10 حقايق ماتعرفهاش عن اللبان 

من يوم ما بدأت تدرك إن اللبان مابيتبلعش لحد النهاردة شوف كلت كام لبانة وشوف فرقعت باللبان كام مرة وشوف وأنت صغير حاولت تعمل بلالين بيه قد إيه لحد ما اتعلمت! اللبان من أجمل الحاجات الحلوة اللي الناس عرفتها خصوصا إن طعمه حلو وسعره يعتبر قليل ولما بتجيب علبة منه بتبدأ تعزم على صحابك واللي قاعدين معاك وتعملوا قعدة فرقعة وطرقعة مع بعض.

وبمناسبة يوم اللبان.. قررنا نقولك شوية حقايق ماتعرفهاش عن اللبان حسب ما قال موقع “family minded” وموقع “candy fun house”: 

1- اللي اخترع اللبان هو دكتور أسنان اسمه ” ويليام فينلي” من ولاية أوهايو وقال وقتها إنه نفسه المواد اللاصقة اللي فيها تبقي بتساعد على تنضيف أسنان الناس واللي اخترعه وقتها هو اللي لبان اللي بيبقى شرايح وزي ما يكون عليه دقيق ده لكن ماكنش يعرف إن هيكون فيها كمية السكر دي.

2- وبالرغم إن الفضل يرجع لدكتور الأسنان “وليام فينلي” إلا إن اللبان العادي زي اللي بيعمل بلونات ده وبيبقي عبارة عن كور اللي كان السبب في وجودها هو محاسب اسمه “والتر إي ديمر” وده عن طريق التجارة وابتكر وقتها وصفة الـ “Dubble Bubble” 

3- فيه أسطورة بتقول إنك لو بلعت لبانة هتلزق وتقعد في بطنك حوالي 7 سنين كده عشان مابتتهضمش ولا بتتفتت في المعدة، وبالرغم من ده ماتقلقش عادي جسمك بيحرك اللبان في أمان عن طريق نظام بيسمح لها إنها تعدي لكن برضه بلاش تبلع اللبان بكميات كبيرة لإنه يعتبر مش أمان للدرجة.

4- سنة 1996 “سوزان مونتغمري ويليامز” سجلت الرقم القياسي لأكبر فرقيعة اتنفخت باللبان وكان قطر البالونة حوالي  23 بوصة واستخدمت وقتها ايديها عشان تحمى البالونة من انها تقع أو تفرقع، وتحدي الأرقام القياسية في البلالين باللبان لسه شغال فهتلاقي مثلا إن فيه بنت تانية اسمها “تشاد فيل” كسرت الرقم القياسي العالمي في موسوعة جينيس لأكبر فرقيعة من غير ما تستخدام ايديها وكان قطرها  20 بوصة وده كان في 2004.

5- اللبان بيساعد على التركيز.. لما بتمضغ لبانة بتخليك مصحصح أكتر وقادر تركز في الأنشطة اللي بتعملها، ده غير إنها بتقلل توتر العضلات.

6- فيه أطعم كتير منتشرة لنكهات اللبان زي النعناع والليمون نعناع والفراولة لكن عمرك فكرت في عدد نكهات اللبان الموجودة في العالم، فيه عدد نكهات للبان بالملايين في العالم خصوصا إن كل شركة ليها الميكس الخاص بيها فمثلا مفيش طعم نعناع زي بعضه من شركات مختلفة، ده غير إن فيه نكهات تانية تم ابتكارها وهي محدودة الإصدار زي نكهة عيد الشكر ونكهة المخلل والصابون!

7- يقال فيه شخص اسمه “تريفور كامينغز” من أريزونا في المكسيك حقق الرقم القياسي لأطول امتداد لبانة واللي مدها بطول 564 بوصة، وده أطول بشوية من مبنى مكون من 3 أدوار.

8- عشان تعمل بالونة باللبانة فأنت محتاج تمضغها حوالي ربع ساعة الأول.. عشان تبقى اللبانة طرية ومرنة بما فيه الكفاية عشان تكون فراقيع جودتها كويسة، وكل ما مدة المضغ زادت بقى أسهل نفخ الفراقيع.

9- البلالين بتفرقع أسرع لما بيبقى الجو حر وبالعكس لما بيبقي ساقعة، لإن الدفى بيلعب دور مهم عشان يبقى المادة اللي في اللبان تبقى لينة أكتر.

10- لما تاكل لبانة وأنت بتقطع البصل ده هيمنع عينك تدمع دي طلعت أسطورة فمن الأحسن تلبس نضارة مياة بقي أو تستخدم درع مكافحة الشغب.