ظاهرة “أحلام نومة العصر”

الفترة الأخيرة تقريبًا كل الناس اتفقوا على السوشيال ميديا إن مفيش أوحش من نومة العصرية.. واللي أكد على ده كمان الأحلام اللي بيحكوها أو بدأت تنتشر على شكل ميمز في صورة أي حاجات مش منطقية على بعض تبقى أحلام نومة العصرية.. وناس كتير بدأت تستخدم جملة “أحلام نومة العصر” لما يحبوا يعبروا عن حاجة عبثية أو مش منطقية أو ملهاش تفسير فمثلا تبقى نايم في هدوء وسلام وأمان، لا بيك ولا عليك، وفجأة تلاقي نفسك قاعد بتتكلم مع سمكة لابسة بدلة في كافيه في أستراليا عن أزمة منتصف العمر.

بس بعيدًا عن الميمز والهزار بقى عمرك سألت نفسك بكل جدية ليه فعلا بنحلم أحلام عبثية أو غريبة؟

الجسم بيبقى نايم، الشخص مابيتحركش، على وشه ملامح الهدوء والسلام، بس الدماغ مش بيبطل شغل، بيجمعلك صور سريالية مالهاش معنى أو تفسير واضح، وبيحطها في شريط عرض، وده اللي احنا بنسميه “الحلم”.

حسب موقع “بيزنيس انسايدر”، الجسم بيمر بمراحل مختلفة من النوم كل ليلة، ومعظم أحلامنا بتحصل وقت نوم “حركة العين السريعة REM” واللي بيحصل تقريبا بعد 90 دقيقة من النوم. والأحلام غالبا في الوقت ده بتكون غريبة ومش واضحة وعبثية جدا، وغالبا بتكون مرتبطة بالعواطف.

وفي فرضية جديدة طرحها “إريك هول”، أستاذ مساعد باحث في علم الأعصاب بجامعة تافتس الأمريكية، والدراسة اتنشرت في مجلة Patterns العلمية، إن الأحلام السريالية بتساعد على ضبط تصور الدماغ للواقع اليومي، من خلال تقييم محفزات غير متوقعة وفوضوية بالنسبة لنا.

بمعنى تاني إن الدماغ بتظهر واقع مشوه وغريب من خلال الأحلام عشان ده يساعدنا على فهم “واقعنا الحقيقي” بشكل أحسن، وبشكل فيه نمطية وملل أقل.

الفرضية كمان بتقول إن الحياة مملة في أوقات كتير والأحلام موجودة عشان تمنعك إنك تتعود على النمط الممل ده، بمعنى إن الأحلام الغريبة هي وسيلة الدماغ عشان يفضل صاحبه عقله سليم.

السبب من الأحلام بشكل عام لسه غامض بالنسبة للمجتمع العلمي بالرغم إن فيه بعض الأدلة اللي بتفسر سبب وجود بعض الأحلام زي معالجة المعلومات الجديدة، فالحلم بيعالج المعلومات اللي بياخدها كل يوم، وبيعزز الذكريات، وبيحاول يفرز معرفة جديدة.

“ستيفاني ستال”، طبيبة النوم في جامعة “إنديانا هيلث”، بتقول: “لو كنت مركز على موضوع واحد قبل النوم علطول، ففيه احتمال أكبر إنه يظهر في حلمك، ولو بتشوف الأخبار أو بتتصفح وسائل التواصل الاجتماعي قبل وقت النوم، فمن المرجح إن أحلامك يبقى ليها علاقة بمحتوى الحاجة اللي كنت بتشوفها أو المشاعر اللي حسيت بيها وقتها”.

وبالنسبة للأحلام العبثية أو الغريبة ناس كتير بتحاول تفهم السبب وراها.

موقع Amerisleep نشر 5 أسباب شائعة للأحلام الغريبة:

  • زيادة معدل التوتر والقلق عن الشخص
  • لما الشخص ياكل أكل تقيل ويدخل بعدها ينام
  • كثرة استهلاك المنومات والأدوية اللي بتساعد على النوم
  • لما الجسم يبقى متعود على نظام أو حاجة معينة وفجأة يحصل اختلاف (وإحنا بنخمن إن احتمال يبقى ده أهم سبب بيخلي أحلام نومة العصرية غريبة)
  • الفرجة على التلفزيون والموبايل كتير قبل النوم علطول

Related Articles

Back to top button