ليه بعض الناس بيحسوا إنهم محتاجين يرضوا الناس على حسابهم؟
![](https://theglocal.com/wp-content/uploads/2023/02/27.png)
فيه أوقات بنتلخبط بين إني برضي حد وباجي على نفسي عشان بحبه وأوقات تانية إنك تبقى الشخص اللي بتتحمل كل حاجة وعايش مضحي من أجل الأخرين بسلامك النفسي وبكل اللي أنت عايزه.. يمكن إرضاء الناس مش حاجة وحشة أوي زي ما الناس كل شوية على السوشيال ميديا بتقول هو خطوة لطيفة ومحاولة لمساعدتهم وعشان تخليهم مبسوطين.. لكن لما يتجاوز ده ويتخطى راحتك انت.. ده المؤشر الخطر.
فيه دكتورة اسمها “إريكا مايرز” في مدينة بيند بولاية أوريغون بتقول إن الموضوع كله له علاقة بتعديل الكلام والسلوكيات أو تغييرها عشان مشاعر ورودود أفعال شخص تاني، فأنت بتبذل كل مجهودك عشان أشخاص تانية بناءًا على اعتقادك إن ده اللي محتاجينه، بس في المقابل أنت بتتخلى عن وقتك وطاقتك عشان يحبوك، والطريقة دي بالظبط هي اللي بتسبب المشاكل.
لو أنت مش عارف أنت ساعات بتمشي الدنيا بس وبتساعد اللي بتحبهم في شوية مواقف ولا بتحاول ترضي الناس على حسابك.. تعالى نقولك شوية علامات تتعرف بيها حسب ما موقع “healthline” قال في مقال من مقالاته:
1- لو بتعاني قلة احترام الذات:
لو بتحس إنك مابتستحقش الحب الا لو اديت الشخص التاني كل حاجة، ولو ساعات بتحس إن الناس بيهتموا بيك بس لما بتكون مفيد بالنسبة لهم، ولو بتحتاج لمدحهم وتقديرهم عشان تحس بالرضا عن نفسك.
2- لو بتحتاج الناس تحبك:
لو بتحس إنك بتقضي وقت كتيرفي القلق من رفض الناس ليك فغالبا ده بيخليك ترضي الناس على حسابك عشان ماحدش يرفضك ويفضلوا يحبوك، ولو بتحس برغبة قوية إن الناس تحتاجك وبتشوف إن لازم تقدم حاجة عشان يفضلوا محتاجينك.
3- لو صعب تقول لا:
لو بتحس صعب عليك تقول لا وبتقلق تقول لحد أو لو بتحس إن رفضك لطلب مساعدة حد هيوصله إنك مش مهتم بيه، ولو بتوافق تعمل حاجات أو تساعد ناس وأنت مش عايز أصلا، وده أصلا بيخلي بعض الناس تتعامل مع ده بشكل مؤذي ليك وبيختاروا احتياجاتهم قبل احتياجاتك وبيتجاهلوا حدودك.
4- بتعتذر أو بتسمح إنك تبقي الشخص الغلطان وأنت ماعملتش حاجة:
لو بتلاقي نفسك دايما مستعد تقول أسف وأنت ماعملتش حاجة، وبتستعد تتحمل اللوم حتى لو مالكش علاقة باللي حصل، مثلا زي إنك مديرك قالك تطلب بيتزا على الغدا فالمطعم جابوا أوردر غلط، فتلاقي نفسك بتعتذر كتير أوي وبتحس بالفزع وبيتهيألك إن زمايلك في الشغل هيكرهوك ومش هيثقوا فيك تاني.
5- بتتسرع في الموافقة:
حتى لو أنت مش موافق بس بتقول إنك موافق بشكل مؤكد، مثلا لو زمايلك في الشغل قدموا أفكار لمشروع في اجتماع هتلاقي نفسك بتقول “فكرة ممتازة” لكن من جواك بتبقي حاسس إنها فكرة وحشة وأنت مش موافق عليها أصلا.
