أهم 10 فوايد للجيم غير العضلات

مع بداية السنة، بيحصل ارتفاع في اشتراكات الجيم وبتحصل حالة من الـ “أنا لازم أطور من نفسي” وابطل سجاير واشيل حديد، ويادوب الحق أعمل فورمة قبل الصيف، ولكن منحنى الحماس ده غالبا بينخفض على أخر الشهر وماحدش بيستفاد غير صاحب الجيم اللي بيكون عمل ثروة قومية توازي ثروات دول بحالها من الاشتراكات دي.

ولو أنت ربنا كرمك وهتكمل اشتراك السنة اللي دفعته عشان تعمل الفورمة التمام هقولك عاش وبرافو عليك كمل.. بس هقولك على شوية حاجات الجيم ورفع الأوزان هيفيدك بيها، وحتى تبقى تقولها لصحابك عشان تشجعهم، أو لو بيسفوا عليك وبيقولولك “أنت منفوخ على الفاضي”، حسب موقع Healthline:

1- بيخليك أقوى، طبعا أنت هتحس إنها جملة “حمادة هلال جدا” بس هشرحلك إزاي، يعني الجيم ورفع الأوزان بيحسن أدائك الرياضي بشكل عام، سواء في حياتك اليومية لما الحاجة تبعتك تجيب البقالة، أو لو هتمارس أي رياضة بتتطلب سرعة قوة وتحمل.

2- بيساعد في حرق الدهون: في أبحاث بتقول إن حرق السعرات بيحصل خلال التمرين وأحيانا بيستمر لحد 72 ساعة.

3- تقليل دهون البطن: واللي بتزيد مخاطر الإصابة بأمراض مزمنة مرتبطة بالقلب والكبد والسكر وأنواع من السرطان، فبعض الدراسات بتقول أن تدريبات القوة بتساعد على تقليل دهون البطن ودهون الجسم بشكل عام.

4- تقليل خطر الإصابة: وده بمعنى إن تمارين القوة لما بتخش ضمن روتينك، بتساعد على تحسين الأربطة والأوتار والمفاصل بالإضافة لتقليل خطر إصابات أسفل الظهر، ولما اتعمل دراسة على 7738 رياضي، لقوا إن تمارين القوة قللت خطر الإصابة بنسبة 33%.

5- صحة القلب: النقطة دي تحديدا توريها لأي شبح يقولك عضلة القلب مالهاش تمرينة، لا ليها، لإن تمارين القوة ورفع الأثقال بتساعد على تقليل ضغط الدم وتحسين الدورة الدموية عن طريق تقوية القلب والأوعية الدموية.

6- الثقة بالنفس واحترام الذات: وده جانب نفسي كويس جدا للتدريب، اتعملت دراسة على عدد من الشباب ولقوا فيها إن في صلة بين التمرين والشعور بالرضا عن شكل جسمهم ومظهرهم وتقدير الذات العالي للشباب دول.

7- تقوية العظام: تمارين رفع الأثقال بتعمل زي ضغط مؤقت على عضمك، وده بيبعت رسالة لخلايا بناء العضم فبالتالي بيتم إعادة بنائها بشكل أقوى، وده في النهاية بيساهم في تقلق خطر إصابتك بهشاشة العظام أو أي كسور خصوصا لما تتقدم في العمر.

8- تحسين المزاج: حسب موقع Healthline، أكتر من دراسة أثبتت إن تمارين القوة بتقلل من القلق وبتحسن المزاج، لإنه بيطلق هرمون الإندروفين وده المسؤول عن المزاج وبيلعب دور كبير فيها.

9- تحسين صحة الدماغ: في ارتباط بين تمارين القوة وتحسين صحة الدماغ وحمايتها من التدهور المعرفي اللي بيكون مرتبط بالتقدم في السن

10- حياتك كلها هتكون أحسن: تمارين القوة زي ما قولنا مش مجرد تمارين بتديك عضلات وشكل أفضل، ولكن حياة أحسن برضه في كذا اتجاه، زي تحسين الصحة العقلية وأداء بدني أفضل، في دراسة لقت إن تمارين القوة ساعدت في تحسين الحياة عند المصابين بالتهاب المفاصل من خلال تحسين درجات الألم والأداء البدني.

في النهاية حابين نقولك إنك تحتفظ بالموضوع ده عشان كل ما تكسل تنزل الجيم، اقرا فيه شوية وهتلاقي نفسك في الجيم وسامع الناس كلها بتقولك عااااااااااااااااااش.. أهم حاجة ماتقلش في الوزن وتلعب صح عشان تبقى زي بيج رامي!