الماهجونج.. الدومينو بالصيني

الماهجونج من أشهر الألعاب التقليدية في الصين وهي لعبة جماعية بتعتمد على الذكاء والتركيز والحساب والتخطيط وبتتلعب في الأساس بين 4 لاعبين.

ورغم إن شكلها ممكن يفكرك بألعاب الورق زي الرامي إلا إنها بتستخدم مجموعة من القطع أو البلاطات اللي عليها رموز وأرقام والهدف الأساسي إنك تكوّن مجموعة صحيحة من البلاطات قبل منافسيك.

الماهجونج بتتلعب إزاي؟

في الشكل التقليدي للعبة كل لاعب بيبدأ بـ13 قطعة بينما اللاعب اللي بيكون دوره الأساسي في الجولة بيبدأ بـ14 قطعة وبعد كده بيبدأ اللعب بنظام بسيط.. اللاعب يسحب قطعة جديدة من الحائط الموجود في منتصف الطاولة وبعد ما يشوف إيه اللي يناسب مجموعته بيرمي قطعة واحدة مكشوفة قدام باقي اللاعبين.

وتستمر العملية بالشكل ده لاعب يسحب قطعة ولاعب يرمي قطعة لحد ما واحد من اللاعبين يقدر يكوّن التشكيلة المطلوبة ويعلن إنه كسب الجولة.

قطع الماهجونج.. اللعبة فيها إيه؟

مجموعة الماهجونج التقليدية بتضم 144 قطعة ومقسمة لعدة أنواع رئيسية.. أول نوع هو قطع الأرقام ودي بتكون من 1 لـ9 وبتظهر في 3 مجموعات أساسية الدوائر والخيزران والشخصيات الصينية.

بعد كده عندنا قطع الاتجاهات وهي الشرق والجنوب والغرب والشمال بالإضافة لـ3 قطع تنانين بألوان مختلفة وفي بعض أنواع الماهجونج بتكون فيه كمان قطع إضافية للزهور والفصول ودي ممكن تمنح اللاعب نقاط إضافية حسب قوانين النسخة اللي بيلعبها.

الهدف من اللعبة

علشان تكسب الجولة في الشكل التقليدي للماهجونج لازم تكوّن يد مكونة من 14 قطعة بالشكل الصحيح.. اليد الفائزة بتتكون عادةً من 4 مجموعات وكل مجموعة بتكون 3 أو 4 قطع بالإضافة إلى زوج من قطعتين متطابقتين.

وهنا بيظهر الجزء اللي محتاج تركيز كبير لأن اللاعب لازم يقرر في كل دور إيه القطعة اللي يحتفظ بيها؟ وإيه القطعة اللي يرميها؟ وإيه اللي ممكن يحتاجه بعد كده؟

أهم التشكيلات في الماهجونج

تشاو.. تسلسل من 3 قطع.. التشاو عبارة عن 3 أرقام متتالية من نفس النوع زي 3 و4 و5 من قطع الدوائر لكن فيه قاعدة مهمة وهي إنك تقدر تستخدم القطعة اللي لاعب تاني رماها علشان تعمل تشاو فقط لو القطعة دي جاية من اللاعب اللي موجود على شمالك.

بونج.. 3 قطع متطابقة

البونج بيكون عبارة عن 3 قطع متطابقة تمامًا زي 3 قطع من التنين الأخضر أو 3 قطع من الرقم 7 في الخيزران والفرق هنا إنك تقدر تاخد القطعة اللي اتحدفت من أي لاعب مش شرط اللاعب اللي على شمالك.

كونج.. 4 قطع متطابقة

الكونج عبارة عن 4 قطع متطابقة من نفس النوع ولأن وجود 4 قطع بدل 3 بيأثر على عدد القطع الموجودة مع اللاعب فبعد تكوين الكونج بيتم سحب قطعة بديلة من الجزء الخلفي من الحائط.

الزوج.. عين اليد

آخر جزء أساسي في اليد الفائزة هو الزوج وده عبارة عن قطعتين متطابقتين.. الزوج ده بيكون الجزء اللي بيكمل التشكيلة المطلوبة علشان اللاعب يعلن الفوز.

