اعرف إيه أحسن مكان تقضي فيه إجازتك على حسب شخصيتك!

كل شخص مننا عنده مكان بيلاقي راحته فيه وبيحس إنه لقى نفسه، وبيبقى فيه سفرية أو رحلة هي اللي بيستناها عشان بيحس إن المكان ده الـ”كومفرت زون” بتاعته.

موقع “businessinsider” قال إن لكل واحد سواء كانت شخصيته هي رومانسي أو تقليدي أو بيحب الإثارة أو منطوي هيلاقي المكان اللي يناسبه.. وقال المكان المناسب لسفر كل شخصية فينا وهما:

1- الشخص الفرهود اللي عنده طاقة:

الشخص اللي طول الوقت نشيط ومهيبر وقليل لما بيقعد ويستريح أفضل مكان يسافر فيه هو “بوينس آيرس” في الأرجنتين، وده لإنها مدينة مليانة بالإثارة، والهندسة المعمارية فيها رائعة والشوارع ملونة ومليانة بالمعالم الثقافية ده غير إن فيها أماكن أكل مختلفة ولذيذ وبليل برضه مدينة حيوية، فهي مافيهاش لحظة ملل أو أنتخة.

2- الشخص الفضولي:

الشخص اللي عايز يتعرف على أماكن جديدة ويكتشف العالم أحسن مكان ممكن يسافر له هو مدينة “أدنبرة” في اسكتلندا لإنها عبارة عن سلسلة لا نهائية من الشوارع الضيقة والجناين السرية والساحات المختفية وكأنها أماكن مستنية حد يكتشفها، فممكن لأي شخص فضولي إنه يحس نفسه شارلوك هولمز هناك لو بس حاول يكتشف الممرات المحفورة تحت الأرض فيها.

3- الشخص الأنتوخ:

لو بتدور على مكان تقعد فيه قدام البحر وتأنتخ وتستريح فأنت مكانك اللي المفروض تسافر له هو مدينة “تولوم” في الميكسيك لإنها مكان مثالي للاسترخاء، هتبدأ يومك بـ”سيشن” يوجا على البحر وبعد كده تاخد عصير فريش وفي نص اليوم اللي هو الضهر هتقعد على مرجيحة شبك، وبليل مش هتسمع أي حاجة غير صوت البحر والموج والهواء.

4- الشخص المغامر:

لو بتحب الأنشطة الغريبة لما بتسافر وبتفرهد نفسك فأنت مكانك الصح عشان تتفسح في “أيسلندا”، هتلاقي نفسك وهتتبسط وأنت بتتمشى لمسافات طويلة في الأنهار الجليدية في “Daredevils” وكهوف الجليد والجو الساقعة، لكن حاول لما تحجز في رحلة زي كده تبقى حاجز مع خبراء وسواء كنت بتحب المغامرة أو لا فحاول ماتفوتش الرحلة دي.

5- الشخص الاجتماعي:

لو عندك صحاب كتير وبتحب الأماكن اللي بتقدر تكون فيها صداقات، وتبقى اجتماعي حتى فى وسط ناس غريبة، ولو بتحب التجارب الجديدة، فالمكان المناسب ليك هو “طوكيو” في اليابان لإنها مدينة مليانة كافيهات وأماكن أكل جديدة، واختيارات للفسح بتخليك متحمس طول الوقت، ده غير إنها بليل كمان مليانة أماكن للسهر.

6- الشخص العفوي:

لو أنت شخص هادي ومبدع ومؤمن إنك تعيش اللحظة بلحظتها فأنت أكيد الكنز بالنسبة لك في الرحلة مش في الوصول، فأنت محتاج تروح تتفسح في طرق “كاليفورنيا” في أمريكا وهتبدأ من “سان دييغو” وتتجه ناحية الشمال لطريق المحيط الهادي، كل اللي عليك إنك تستمتع بالطريق وتتفرج على مناظر المحيط سواء كنت سايق أو حد بيسوقلك بس أهم حاجة لو بتسوق خد بالك طبعا.

7- الشخص العملي:

الشخص العملي بيبقى عايز دايما لما يسافر يعرف حاجات جديدة وثقافات مختلفة، عشان كده أحسن مكان ممكن يروحه هو “أثينا” في اليونان هتعرف حاجات عن التاريخ والفلسفة وهتشوف العمارة اليونانية القديمة زي مقبرة الأكروبوليس وكيراميكوس، وممكن تروح المتحف الأثري الوطني وهو عبارة عن كنز دفين من الآثار والتحف والتماثيل وحتى البلاط بتاعه.

8- الشخص الانطوائي:

الأشخاص اللي بيحبوا يقضوا وقت لوحدهم مع أفكارهم من غير الدوشة والزحمة، غالبا بيكونوا أشخاص انطوائيين والمكان المناسب ليهم ولسفرهم في “كانون بيتش” في ولاية أوريغون في أمريكا، لإن شواطئها منعزلة وفيها مناظر خلابة ومكان ممتاز للرحلات الاستكشافية الفردية، ده غير إن أغلب الوقت ممكن تقضيه في التمشية على الشاطئ بس من غير أي فرهدة.

9- الشخص الرومانسي:

لو شايف نفسك شخص حالم ومثالي وحنون ورومانسي فأكيد هتبقى شايف إن باريس هي المكان المناسب ليك بس لا روما هي الاختيار الصح، عشان هتشدك أنت وقلبك وهتغريك بمزيج من الأجواء الدافية والهندسة المعمارية والفن والأكل وده “ميكس” مايخيبش أبدا في انبساط أي حد.

طبعا إحنا ماروحناش الأماكن دي قبل كده وأنت أكيد نفسك تسافر وتتفسح في المكان المناسب ليك ولشخصيتك دلوقتي وكده.. بس معلش كمل الشهر ده بآخر 200 جنيه معاك والشهر الجاي هتحوش هتحوش جامد أوي.