ملخص مؤتمر “Apple” وأهم مواصفات “iPhone 13” الجديد
النهاردة 14 سبتمبر انطلق مؤتمر آبل 2021 وهو المؤتمر اللي بيستناه ملايين كل سنة، والسنة دي مستنين الإعلان عن آيفون 13 وفي بداية المؤتمر أعلن “تيم كوك” الرئيس التنفيذي للشركة عن أحدث إصدار من جهاز “أيباد”.
وأعلنت الشركة إن جهاز “أيباد” الجديد هيكون فيه معالج “A13 Bionic” وهيكون أسرع 3 مرات من جهاز “Chromebook”، وأعلنوا إنه هيكون مزود بكاميرات خلفية متطورة أكتر حجمها 12 ميجا بكسل، مع خاصية HDR وبتسجيل فيديوهات بدقة 4K.
وأعلنوا إنه تم تزويد الجهاز بإكسسوارات بتشمل غطاء واقي انسيابي فيه منه ألوان مختلفة، وهيكون معاه الجيل التاني من أقلام أبل الذكية والأقلام قابلة للالتصاق بالجهاز بطريقة مغناطيسية، وقالوا إن “أيباد ميني” الجديد هيكون بيدعم شبكة الجيل الخامس 5G، واللي سعره هيبدأ من 499 دولار وهيكون متوافر بداية من الأسبوع الجاي، وأعلنوا إنه تم تزويده بوصلة USPC.
ومن ضمن الحاجات اللي تم الإعلان عنها برضه ساعة أبل الذكية Apple Watch Series 7 واللي هتكون متوفرة بسعر هيببدأ من 399 دولار وهيتم طرحها مع نهاية الخريف، وهتبقى موجودة بخمسة ألوان.
وطبعًا أعلنت الشركة عن آيفون 13 المنتظر وقالوا إنه هيتم إصداره بـ 5 ألوان وبشاشة أمامية أقوى وهيكون مضاد للمياه، وأعلنوا عن سعره اللي هيكون بـ 699 دولار وبطارية ممكن تقضي يوم كامل ومزود بخواص تأمين متطورة أكتر وبيشمل كمان خاصية التعرف على الصوت وده عن طريق تطبيق “سيري”.
ده غير إنه هيدعم حافظة الطاقة الممغنطة “ماج سيف” وشبكة الجيل الخامس 5G،ومزود بخرايط ثلاثية الأبعاد وشريحة A15، وهيكون بكاميرتين بس لكن IPhone Pro max هيكون مزود بـ 3 كاميرات.
وتم تزويد التصوير الفيديو في iPhone 13 بخاصية التركيز التلقائي على اللقطة، وكمان خاصية “سينماتك مود” واللي هي هتخليه مشابه لقدرات التصوير السينمائي، ده غير إن كاميرا أيفون 13، مزودة بأحدث نظام كاميرا مزدوجة في العالم 12 ميجا بكسل، مع نظام مضاد لاهتزاز الكاميرا، وخاصية التقاط في الوضع الليلي بوضوح ودقة أكتر، ونظام “الترا وايد”.
آيفون 13 بنفس تصميم الإصدار السابق اللي هو آيفون 12 ونفس الحجم كمان،بنفس حجم الشاشات اللي هو 5.4 بوصة و6.1 بوصة للنماذج العادية، و6.1 بوصة و6.7 بوصة لأجهزة Pro، ومصنوعة من نفس المواد، وده ممكن يتغير مع أجهزة آيفون 2022، حسب ما قالت صحيفة “ديلي ميل”.
أما عن أجهزة IPhone Pro Max فأعلنت الشركة إنه هيكون موجود بـ 4 ألوان وكاميرا أمامية أصغر بحوالي 20%، وشاشة مضادة للمياه، وهيشتغل بشريحة A15 بخاصية عرض أسرع بحوالي 50% عن أي آيفون تاني، وهيكون بشاشة XDR، وقدرته على الإضاءة 1000 nits، ومعدل تحديث شاشة 120 Hz مع آلية التعديل.
وهيتميز بخاصية “برو موشن” وهي أحدث خواص تشغيل الـ”Video games” السريعة جدا، وضافتله كمان الشركة بكاميرات أكبرها مقاس 77 ملي، وهتشتغل بنظام “ألترا وايد”، 12 ميجا بيكسل وثلاث اختيارات من التقريب البصري، ده غير خاصية “ماكرو فوتوجرافي” ودي عشان التقاط صور لأصغر التفاصيل، واللي هي مزودة بخاصية التأقلم مع كل حالات الإضاءة المختلفة.
آيفون 13 برو مزود كمان بنظام تصوير بمستوى عمره ما اتعمل وقدرات تصوير سينمائي وده بفضل خاصية التأقلم مع الإضاءة المختلفة، ونظام “سينماتيك مود” اللي لسه متضاف جديد لإصدارات آيفون 13.
وهتطلق أبل خاصية ProRes الجديدة من ضمن مميزات IPhone 13 Pro الجديد ودي خاصية
لتحسين جودة الفيديوهات واتصممت مخصوص للمحترفين في تعديل الفيديوهات من مستخدمي برامج Final Cut Pro X أو Adobe Premiere Pro.
