إيه سبب صداع رمضان؟ وإزاي تحمي نفسك منه؟

ناس كتير في الأيام الأولى من رمضان بيعانوا من الصداع فترة الصيام وأحيانا بعد الفطار كمان، والصداع بيختلف في شدته وقوته.. تعالوا نعرف إيه سبب الصداع ده وإزاي ممكن نحمي نفسنا منه أو نقلل أعراضه. 

أغلب أسباب الصداع الشائعة حسب موقع شفاء:

1- نقص نسبة السكر في الدم:

فيه دراسة انتشرت قالت إن الصداع الخفيف لـ المتوسط، واللي بيستمر من ساعة لـ ساعتين، واللي بيكون في فترة بعد الظهر وبليل في رمضان، بسبب نقص أو انخفاض نسبة السكر في الدم، بسبب التغيرات اللي بتحصل في نسبة الجلوكوز في الدم.

2- الحاجة لـ الكافيين:

في دراسة اتنشرت في National Library of Medicine، اتربط الصداع بالحاجة لـ الكافيين، عشان الصداع بيحصل غالبا بشكل عام بعد 18 ساعة من آخر حصول على الكافيين من الشاي والقهوة، والخبراء بيعتبروا إن ده من الأسباب الرئيسية للصداع في الأيام الاولى من رمضان بالنسبة للأشخاص اللي متعودين عليها.

3- الجفاف:

من الأسباب التانية لصداع الصيام، عدم حصول الشخص على سوائل لترطيب الجسم خلال فترة الصيام، وده بيعمل أحيانا إجهاد وصداع، ولو الشخص معوضش جسمه بسوائل كتير بعد الفطار، ممكن يحصله جفاف.

4- تغيير مواعيد الوجبات:

تغيير مواعيد الوجبات ممكن يعمل صداع، لأن الفترات الزمنية الطويلة بين الوجبات ممكن تعمل صداع نصفي، أو تزود الصداع بسبب انخفاض مستويات السكر في الدم.

5- وقف التدخين:

النقص في نسبة النيكوتين في الدم، بيعمل صداع للأشخاص المدخنين فترة الصيام.

6- تغير مواعيد النوم: 

نقص عدد ساعات النوم وتغييرها والاضطراب في نظام النوم بشكل عام في رمضان ممكن يعمل صداع، وقت الصيام وبعد الفطار بسبب اختلاف الساعة البيولوجية للإنسان.

طب إزاي ممكن تحمي نفسك من صداع الصيام؟

  • حاول تقلل استهلاك الكافيين والتدخين بعد الفطار
  • حاول تنظم مواعيد نومك 
  • ماتفوتش وجبة السحور
  • اشرب كميات كبيرة من الماية والسوائل طول فترة الفطار
  • لمحبي القهوة، اشرب فنجان قهوة كبير بعد الفطار

Related Articles

Back to top button