موضوع مايهمكش: 10 حاجات ماتعرفهاش عن الـ”Bubble Wrap” أو ورق التغليف اللي بيطرقع

أكيد في يوم اشتريت حاجة ملفوفة بورق التغليف اللي فيه فقعات ده وكانت بالنسبة لك متعة من متع الحياة وأنت طفل إنك تلاقي الورق ده في البيت عشان تستخبى وتفضل تطرقعه لوحدك على جنب، بس برضه بعد ما كبرت وبقيت تشتري الحاجة بنفسك بقيت تخبي الورق عشان تطرقعه لوحدك من غير ما حد يقولك هات حته أطرقع بيها.

يوم 31 يناير 2021 العالم بيحتفل بيوم مهم جدا في حياتنا وهو يوم تقدير ورق التغليف اللي بيطرقع.. عشان المناسبة دي قررنا نقولك شوية معلومات ماتعرفهاش عن ورق التغليف اللي بيطرقع حسب ما قال موقع “transpack”، وموقع “mental floss”:

1- السبب الحقيقي ورا اختراع الـ”Bubble Wrap” ماكنش التغليف:

لما اخترع ” Alfred Fielding” و”Marc Chavannes” ورق التغليف ده سنة 1957 سوقوله إنه خلفية للزخرفة ولكن ماكنش فيه ناس كتير بتشتريه ومامشيش كويس مع المستهلكين، وبعد كده قرروا إنهم يبعوه على أساس إنه بيستخدم في عزل صوب الزراعة -لسه لحد دلوقتي فيه ناس بتستخدمه في عزل الصوب فعلا- لحد ما كانت بتدور شركة IBM عن منتج يحمي الشحنة بتاعها وهي بتتنقل بعد 3 سنين من اختراع نظام معالجة البيانات الجديد عندهم.

2- دقيقة واحدة من طرقعة  الـ”Bubble Wrap” بتساوي 33 دقيقة مساج:

قرر باحثين إنهم يعملوا تجربة يشوفوا فيها قد إيه  الـ”Bubble Wrap” قادر يخفف نسبة التوتر اللي بيحصل للشخص لما بيفرقع الفقعات دي، واتضح إن دقيقة واحدة ليها نفس تأثير التدليك أو المساج لمدة 33 دقيقة، فحاول لما تبقى متضايق أو متوتر تشتري  الـ”Bubble Wrap” عشان تساعدك تتخلص من التوتر العصبي.

3- فيه رقم قياسي عالمي شخص حققه في فرقعة  الـ”Bubble Wrap”:

فيه رقم قياسي لكل حاجة في العالم تقريبا بما فيهم  الـ”Bubble Wrap”، في 19 سبتمبر 2015 فيه 2681 شخص قعدوا فرقعوا  الـ”Bubble Wrap” مع بعض، وكسروا الرقم القياسي اللي قبله اللي كان 942 شخص في وقت واحد، وأكيد في المستقبل فيه مجموعة أشخاص أكبر هيكسروا الرقم القياسي ده.

4- كل سنة بيتم إنتاج حوالي “240.000” ميل من الـ”Bubble Wrap”:

واحدة من الشركات الرائدة المصنعة للـ “Bubble Wrap” في بريطانيا بتنتج “Bubble Wrap” بكمية تكفي لف كوكب الأرض 10 مرات، وده دليل على شعبية استخدام المنتج في التغليف بما إن لحد دلوقتي لسه ماحدش لف كوكب الأرض به.

5- فيه استخدامات كتير  للـ “Bubble Wrap”:

استخداما الـ “Bubble Wrap” كتير مش بس في التغليف، ممكن يبقى فيه استخدامات ماسمعتش عنها زي:

1- قبل ما تخيم أو تعمل Camping ممكن تفرش ورق “Bubble Wrap” على الأرض اللي هتنام عليها، هتخليك نايم مرتاح أكتر على الأرض، وهتحميك من رطوبة الأرض كمان 

2- ممكن تستخدمها كواقي للأنابيب خصوصا في فصل الشتاء عشان تحميها من الانفجار أو التجمد كمان 

3- ممكن تستخدمها كمان في حماية عربيتك في الليالي اللي هتمطر تلج فيها

4- حماية الأثاث خصوصا في النقل أو أنت بتعزل ممكن تخطي بيها الأثاث عشان تحمي الجوانب بتاعته

5- في عزل النباتات كمان، خصوصا إن النباتات بتعاني في فصل الشتاء من التلج وتجمد التربة فممكن تتلف في “Bubble Wrap” عشان تفضل دافية ونضيفة 

6- “Bubble Wrap” ماركة تجارية:

“Bubble Wrap” ماركة تجارية زيها زي Xerox و Kleenex و Coke  وهي منتج مسجل لشركة “Sealed Air” وماينفعش أي شركة منافسة تستخدم نفس الأسم.

7- “Bubble Wrap” ممكن تنقذ حياتك:

في سنة 2011 “Rhett Allain” المساهم في “WIRED” عمل دراسة وقال إن الشخص بيحتاج لـ 39 طبقة من الـ”Bubble Warp” عشان تنقذ حياته لما يقع من الدور السادس.

8- فيه عروسة لبست فستان من الـ “Bubble Wrap”:

فيه بنت اسمها “راشيل روبنسون” من انجلترا اختارت إنها تلبس فستان مصنوع من الـ “Bubble Wrap” في مايو 2010، وتم صناعة الفستان في المدرسة اللي بتدرس فيها راشيل لعرض أزياء المواد القابلة لإعادة التدوير، وكان طول الفستان اللي لبسته 3 أقدام، لكن في حفلة تانية لفرحها لبست فستان عادي تقليدي.

9- في النرويج بيستخدموا الـ “Bubble Wrap” عشان ينقلوا المرضى:

لما بينقلوا المرضى في النرويج بيلفوهم في “Bubble Wrap” عشان يمنعوا إن درجة حرارة جسمهم تنخفض في الجو الساقعة، وفي 2009 اتعملت دراسة أثبتت إن الـ “Bubble Wrap” بيساعد على الاحتفاظ بالحرارة بنسبة 69% زي البطانيات.

10- فيه “Bubble Wrap” اتعرضت في متحف الفن الحديث:

في سنة 2004 شركة “Sealed Air” اتبرعت بمساحة 12*12 بوصة مربعة من الـ “Bubble Wrap” بتصميم خاص بيهم، وتم عرضه من ضمن مجموعة ” Humble Masterpieces ” واللي بتتضمن عيدان أكل وضمدات جروح.

Related Articles

Back to top button