موضوع مايهمكش: حقايق ماتعرفهاش عن الهوت شوكليت أو الكاكاو

يوم 31 يناير هو يوم الـ Hot Chocolate وبالمناسبة دي جمعنالك مجموعة من الحقايق والمعلومات اللي ممكن تكون مش عارفها عن مشروب الكاكاو أو الهوت تشوكليت طبقا لموقع “Mental Floss” و “Times Food”:

1- تاريخ مشروب الشيكولاتة بيرجع لآلاف السنين، وكان بيتم استهلاك الشيكولاتة في شكل سائل. المؤرخين بينسبوا المشروب لحضارة أولميك في جنوب المكسيك باعتبارهم أول ناس حمصوا الفاكهة من شجرة الكاكاو وطحنوها وخلطوها بالمياه ومكونات تانية.

2- الهوت تشوكليت مش دايما كان سخن ومسكر. فيه بعض الحضارات القديمة كانت بتشربه بشكل حادق أو مر، وكانوا بيضيفوله فلفل حار ومياه وذرة محمصة، وبعد كده بدأ الناس يضيفوله القرفة والسكر والتوابل اللي تحليه.

3- فيه بعض الاعتقادات إن الهوت تشوكليت ليها خصائص طبية زي إنها مليانة مضادات أكسدة وفيها كافيين، وقديما كان المشروب واخد سمعة إنه ممكن يكون منشط جنسي.

4- مشروب الكاكاو كان مثار جدل ديني كبير خلال القرن الـ 16 و17.. وخصوصا بعد ما بدأ يتم استهلاكه بشكل كبير وعلى نطاق واسع.. وظهر نقاش “هل هو مشروب ولا أكل؟”.. وبالتالي هل ممكن الكاثوليك في أوروبا يشربوه وقت الصيام الديني، وبعد كده تقرر إنه صالح للشرب عادي والاستهلاك وقت الصيام، وحصل صدام مع رجال دين تانيين بيمنعوا شرب الشيكولاتة أو الكاكاو وقت الصيام.

5- فيه فرق بين الهوت تشوكليت والكاكاو عند بعض الناس.. في أمريكا مثلا لفظ “هوت تشوكليت” بيتقال على أي مشروب سخن مصنوع من مكونات الشيكولاتة. لكن اللي بيشربه أغلب الناس في العادي هو الكاكاو السخن.

6- مشروب الشيكولاتة الأصلي -اللي مابيكونش فيه معالجات كتير أو حشو كتير أو مكونات ومواد كتير- بيكون أفيد، كل ما كان المشروب فيه شيكولاتة بس ومافيهوش مواد مصنعة بيكون أفضل، لأنه بيكون فيه مضادات أكسدة اللي ليها فوايد كتير، كمان الشيكولاتة بيكون فيها ثيوبرومين اللي بتساعد على تحسين المزاج. وأحيانا إضافة حليب للهوت تشوكليت بيزود من فوايدها.

7- مع زيادة مبيعات مشروب الشيكولاتة حول العالم، بتختلف طريقة تقديمه من بلد للتانية ومن مطعم للتاني. فيه مطاعم بتعمله بتوابل مختلفة، ومطاعم بتقدمه بالعسل والجنزبيل، ومطاعم بتعمله Spicy، وأشكال تانية كتير.

Related Articles

Back to top button