هو البريميرليج فعلًا بدأنا نمل منه؟

هو سؤال يمكن من سنتين أو 3 كان هيبان غريب جدًا إزاي حد ممكن يزهق من البريميرليج؟.. دي كانت المسابقة اللي كل أسبوع فيها ماتش كبير وكل موسم فيها نجوم ومدربين وقصص جديدة.. لكن مع بداية موسم 2026-2027 ممكن نفهم ليه جزء من الجمهور وخصوصًا المصريين، بدأ يحس إن حاجة اتغيرت.

الموضوع مش معناه إن الدوري الإنجليزي بقى ضعيف أو فقد مكانته بالعكس الموسم اللي فات أرسنال كسر انتظار 22 سنة وتوج باللقب والمنافسة على المراكز الأوروبية والهبوط كانت قوية جدًا لكن الإحساس اللي بيتكلم عنه ناس كتير هو إن البريميرليج فقد جزء من الشخصيات والنجوم اللي كانوا بيخلوا متابعته ممتعة حتى للي مش مشجع لفريق معين.

بالنسبة للمصريين.. رحيل صلاح وجع أكتر

خلينا نبدأ من أكتر نقطة تهم الجمهور المصري محمد صلاح مشي من ليفربول.. صلاح قضى 9 سنين في إنجلترا وبقى جزء أساسي من هوية البريميرليج نفسه مش مجرد لاعب في ليفربول.. أرقامه منافسته على الهداف مواجهاته مع هالاند ووجوده بشكل مستمر في سباق أفضل لاعبي الدوري كل ده كان بيخلي المصريين عندهم سبب إضافي لمتابعة البطولة.

صلاح أنهى رحلته مع ليفربول بعد 442 مباراة سجل خلالها 257 هدفًا وفاز بالدوري الإنجليزي مرتين ودوري أبطال أوروبا قبل ما ينتقل إلى طرابزون سبور التركي في صيف 2026 وده معناه إن المشجع المصري اللي كان بيستنى ماتش ليفربول كل أسبوع علشان يشوف صلاح فقد جزء أساسي من متعته.

نهاية جيل كامل من النجوم

لكن الحكاية أكبر من صلاح.. إحنا تقريبًا بنشهد نهاية جيل كان شايل الدوري الإنجليزي على كتافه لسنين طويلة.

كيفن دي بروين خرج من مانشستر سيتي وصلاح خرج من ليفربول وقبلهم يورجن كلوب رحل عن ليفربول وبيب جوارديولا نفسه غادر مانشستر سيتي بعد سنوات طويلة جدًا من السيطرة.. يعني فجأة أسماء كانت مرتبطة في دماغنا بالبريميرليج اختفت أو بدأت تختفي واحدة ورا التانية.

والأهم إن الجيل الجديد لسه ماخدش نفس المساحة في قلوب الجماهير.. عندك هالاند طبعًا وهو واحد من أكبر نجوم العالم وعندك ساكا وأوديجارد وفودين ورايس وغيرهم لكن الإحساس إن الدوري كان زمان مليان نجوم سوبر ستار في كل مركز وكل فريق كان أقوى.

ولو بصينا على دكة المدربين هنلاقي إن التغيير كان ضخم جدًا.. يورجن كلوب مشي من ليفربول وبيب جوارديولا مشي من مانشستر سيتي وتشيلسي دخل مرحلة جديدة مع تشابي ألونسو وليفربول بدأ عهد أندوني إيراولا ومانشستر يونايتد عنده مايكل كاريك وتوتنهام مع روبرتو دي زيربي.

والرقم هنا لافت جدًا مع بداية موسم 2026-2027 9 أندية من أصل 20 عندها مدربين جدد وهو مستوى تغيير نادر جدًا في تاريخ المسابقة بينما 11 مدربًا من الموجودين حاليًا قضوا أقل من سنة في مناصبهم يعني حتى الشخصيات اللي كانت بتدي الدوري هويته اختفت.

