سلسلة حكايات يومية عادية حكاية 71: “ثم تنهدت وقالت: أنا عارفة أنا بعمل إيه كويس”
من صغري أهلي بيقولوا عليا عندية ولازم اللي أعوزه يحصل زي ما هو في مزاجي بالظبط.. بس مكنتش بحسبها إنه تنشيف دماغ أو عِند.. الموضوع بالنسبة لي إني حابة حاجة وشايفة إني استحقها وبعمل اللي عليا عشان تجيلي فماينفعش أقبل بأي حاجة أقل منها.. وطبعًا الكلام ده لما بتشوف نتيجته وتجيلك الحاجة اللي نفسك فيها بتؤمن بيه أكتر وثقتك بتزيد.. بس هل هتفضل بتؤمن بده حتى لو حلمك اتأخر؟
لما دخلت كلية إعلام جامعة القاهرة_ واللي بالمناسبة كنت مخططة لدخولها من وأنا في ثانوي_ بدأت أخد كورسات وورش في مجالات مختلفة عشان أجمع معلومات تأهلني أنزل تدريبات وبعدها أقدر اشتغل في الأماكن اللي حطاها في الـ Bucket list بتاعتي
حابة اعترف إن الـ Bucket list بتاعتي كان فيها شركات ميديا وكذا إيجينسي كبيرة.. طموحات بعيدة عن الواقع شوية بس اللي كان في دماغي إن أكيد كل مكان هروحه هيمهد للأماكن الكبيرة دي فبالنسبة لي مكنتش منفصلة عن الواقع.. أنا ماشية على خطة
وفعلًا بدأت أنزل تدريبات ومع كل مكان روحته كنت بتعلم منه حاجات كانت أول سلمة إني ابدأ أقدم على شغل.. وبدأت اتشاف شوية حتى وسط دايرة دكاترة الجامعة اللي بيشتغلوا في شركات من اللي عايزة اشتغل فيها.. ومع الوقت اتبعتلي عروض من شركات لسه بتبدأ.. وكنت شايفة إنه طالما عايزة اشتغل في أماكن كبيرة فأنا محتاجة أكتسب خبرة كبيرة مش هلاقيها مع شركة لسه بتبتدي.. فكنت برفضهم وصحابي كانوا يقولولي بتتبطري على النعمة ليه وهو حد يطول يتقبل في شغل وهو في الجامعة.. بس كنت بقولهم “أنا عارفة أنا بعمل إيه كويس”.. وكان كل ما يعدي الوقت وماتقبلش في الشركات اللي حطاها في دماغي ماكذبش عليك كنت بشكك في نفسي وكنت بحس بـ “لتكوني مش عارفة انتي بتعملي إيه”.. بس ده مامنعنيش من تكملة السعي وإني أعمل اللي عليا وكله على الله في الآخر
وفي مرة صحيت من النوم على أوفر من شركة ميديا من الشركات اللي موجودين في الـ Bucket list بتاعتي وكل حاجة كانت مناسبة ليا حتى مع مواعيد امتحاناتي ومذاكرتي.. ودلوقتي أنا بشتغل في تاني مكان موجود على الليستة بتاعتي.. وبقعد مع نفسي وأسأل كنت هبقى فين وبعمل إيه لو كنت سمعت كلام اللي حواليا ورضيت بأي حاجة وطنشت للحاجة اللي بحلم بيها وشايفة إني استحقها؟
في الآخر يعني انت اللي بتحدد اللي تستحقه مش أي حد تاني.. وماتقبلش بالقليل عشان الكتير اللي تستحقه لسه مجالكش.. كل حاجة مكتوبالك تيجي في وقتها.. وعطلة الوصول لحلمك ماتخلهاش تشكك في قيمتك أو اللي انت تستحقه
