نجوم عاشوا المجد.. وانتهت قصتهم خارج الأضواء
قصة ماتيا كيزمان لاعب تشيلسي السابق من القصص اللي اتقال فيها كلام كتير جدًا ومش كله دقيق خصوصًا حكاية إنه بقى “مشرد”.. الحقيقة إن الموضوع تم تداوله بشكل جامد في الإعلام الغربي والسوشيال ميديا لكن لما ترجع للمصادر الأصلية هتلاقي الصورة مختلفة شوية.
كيزمان بعد ما اعتزل قرر يبعد خالص عن الأضواء وده خلا ناس كتير تفتكر إنه خسر كل فلوسه أو حياته باظت لكن هو بنفسه طلع في كذا حوار مع صحف صربية وأوروبية وقال إنه اختار يعيش حياة بسيطة جدًا وبعيد عن الرفاهية اللي كان فيها وهو لاعب.. والراجل كان نجم كبير ولعب في أندية زي تشيلسي وبي إس في آيندهوفن وكان عايش حياة مترفة لكنه بعد الاعتزال حب يغير ده تمامًا ويركز على حياته الروحية والدينية.
الإعلام بقى خصوصًا صحف التابلويد خدت فكرة إنه “اختفى” وطلعتها لمرحلة “بقى homeless” وده مش دقيق خالص.. مفيش مصدر موثوق أكد إنه نام في الشارع أو وصل لمرحلة التشرد الحقيقي.. وهو بس اختار يعيش ببساطة وده فرق كبير جدًا يعني اللاعب مش ضحية انهيار مالي زي ما اتقال هو واخد قرار.
لكن في نفس الوقت فيه لاعيبة تانية قصتها كانت أصعب بكتير وبعضهم وقع فعلًا في أزمات مالية ونفسية كبيرة.. واحد من أشهر الأمثلة هو بول جاسكوين أسطورة إنجلترا.. جازا كان نجم تقيل جدًا لكن بعد الاعتزال دخل في دوامة إدمان كحول ومخدرات وخسر جزء كبير من فلوسه.. وفي فترات معينة كان وضعه صعب جدًا وكان بيعتمد على دعم ناس حواليه والصحافة الإنجليزية كانت بتنشر صوره وهو في حالات مش مستقرة خالص وده خلاه مثال واضح لانهيار نجم كبير بعد المجد.
كمان رويستون درينثي لاعب ريال مدريد السابق.. درينثي بنفسه اعترف في مقابلات مع BBC إنه أعلن إفلاسه بعد ما خسر ملايين في استثمارات فاشلة و قال إنه كان بيصرف بشكل كبير جدًا ومن غير حساب وده خلاه فجأة يلاقي نفسه في أزمة مالية حقيقية.
وفي مثال تاني مهم وهو ديفيد جيمس حارس إنجلترا السابق رغم إنه كسب ملايين خلال مسيرته لكنه أعلن إفلاسه سنة 2014 واضطر يبيع ممتلكاته وحتى حاجاته الشخصية اتباعت في مزادات وده بيوضح إن المشكلة مش في إنك تكسب كام لكن في إنك تدير الفلوس إزاي.
ولو خرجنا شوية بره الكورة هنلاقي نفس السيناريو بيتكرر زي مايك تايسون واحد من أعظم الملاكمين في التاريخ.. تايسون كسب ثروات ضخمة جدًا لكنه أعلن إفلاسه سنة 2003 بسبب ديون وصرف مبالغ فيه جدًا. .كان بيعيش حياة فيها رفاهية مبالغ فيها لدرجة إنه كان بيشتري حاجات غريبة زي نمور وده في الآخر أدى لانهيار مالي كبير.
وفي كرة السلة.. هنلاقي عندنا ألين إيفرسون نجم فيلادلفيا سفنتي سيكسرز.. إيفرسون كسب مئات الملايين من الدولارات لكن دخل في مشاكل مالية كبيرة بسبب مصاريفه الضخمة وقضايا كتير صحيح ماوصلش للتشرد لكنه كان قريب من أزمة كبيرة جدًا.
القاسم المشترك بين كل القصص دي إن اللاعب وهو بيلعب بيبقى داخل عليه فلوس كتير جدًا وبيعيش على نفس المستوى ده من الصرف لكن فجأة بيعتزل والدخل بيقل أو يختفي ولو مفيش تخطيط، المشاكل بتبدأ تظهر.
وعشان كده قصص زي دي بتتكرر كتير ومش بس في الكورة لكن في كل الرياضات تقريبًا وبتفضل درس مهم لأي لاعب النجاح مش بس في اللي بتكسبه لكن في إزاي تحافظ عليه وتعيش بعده.
