القصة الكاملة لحادثة الطفل ريان ومحاولات السلطات المغربية انقاذه من البئر

انتشر على السوشيال ميديا في الساعات الأخيرة فيديوهات لمجهودات السلطات المغربية في إنقاذ الطفل ريان اللي وقع في بئر في قرية أجران بإقليم شفشاون في شمال المغرب، الطفل ريان وقع في البئر فى غفلة من والده ووالدته وماكنوش قادرين يلاقوا مكانه غير إمبارح.

ريان طفل عمره 5 سنين وقع في بئر عمقه62 متر أول إمبارح الثلاثاء 1 فبراير 2022 حوالي الساعة 5 وقاعد من غير أكل أو شرب من وقت ما وقع يعني حوالي أكتر من يوم لحد دلوقتي في حين كمان نقص الأكسجين في البئر بيواجه ريان الاختناق لكن لسه محاولات السلطات المغربية مستمرة عشان يحاولوا يطلعوه.

واظهرت الفيديوهات المنتشرة إن فيه عشرات من العاملين في فرق الانقاذ عند البئر اللي وقع فيه ريان وإن السلطات المغربية بتستعين بأدوات متطورة زي كاميرا دخلوها البئر بترصد على شاشة قريبة من المكان حالة الطفل عشان يحاولوا ينتشلوا ريان، وده لإن المحاولات اللي قبل كده وعملها متطوعين عشان ينشلوه فشلت بسبب إن البئر ضيق جدا.

ولكن الصعوبة اللي بيواجها فريق الإنقاذ هي ضيق البئر وبتظهر الفيديوهات كمان إن صعب جدا ينزل حد من فريق الدفاع المدني على حبل مشدود، بس عمليات الإنقاذ داخل البئر لسه مستمرة لإن السلطات المغربية بدأت تستعين بجرافة كبيرة بدأت في حفر المحيط اللي جنب البئر عشان يوصلوا للطفل ومحاولة إنقاذه بشكل أفقي بدل العمودي.

وربط فريق الإنقاذ تليفون في حبل ونزلوه لقاع البئر وظهر في الفيديو إن الطفل بخير وقاعد بشكل سليم بالرغم إن الحفرة ضيقة جدا واتطوع واحد من شباب المنطقة إنه ينزل البئر بس ماقدرش يوصل غير لمسافة 20 متر بس وده بسبب ضيق المكان وصعوبة التنفس.

وقالت بعض المصادر إن الحماية المدنية زودت ريان بالأكسجين والمياه بعد ما اتأكدت إنه لسه عايش وموجود على عمق 35 متر مش 60 متر، وقالت كمان إنه الطفل ريان بيعاني من بعض الجروح الطفيفة في رأسه، وإن إمبارح الأربعاء 2 فبراير في حوالي الساعة 6 مساءًا كانت السلطات المغربية قدامها 10 أمتار عشان توصل للطفل في البئر.

واتصدر هاشتاج انقذوا ريان مواقع التواصل الاجتماعي لدعم الطفل وده بعد ما بلغ والد الطفل والأهالي السلطات عشان تنقذه، وفي حين استمرار عمليات الحفر أهل الطفل وأهالي القرية واقفين جنب الحفر وبيدعوا عشان ريان يطلع بخير سليم ووالده بيحاول يطمنه.