مين يبدأ اللعبة؟

في بداية الجولة بيتم تحديد اللاعب اللي هيكون دوره الأساسي وبيتسمى الشرق.. بعدها كل لاعب بيبني قدامه جزء من الحائط باستخدام القطع وهي مقلوبة ويتم توزيع القطع على اللاعبين قبل ما تبدأ عملية السحب والرمي.

ومن هنا تبدأ اللعبة الحقيقية وكل لاعب بيحاول يقرأ القطع اللي بتترمي على الطاولة ويستنتج إيه اللي المنافسين ممكن يكونوا بيبنوه.

هل الماهجونج لعبة حظ؟

الحظ له دور بالتأكيد لأنك مش بتتحكم في القطعة اللي هتسحبها لكن الماهجونج مش لعبة حظ فقط.. الجزء الأكبر من المتعة بييجي من قراءة اللعبة والتخطيط واتخاذ القرار لأن نفس القطعة اللي ممكن تكون مفيدة جدًا ليك ممكن تكون هي القطعة اللي المنافس مستنيها علشان يكسب.

علشان كده اللاعب المحترف مش بس بيفكر في إيده لكنه كمان بيراقب القطع اللي منافسيه بيرموها وطريقة لعبهم ورغم إن اللعبة أصلها واحد إلا إن فيه أكتر من 40 نسخة وقاعدة مختلفة للماهجونج حول العالم.

الماهجونج الصيني وهونج كونج.. دي من أقرب النسخ للشكل التقليدي وبتعتمد بشكل أساسي على تكوين التشاو والبونج والكونج والزوج.

وقواعدها بتكون أبسط نسبيًا وعلشان كده بتعتبر مناسبة جدًا للي عايز يبدأ يتعلم اللعبة.. النسخة اليابانية المعروفة باسم رييتشي ماهجونج، أكثر تعقيدًا واستراتيجية.

فيها نظام نقاط مختلف وقواعد خاصة ومن أشهر خصائصها إن اللاعب يقدر يعلن “رييتشي” لما يكون قريب جدًا من الفوز وده بيضيف مستوى كبير من التوتر والتخطيط.

أما النسخة الأمريكية مختلفة بشكل واضح عن النسخ الآسيوية التقليدية.. بتستخدم عادةً 152 قطعة ومن ضمنها 8 قطع جوكر وكمان بيعتمد الفوز على تكوين أشكال محددة موجودة في بطاقة بتتغير كل سنة.

وفيها طقس شهير قبل بداية اللعب اسمه تشارلستون وبيتم خلاله تمرير وتبادل مجموعة من القطع بين اللاعبين.

طب إيه حكاية لعبة الماهجونج الموجودة على الكمبيوتر؟

لو لعبت قبل كده لعبة على الكمبيوتر أو الموبايل فيها قطع ماهجونج وبتشيل قطعتين متشابهتين من على الشاشة فدي مش الماهجونج الأصلية.. اللعبة دي اسمها ماهجونج سوليتير وهي لعبة فردية مبنية على فكرة مطابقة القطع لكنها مختلفة تمامًا عن لعبة الماهجونج الجماعية التقليدية.

ليه الماهجونج لسه مشهورة لحد النهارده؟

سر استمرار شعبية الماهجونج إن اللعبة بتجمع حاجات كتير في نفس الوقت التركيز والذاكرة والحساب وقراءة المنافس واتخاذ القرار.

وكمان اختلاف القواعد من بلد للتانية خلى اللعبة تقدر تتطور وتاخد أشكال مختلفة لكن تفضل الفكرة الأساسية واحدة تجمع القطع الصح قبل منافسيك وتعرف إمتى تتمسك بقطعة وإمتى تتخلص منها.

وفي النهاية الماهجونج مش مجرد لعبة قديمة من الصين لكنها لعبة استراتيجية عاشت لأجيال وقدرت تنتقل من الطاولات التقليدية إلى البطولات والتطبيقات والألعاب الرقمية مع احتفاظها بنفس الفكرة الأساسية اللي يعرف يخطط ويقرأ منافسه كويس هو اللي بيكون أقرب للفوز