موضوع مايهمكش: 9 حقايق ماتعرفهاش عن مشابك الورق

أكيد لو قلبت في درج مكتب عندك أو في المكتب مثلا بتاع الشغل هتلاقي مشابك الورق مستخبية في الأدراج دي والحقيقة إن ممكن نكون بطلنا نستخدمها كتير بعد ما قل استخدام الورقة والقلم بسبب التكنولوجيا بس هتفضل برضه بتحب تشوفها على مكتبك وتحتفظ بيها.

وبمناسبة إن يوم 29 مايو هو يوم مشابك الورق.. خلينا نقولك 10 معلومات عنها حسب ما قال موقع “tenfactsabout”:

1- مشبك الورق هو عبارة عن أسلاك صلبة بيتم تنيها على شكل حلقتين كاملين تقريبا، وبيتم استخدامه عن طريق إن تدخل الورق بين الحلقات وتثبتها مع بعض.

2- تصميم مشابك الورق اللي موجود حاليًا لحد دلوقتي مالوش براءة اختراع ومش معروف مين اللي اخترعه لكن كان فيه مشابك ورق ليها نفس التصميم تم إنتاجها في بريطانيا في السبعينات وعملتها شركة بتنتج أحجار كريمة وده بيخلينا نخمن إن ممكن يبقى تم اختراعها هناك،  واتقدمت لأمريكا سنة 1982 وبقى منتشر جدا في العالم كله والناس بقت تستخدمه من بعدها.

3- براءة الاختراع الأولى لتصميم مشابك الورق اللي تقدر تجمع ورق كتير مع بعض كانت لـ صامويل بـ فاي في أمريكا سنة 1867 والهدف من اختراعه كان عشان يمسك ورق بقماش ولكن كان مختلف تمامًا عن مشبك الورق اللي بيتم استخدامه دلوقتي عشان كده برضه مش هو مخترع مشبك الورق.

4- كان فيه اعتقاد إن مشابك الورق تم اختراعها في النرويج.. ومشبك الورق العملاق اللي موجود قدام كلية إدارة الأعمال في أوسلو، اللي صممه كان اسمه “يوهان فالر” سنة 1899 وتم تسجيل براءة الاختراع في ألمانيا وأمريكا سنة 1901.

5- الكلمة السويدية لمشبك الورق هي “gem” ومعناها جوهرة.

6- في الحرب العالمية التانية كان ممكن الشخص اللي يلبس مشبك ورق يحصله مشكلة كبيرة لإن الأشخاص اللي كانوا عايشين في البلاد اللي واقعة تحت الاحتلال الألماني بيتم منعهم إنهم يلبسوا أي شارات أو دبابيس أو أي حاجة بترمز للوطنية لإن تم استخدام مشابك الورق كرمز للوطنية وقتها لإنه بيستخدم في ربط الحاجات مع بعض، وتم حظر لبسه لإن كان فيه اعتقاد كمان إنه اختراع نرويجي وده شئ بيدل على الفخر القومي.

7- مشبك الورق بيتم استخدامه في الايميلات إن فيه “فايل” أو مرفق مع الإيميل.

8- كان فيه شخصية في “Microsoft Office” اسمها “Clippy” عشان تساعد الشخص وظهرت أول مرة في ” Office 97 ” وآخر ظهور له كان في “Office 2003” وكان بيظهر لما تقعد فترة ماتكتبش أو ماستخدمش الشاشة.

9- فيه شخص اسمه “كايل ماكدونالد” قدر يبدل مشبك ورق أحمر ببيت وده عن طريق صفقات على الإنترنت وبدأ إنه يبدل المشبك الورق بقلم بعد كده بمقبض باب وبعد كده شواية لحد ما قدر يكمل صفقاته وخد مقابل مشبك الورق الأحمر بيت في بلد اسمها ” كيبلينج” في كندا