نجوم اعتزلوا الكورة في آخر 10 سنين ما بين المعروفين والمغمورين
نجوم كتير اعتزلوا في آخر عشر سنين وآخرهم كان خلال الأيام القليلة اللي فاتت على رأسهم البرازيلي أوسكار ولاعب أرسنال السابق والقائد آرون رامسي اللي اعتزل في سن 35 بعد مسيرة كبيرة مليانة إنجازات.. اعتزالهم سبب صدمة لجمهور الكرة واللي يلفت النظر إن أسباب الاعتزال مش بس السن لكن كمان الإصابات المشاكل الصحية الضغوط النفسية وفقدان الشغف وأحيانًا قرار شخصي بالاعتزال في القمة وده اللي بيخلّي كل حالة ليها ظروفها المختلفة.
جيل اعتزل في القمة
في الفترة الأخيرة ظهر اتجاه جديد بين بعض النجوم وهو إنهم يختاروا التوقيت المثالي للاعتزال بدل ما يستنوا تراجع مستواهم أبرز مثال على ده هو توني كروس اللي فاجأ العالم بقراره الاعتزال بعد تحقيقه دوري أبطال أوروبا وهو لسه بيقدم أداء عالي جدًا وده كان قرار نابع من رغبته إنه ينهي مسيرته وهو في أفضل حالاته نفس الفكرة ظهرت مع زلاتان إبراهيموفيتش اللي رغم استمراره لسن متأخر قرر التوقف بعد ما الإصابات بدأت تأثر عليه،لكنه فضل يخرج بصورة البطل اللي قادر ينافس مش لاعب بيكمل وخلاص.
الإصابات… العدو الأول
الإصابات تفضل هي السبب الأبرز في اعتزال عدد كبير من النجوم خلال آخر عشر سنين لأنها ببساطة بتمنع اللاعب من الاستمرار بنفس المستوى حالة سيرخيو أجويرو كانت من أشهر الحالات لما اضطر يعتزل فجأة بعد اكتشاف مشكلة في القلب أثناء اللعب وده خلاه يوقف فورًا حفاظًا على حياته.. نفس السيناريو تكرر مع رافاييل فاران اللي عانى من مشاكل مزمنة في الركبة خلت استمراره صعب وكمان آرين روبن اللي كانت الإصابات العضلية جزء من مسيرته لحد ما قرر التوقف وفي نفس السياق، جاء اعتزال أوسكار بعد أزمة صحية مفاجئة ليأكد إن الإصابات والمشاكل البدنية تظل العدو الأول لأي لاعب مهما كان مستواه.
مشاكل صحية خطيرة
بعيدًا عن الإصابات التقليدية فيه حالات كانت أخطر بكتير لأنها مرتبطة بصحة اللاعب بشكل مباشر زي حالة إينوك مويبو لاعب برايتون اللي اضطر يعتزل وهو لسه صغير جدًا في عمر 22 سنة بعد اكتشاف مرض قلبي وراثي ممكن يهدد حياته لو استمر في اللعب.
ونفس الأمر مع أوسكار اللي أعلن اعتزاله بسبب أزمة قلبية وده النوع من الاعتزال اللي بيكون صادم لأن اللاعب بيبقى لسه قادر يقدم كتير لكن سلامته بتكون الأولوية وده بيغيّر شكل مسيرته بالكامل في لحظة واحدة.
الضغوط النفسية
مش كل الاعتزالات سببها بدني لأن العامل النفسي بيلعب دور كبير جدًا في حياة اللاعب قصة أدريانو تفضل واحدة من أبرز الأمثلة لما فقد شغفه بالكورة بعد وفاة والده وده انعكس بشكل واضح على مستواه لحد ما اختار الابتعاد كمان جاريث بيل قرر الاعتزال بعد ما فقد الحافز تدريجيًا وسط ضغوط إعلامية كبيرة ونفس الشيء بالنسبة لـ” مسعود أوزيل.. وإدين هازارد” اللي تراجع مستواهم مع الوقت وفقدوا الإحساس بالمتعة في اللعب فكان القرار الأقرب هو إنهاء المشوار بدل الاستمرار بشكل أقل من صورتهم اللي اتعرفوا بيها.
الاعتزال الطبيعي
رغم كل الأسباب الحديثة يظل الاعتزال الطبيعي بسبب السن موجود وده اللي شفناه مع لاعيبة زي فرانك ريبيري وسيسك فابريجاس اللي قدموا مسيرات طويلة ومليانة إنجازات ووصلوا لمرحلة صعب فيها الاستمرار بنفس النسق وكمان آرون رامسي اللي قرر يعتزل في سن 35 بعد مشوار كبير مع أرسنال وأندية تانية وده نموذج للاعب أنهى مسيرته في توقيت منطقي بعد ما قدم كل اللي عنده.