امتى الفرق ترجع؟

مانشستر يونايتد تحديدًا بقى واحد من أكبر الأسئلة في الدوري.. النادي اللي كان زمان عنوان المنافسة واللي مجرد وجوده في سباق الدوري كان كفيل يعمل موسم كامل من الحكايات لسه بيحاول يرجع لمكانه الطبيعي.

ومع كل موسم بنقول إن يونايتد ممكن يرجع، لكن المنافسة بقت أصعب خصوصًا مع ظهور أرسنال بشكل قوي واستمرار قوة سيتي ووجود فرق زي نيوكاسل وأستون فيلا وغيرها قادرة تنافس على المراكز الكبيرة.

وده خلق إحساس عند جمهور يونايتد نفسه إن الفريق بقاله فترة طويلة بيدور على هويته.

تشيلسي كمان مثال مهم.. النادي أنفق مبالغ ضخمة جدًا خلال السنوات الأخيرة وغيّر شكل الفريق والإدارة والمدربين أكتر من مرة لكن الجمهور لسه مستني اللحظة اللي الفريق يرجع فيها بالشكل اللي عرفناه في عصر هازارد كانتي دروجبا لامبارد وتيري.

دلوقتي تشيلسي عنده مشروع مختلف وشابي ألونسو بدأ مرحلة جديدة لكن بناء فريق جديد محتاج وقت وده معناه إن اسم كبير تاني من أسماء البريميرليج التاريخية مش موجود حاليًا في نفس الصورة اللي اتعودنا عليها.

وتوتنهام كمان قصته غريبة.. الفريق كان جزءًا من المنافسة على المراكز الأولى ووصل لنهائي دوري أبطال أوروبا وكان عنده هاري كين وسون وهيونج مين وغيرهم من النجوم.

لكن بعد رحيل جيل كامل من اللاعبين والمدربين النادي دخل في مرحلة إعادة بناء ومع بداية الموسم الجديد وصل روبرتو دي زيربي لتولي المسؤولية.. فحتى توتنهام اللي كان من الفرق اللي بتضيف نكهة للمنافسة لسه بيدور على شكل جديد.

هل ده معناه إن البريميرليج بقى ممل؟

هنا لازم نفرق بين متعة الدوري ومتعة النجوم.. لو بتقيس الدوري بعدد النجوم والمدربين أصحاب الأسماء الكبيرة آه ممكن تحس إن البريميرليج فقد جزء من بريقه.

لكن لو بتقيسه بالمنافسة فالصورة مختلفة تمامًا.. أرسنال أخيرًا كسر هيمنة سيتي وليفربول وتوج بالدوري لأول مرة من 22 سنة وأنهى الموسم بـ85 نقطة بفارق 7 نقاط عن مانشستر سيتي.

وكمان المنافسة مش بس فوق.. الموسم الماضي شهد صراعًا قويًا على المراكز الأوروبية لدرجة إن الفارق بين المركز السادس والمركز السادس عشر كان 10 نقاط فقط في مرحلة متقدمة من الموسم وفق نقاش جماهيري واسع وقتها.

يعني ممكن جدًا يكون البريميرليج أكتر تنافسية لكن أقل بريقًا بالنسبة لبعض المشاهدين.

البريميرليج داخل على عصر جديد

يمكن اللي إحنا شايفينه مش ملل بقدر ما هو نهاية عصر وبداية عصر جديد.. عصر صلاح ودي بروين وكلوب وجوارديولا انتهى أو على الأقل معظم أبطاله مش موجودين بنفس الصورة.

دلوقتي عندنا أرسنال بقيادة أرتيتا كبطل جديد وسيتي من غير جوارديولا وليفربول من غير صلاح وكلوب ويونايتد بيحاول يرجع وتشيلسي بيبني مشروع جديد وتوتنهام بيبدأ مرحلة مختلفة