا.

25- “عشان أنا المدير”: كنت مستني الجملة دي صح؟ بس يتهيأ لنا إن الجملة دي منطقية من الناحية الفنية، لكن بالرغم من كدة لما المدير يستخدمها كحجة عشان يمنع المناقشة في اللي حصل بيبقى دليل على إنه مدير غير محترف.

Related Articles

Back to top button