٦ مميزات لسن التلاتينات هيخلوك تبطل تخاف منها

بمجرد ما الشخص بيتم النص التاني من العشرينات بيبدأ يحس إنه بيسابق الزمن وببرفض فكرة إنه بيكبر خصوصا إنه بيدرك إنه قرب من التلاتينات، اللي هي رقم يخض بالنسبة لشخص كان لسه من 4 أو 5 سنين في الجامعة وعايش حياته بالطول والعرض.

وبالرغم من نظرتك الحلوة للعشرينات والسن الصغير إلا إنه بالحقايق العشرينات من أكتر السنين اللي في عمر الشخص مرهقة، وهتلاقي إن التلاتينات اللي خايف ومنزعج منها أفضل، موقع “mindbodygreen” قال في مقال من مقالاته مجموعة مميزات بالتفصيل تخليك تبطل تخاف وتنقبض من التلاتينات وهما:

1- إنك توصل للتلاتينات مش معناها إنك كبرت في السن:

طول عمرنا عندنا فكرة وتابوه منحوت في دماغنا إنك أول ما بتدخل في التلاتينات وخصوصا لو عديت الـ 35 فإنت كده رجل في القبر ورجل في الدنيا، وهتبقى شايل مسؤوليات أكتر وحياتك هتاخد شكل تاني أكتر كئابة، بس الحقيقة إن الواحد في التلاتينات بيبقى أخف ومستقر أكتر لأسباب كتير متعلقة بإنه بيبقى اختار الدواير القريبة منه بالطريقة الأصح والمناسبة له من غير ما يرهق نفسه مع ناس مالهاش لازمة.

2- هتدرك قيمة وجع القلب:

 مع مرور السنين هتدرك قيمة وجع القلب اللي كنت بتعاني منه في أول العشرينات، سواء كان عشان شغلك أو عشان تلاقي شريك مناسب أو عشان ماكنش معاك فلوس كفاية، وهتعرف إن الحاجات المتعبة دي اللي وصلتك لراحة أكتر في التلاتينات، زي إن بقى عندك معايير معينة لشريك مناسب أو شغل مناسب مثلا.

3- هتلاقي صحابك والناس اللي شبهك:

مش الشريك المناسب بس اللي ممكن تلاقيه في التلاتينات، هتلاقي كمان الصحاب أو الناس اللي شبهك، مش شرط طبعا تلاقيهم ممكن يبقوا ناس قديمة ولكن الناس اللي هتكمل معاك هما اللي هيبقوا عدوا معاك المواقف الصعبة، وهيبقى عندك في التلاتينات عيلة تانية اختارتها.

4- مش هتحس إن فيه حاجة بتجري وراك:

فكرتك عن الحياة هتتغير، الحاجات اللي كنت شايف إنها لازم تحصل ومش شايف الحياة من غيرها في العشرينات هتعرف إن الحياة ممكن تمشي من غيرها عادي وبأي شكل، وأفكارك عن الحياة المثالية هتبقى أقل أهمية بالنسبة لك وهتعيش بالشكل اللي يريحك مش المفروض إنه يحصل، وده هيديك نوع من الرضا كبير.

5- هتحس إنك شخض بالغ فعلا:

لما توصل للتلاتينات هتحس إنك شخص بالغ كامل للأهلية، وهتبقى الشخص اللي كنت بتسعى تبقاه، وهتدرك مسؤوليات الحياة، وهتاخد قرارات مسؤولة أكتر وكانت متأجلة.

6- الحياة هتخليك أنشف وأقوى:

عقبال ما توصل للتلاتين أكيد هتكون قصادفت مرة موقف إنك صحيت من النوم على وفاة شخص عزيز عليك أو إن حد من صحابك تعبان، وبعد ما تعدى بالوقت الكفاية اللي هيخففك وهيعالج الأزمات اللي من النوع ده هتبقى شخص ألطف ومتسامح أكتر مع اللي حواليك وهتقدر تستحمل صدمات الحياة أحسن.