هل يوجد حياة أخرى بعد إجازة العيد؟

كل المناسبات السنة دي جات ورا بعض مرة واحدة في آخر رمضان تحرير سيناء وشم النسيم وعيد العمال والعيد نفسه فعملوا مجموعة إجازات حوالي 10 أيام ورا بعض ده غير إن قبلهم كان فيه إجازة شم النسيم برضه.. وعشان كده بقى ممكن نسمى إجازة العيد “Vacation” أو إجازة طويلة يعني، تقدر تسافر فيها أو تأنتخ من غير لا شغلة ولا مشغلة لمدة طويلة.

الإجازة كده خلصت خلاص في جميع أنحاء الجمهورية وبقى إجباري إن الناس ترجع شغلها أو دراستها أو امتحانتها وتمارس حياتها الطبيعية بعد توقف استمر لمدة 10 أيام، طبعا أكيد لما رجعت لحياتك حسيت إن إيه القرف ده! أنا إيه اللي جابني هنا تاني ما أنا كنت بمارس اللا شيء! أو مش عايزة اشتغل وعايز أروح البيت وأقعد في سريري أو أسافر تاني المكان اللي كنت مبسوط فيه في الإجازة، والموقف يبدو “Summertime sadness” لكن في حقيقة الأمر هو”post-vacation blues” .

عشان تتخلص من الـ “post-vacation blues” أو حزن ما بعد الإجازة خلينا نقولك تعمل إيه عشان ترجع للإيمان إن فيه حياة أخرى بعد العيد عادي:

1- ادي نفسك يومين تستريح فيهم على الأقل:

لو عايز تطول الإجازة وتاخد يومين كده تقعد فيهم في البيت خصوصا لو كنت مسافر، ده ممكن يبان لناس كتير إنه دلع لكن في الحقيقة إن جسمك محتاج يستريح من الهدة اللي اتهدها والخروج والسفر عموما، بس مش معنى كده إن الأنتخة تعجبك أو تقعد فترة طويلة أنت بس بتريح جسمك وبتبدأ تظبط دماغك على حياتك القديمة وبيتك ومكانك العاديين، بس مش لازم تلزم نفسك بأي مجهود ممكن تقعد تتفرج على نتفليكس عادي وتقعد مع أهلك.

2- ركز على حاجة مهمة:

مش لازم تعمل حاجة معينة لكن فكر نفسك باللي عندك من غير ماتحس إنك ملزم بيه لإن ده هيخليك تحس إن عندك هدف معين هتعمله لما ترجع لحياتك الطبيعية حتى لو هتفكر نفسك بجو الشغل والناس اللي بتقعد معاهم التاسكات اللي مفروض تعملها وخططك البعيدة من الشغل يعني.

3- اعمل خطة لرحلتك الجاية:

سواء قعدت يومين أو 10 أيام في الإجازة دي أو أكتر فهي حاجة عادية وطبيعية إنك تحس إن مكانك الطبيعي مش أحسن حاجة وإنك عايز ترجع أو بيبقى عندك حماس تجرب أماكن جديدة وروح الرحالة ابن بطوطة بتحضر وغالبا دي حاجة عند كل الناس ومش عيب إنك تعبر عنها، عشان كده لما ترجع فعلا اعمل خطة بالوقت والمكان الجديد اللي عايزة تروحه وابدأ اتفق مع ناس على الخطة دي حتى لو قدامها شهور عشان تنفذها لإن ده هيخلي عندك هدف وعايز تحققه والطبيعي إن محدش بيسافر ببلاش فأكيد الهدف ده هيحمسك عشان تشتغل.

4- نضف بيتك واشغل نفسك عموما: 

حاول تشغل نفسك بأي أنشطة لإن السفر عموما بيخلي الشخص يفرهد، نزول الصبح وتصوير وخروج بليل ولو مكان فيه بحر وأكل وحفلات وغيره يعني عشان كده حاول تشغل وقتك بأي نشاط تقدر تعمله بعد ما ترجع لحياتك الطبيعية وفي الوقت اللي قبل ما تنزل الشغل فيه ممكن تروق البيت وتنضفه واستغل الوقت ده إنك تقعد في مكان نضيف ومش موتر بالنسبة لك.

5- اطبع الصور اللي اتصورتها:

اخيرا بقي عيش على الذكريات يعني واتبسط بالذكرى الحلوة اللي عشتها، اتكلم مع أهلك أو صحابك أو الناس اللي ماكنوش مسافرين معاك عن اللي حصل في السفر وقلب في الصور واللي تعجبك اطبعها.