10 ستات مصرية حققوا إنجازات رياضية مهمة

ناس كتير لحد دلوقتي بيبقوا شايفين إن الرياضة حكر على الرجالة، وخصوصا الرياضات القتالية مثلا، ومشوار الست في الرياضة بيكون أغلب الوقت أصعب بكتير من الراجل، وده بيرجع لعوامل اجتماعية واقتصادية ونفسية وغيرها، لكن ده مامنعش ستات مصريات كتير إنهم يكسروا القاعدة، وينجحوا في رياضات مختلفة، ويحققوا إنجازات تاريخية، وينافسوا عالميا.

في الموضوع ده جمعنالكم 10 ستات مصرية عملوا تأثير كبير وحققوا إنجازات كبيرة ومهمة في رياضات مختلفة، وكل الأمثلة دي على سبيل المثال مش الحصر.

 

فريال أشرف

فريال جابت ميدالية ذهبية في أولمبياد طوكيو ودي كانت أول ميدالية أولمبية ذهبية نسائية فى تاريخ مصر من ساعة ما بدأت لاعبات مصر المشاركة الأولمبية في ميونخ سنة 1972.

بسنت حميدة 

بسنت جابت ميداليتين ذهبيتين في بطولة التشيك الدولية لألعاب القوى، وعملت نفس الإنجاز في بطولة دورة ألعاب البحر المتوسط، بفوزها بذهبية 100 متر عدو، وفوزها بالميدالية الذهبية الثانية بسباق 200 متر عدو.

 نعمة سعيد  

جابت 3 ميداليات (ذهبيتين وفضية)، في بطولة العالم لرفع الأثقال للشباب اللي حصلت في اليونان، وكررت الإنجاز في دورة ألعاب البحر المتوسط، وفازت بذهبيتين الخطف والكلين بمنافسات وزن 71 كجم.

نور الشربيني

نجمة الاسكواش، اللي بتتصنف إنها “أعظم لاعبة اسكواش”، المصنفة الأولى على مستوى العالم، حققت لقب بطولة إنجلترا المفتوحة للاسكواش تحت سن 13 سنة 2009، كمان هي أول، وأصغر لاعبة نجحت في التأهل لنهائي بطولة بريطانيا المفتوحة سنة 2012.

فريدة عثمان

فازت بأول ميدالية في تاريخها الرياضي في بطولة العالم للناشئين في السباحة، وأول سباحة مصرية تحمل رقم قياسي في رياضة السباحة، وكمان حصولها على لقب أفضل رياضية في إفريقيا لسنة 2017. وفي ظل وباء كورونا، سنة 2020، فازت بالميدالية الذهبية لسباق 50 متر حرة، في بطولة أمريكا المفتوحة للسباحة، في إنجاز تاريخي للرياضة المصرية.

هداية ملاك

بطلة التايكوندو اللي تعتبر أول مصرية وعربية وأفريقية تحصل على ميداليتين أولمبيتين متتاليتين في رياضة التايكوندو، فازت بالميدالية البرونزية في دورة الألعاب الأولمبية “ريو دي جانيرو”في 2016، وبرونزية تانية في أولمبيات طوكيو 2020.

 

دينا مشرف

 

لاعبة التنس، اللي حصلت على جوايز كتير في سن صغير، منها بطولة إفريقيا سنة 2011، وحصولها على اللقب الإفريقي لـ7 سنين متتالية من 2014 لـ 2020، وكمان حصلت على ذهبية بطولة إفريقيا لتنس الطاولة 2022، واتصنفت ضمن 29 عالميًا في تنس الطاولة.

 

سارة عصام

كانت لاعبة كرة قدم في نادي وادي دجلة،  أول لاعبة مصرية وعربية محترفة في الدوري الإنجليزي، ونجحت في الانضمام بشكل رسمي لصفوف الفريق الأول لكرة القدم في نادي ستوك سيتي الإنجليزي لمدة 5 مواسم، وبعد كده راحت لنادي ألباسيتي الإسباني

منال رستم

أول سيدة مصرية تحترف تسلق الجبال. شاركت في ماراثونات حول العالم زي دبي، الكويت، لندن، ومدريد. تسلقت جبال كتير زي جبل كينيا والهملايا، وفي 2016 كانت أول ست مصرية في سباق سور الصين العظيم، وتعتبر هي أول ست مصرية تسلقت قمة جبل ايفرست. 

 

رضوى الغمري

أول بنت مصرية عربية، تحترف رياضة القفز بالمظلات، عملت 2000 قفزة من ارتفاع وصل لـ 16 ألف قدم، وبقت أول مصرية عربية معاها شهادة تدريب “التاندوم ماستر” لقفز الهواة غير المدربين بمظلة واحدة مع مدرب.