6- بتواجه صعوبة عشان تعرف أنت مين:
في الغالب الأشخاص اللي عايزة ترضي الناس كلها بتلاقي صعوبة في التعرف على مشاعرهم الحقيقة، لإنه بيستمر في إنه يحط رأيه وحياته على جنب فبيبقى صعب يتعرف عليها ويعترف بيها وفي النهاية بيبقي مش عارف هو عايز إيه ولا بيعرف يعبر عن مشاعره، فمثلا صعب يقو لشريكه إنه متضايق منه أو إنه بيأذي مشاعرك.
7- أنت معطاء زيادة عن اللزوم:
الأشخاص اللي بيحبوا يرضوا الناس بيحبوا يقدموا تضحيات عشان يغذى إحساسهم بذاتهم، وبيدوا كتير على أمل إن هيتردلهم بالمثل.
8- ماعندكش وقت فراغ:
ماعندكش وقت فراغ لنفسك بعد ما بتعمل الحاجات الأساسية زي الشغل وشغل البيت ورعاية الأطفال إيه الوقت اللي عندك؟ عندك وقت لهواية أو للاسترخاء حتى؟ فكر كده في أخر مرة عملت فيها حاجة لنفسك بس! لو مالقيتش فاحتمال يبقى عندك ميول لإرضاء الناس.
9- المجادلات والصراعات بتزعجك:
الشخص اللي بيحب يرضي الناس بيخاف من الغضب وده منطقي جدا، لإنهم غضبانين يعني مش مبسوطين، ولو كان هدفهم إنه يرضيهم ويخليهم مبسوطين فالغضب ده معناه إنه فشل، وعشان تتجنب الغضب ده فبتتسرع في الاعتذار أو بتعمل اللي يخليهم مبسوطين حتى لو مش زعلانين منك، وممكن تبقى بتخاف برضه من الصراعات اللي مالهاش علاقة بيك.
لو كنت عايز تبطل ترضي الناس وتشوف إزاي ترضي نفسك فتعالي نقولك شوية نصايح ممكن تعملها:
1- خليك لطيف لما الموضوع يبقى مستاهل:
خليك لطيف لما الموضوع يبقى مستاهل ده مش عشان تاخد موافقة من حد وقبل ما تقدم مساعدة لحد ركز على اللي أنت عايزة وهتحس بإيه وهل إنك تساعد شخص تاني ده هيخليك مبسوط؟ ولا هتضايق؟
2- اتمرن إنك تحط نفسك في المقام الأول:
أنت محتاج طاقة ومشاعر عشان تساعد الناس فلو أنت مش مخلي بالك من نفسك فمش هتبقى قادر على أي حاجة حد تاني، وإنك تحط نفسك أولوية ده مش معناه إنك شخص أناني ده صحي، فجميل وحلو أوي إنك تبقى شخص عطوف ومهتم بس مهم برضه تحترم احتياجاتك وتهتم بيها زي إنك تقول رأيك في اجتماعات الشغل، وتطلب اللي محتاجه في علاقاتك.
3- اتعلم تحط حدود:
تطوير الحدود شئ صحي وخطوة مهمة، في المرة الجاية اللي حد يطلب فيها مساعدتك فكر أنت عايز تعمل ده ولا لا! وفكر أنت حاسس بإيه وعندك وقت تعمل كده ولا لا، وقادر تضحي بوقت فراغك ولا لا، وهتحس بإيه لما تساعده هتتبسط ولا هتحس إنه بيستغلك.
4- استنى لحد ما حد يطلب منك المساعدة:
بغض النظر عن المشكلة، حاول تستنى لحد ما الشخص يطلب منك المساعدة بشكل صريح، فمثلا لو حد من صحابك اتكلم معاك عن مشاكله مع مديره في الشغل بدل ما تقدم نصايح على طول اسمع منه للأخر لإنه فممكن يبقى محتاج يتكلم بس عادي.
5- اتكلم مع دكتورك النفسي:
بيبقى صعب إنك تكسر أنماط حياتك أو شخصيتك اللي بقالها كتير خصوصا اللي اتشكلت في مرحلة الطفولة أو نتيجة صدمة، والدكتور ممكن يساعدك في اكتشاف الأسباب اللي بتخليك ترضي الناس على حساب سعادتك لو مفيش سبب واضح وهيقدملك نصايح تتعامل مع ده إزاي.