اضطراب الاكتناز أو التخزين: ليه الشخص بيحتفظ بكراكيب مش عايزها؟

عارف إن الشخص اللي بيفضل يخزن كراكيب بيكون مصاب باضطراب التخزين أو الاكتناز؟ وترجمته Hoarding Disorder.. طيب إيه سبب الاضطراب ده؟

موقع Healthline بيقول في مقال من مقالاته إن الشخص بيبدأ يخزن الحاجات لاعتقاده إنها مفيدة حتى لو مش دلوقتي بس هتبقى مهمة مع الوقت، وأحيانا بتكون الحاجة دي مرتبطة بشخص أو حدث معين ومش عايزين ينسوه والموضوع ممكن يكبر لدرجة إنه ممكن يستغنى عن حاجة مهمة وأساسية في الحياة مقابل إنه ميستغناش عن الحاجة اللي ملهاش لازمة، وفي فئة من الأشخاص بيكونوا أكثر عرضة للاصابة باضطراب الاكتناز

الفئة دي هما الأشخاص اللي عايشين لوحدهم أو اتولدوا في مكان غير منظم أو كانت طفولتهم صعبة وأحيانا بيرتبط بأمراض تانية زي القلق والاكتئاب واضطراب فرط الحركة وتشتت الانتباه أو الفصام.

طيب تعرف إزاي لو عندك الاضطراب ده؟ إن تكون أوضتك فوضوية وفيها كراكيب كتير ومش بتقدر تلاقي الحاجات المهمة وسط الفوضى وبتخزن كل ما هو مهم وغير مهم وبتتخانق مع عائلتك بسبب الكركبة دي كلها

طيب هل الاضطراب ده بيتعالج؟ الاضطراب بيتم تشخصيه ومعالجته ولكن أحيانا بيكون صعب إقناع الشخص المصاب إنه مٌصاب أصلا، والعلاج بيركز على الشخص نفسه وتغيير سلوكه.

فا أول الطريق هو التشخيص والتقييم من خلال جلسات الطبيب النفسي اللي بتكون مع المٌصاب وكمان التقييم الطبي ممكن يساعد في اكتشاف اضطرابات تانية إن وجدت.

وكمان العلاج السلوكي المعرفي هو أكتر طريقة ناجحة في علاج اضطراب الاكتناز أو من خلال مجموعات الدعم أو من خلال بعض الأدوية اللي بتساعد ولكن مش معمولة خصيصا للاضطراب نفسه.

Related Articles

Back to top button