لو بتحب فيلم The Equalizer.. قائمة بأفلام عن الانتقام
الأفلام اللي بتدور قصصها عن الانتقام بتكون من نوعية الأفلام المفضلة عند ناس كتير، فيلم زي The Equalizer، اللي بيتكلم عن “روبرت مكال” عسكري أمريكي متقاعد، بيزيف موته عشان يعيش حياة جديدة وهادية ولكن لما بيشوف بنت صغيرة بتتعرض لعنف من قبل عصابة روسية بيقرر ينقذها وينتقم منهم.
ولذلك لو بتحب الأفلام اللي قصصها بتدور عن الانتقام وتحقيق العدالة، فهنقولك على 7 أفلام هتحب تتفرج عليهم:
1- فيلم “The Equalizer 2”:
بعد فرهدة كتير في الجزء الأول شافها شخصية “روبرت مكال” اللي كان قرر يكمل تقاعده ويرتاح، ولكن بتتقتل أعز أصدقائه وزميلته السابقة في الشغل، فبيقرر يكمل رحلته في تحقيق العدالة وإنه يقضي على جميع المسؤولين عن موتها.
2- سلسلة أفلام “John Wick”:
لو لسه ماشوفتهاش.. فأنت فاتك ميكس من أكشن عظيم وقصة قوية وشوية تراكات مزيكا تعليلك الأدرينالين، الجزء الاول بيبدأ مع “كيانو ريفز” واللي بيقوم بشخصية القاتل المتسلسل المتقاعد “جون ويك” اللي بيقرر الانتقام من شخص روسي بعد ما قتل كلبه ولكن بيكتشف إن الموضوع أكبر بكتير!
3- فيلم “Mile 22”:
فريق من ضباط المخابرات الأمريكية بيحاول تهريب ظابط شرطة غامض وعنده معلومات حساسة لخارج إندونيسيا، الفيلم من بطولة “مارك والبيرج” وفي شوية أكشن وخطط تكتيكية لطيفة وطبعا الساوند تراك اللي في الفيلم عظيمة.
4- فيلم “Homefront”:
“جيسون ستاثام” بيقوم بدور “فيل بروكر” ضابط شرطة سابق في مكافحة المخدرات، بيقرر ينتقل لقرية صغيرة عشان يعيش في هدوء مع بنته “مادي” اللي بتدخل في خناقة مع زميلها “تيدي كلوم” ولكن الموضوع بيكبر.
5- فيلم “The November Man”:
“بيرس بروسنان” اللي بيقوم بدور “بيتر ديفرو” وهو عميل سابق للمخابرات الأمريكية CIA بيرجع من تقاعده في مهمة فبيلاقي نفسه في صراع مع تلميذ سابق له ومفاجأت تانية.
6- سلسلة أفلام “Taken”:
“ليام نيسون” بيقوم بدور “بريان ميلز” عميل سابق للمخابرات الأمريكية ومطلق وعنده بنته “كيم” اللي عايشة مع أمها، كيم قدرت تقنع والدها “بريان” عشان تسافر فرنسا مع صاحبتها وهناك بيتم اختطافها من عصابة فبيقرر “ميلز” يسافر بنفسه لباريس عشان ينقذها.
7- فيلم “Man on Fire”:
وعشان يبقى ختامها مسك، فيلم “Man on Fire” من الأفلام الـ Underrated لـ “دينزل واشنطن” واللي بتدور أحداثه عن “جون كريسي”، وهو عميل سابق للمخابرات الأمريكية بيتم تعيينه حارس شخصي لحماية الطفلة “بيتا راموس” بنت رجل أعمال، وبيتم اختطافها، فبيقرر كريسي الانتقام من خاطفيها.. لو ماشوفتوش فأنت فايتك فيلم جميل ومؤثر جدا.
