14 معلومة محتاج تعرفها عن طريق الكباش في الأقصر قبل الافتتاح
العالم كله في انتظار حفلة افتتاح طريق الكباش النهاردة اللي هيكون حدث أسطوري في الأقصر ومتوقع يكون مبهر للعالم، الحفلة هتبدأ النهاردة الخميس 25 نوفمبر 2021 الساعة 7 ونص مساءًا، ومنتظر إن الناس تشوف الاحتفالات اللي كان بيعملها القدماء المصريين من أكتر من 5 آلاف سنة في “عيد الأوبت” في قلب طريق الكباش، وكان “عيد الأوبت” أشبه بكرنفال بيتم كل سنة في الأقصر وبيتم خلاله تنصيب الملوك والاحتفال بالمناسبات والذكريات السعيدة.
وبمناسبة الاحتفال العالمي خلينا نقولك أهم معلومات عن طريق الكباش اللي هيتم فيه افتتاحه النهاردة:
1- طريق الكباش طوله حوالي 3 كيلو متر وهو بين معبد الأقصر ومعبد الكرنك شمال المحافظة.
2- طريق الكباش بيحتوي على أكثر من 1200 كبش على جنبي طريق الكباش الطويل اللي بيوصل بين المعبدين.
3- الكباش الموجودة على جانبي طريق الكباش بيتنوعوا بين 3 أشكال وأبرزهم شكل أبو الهول.
4- الكباش تم إنشاءها عن طريق عدد كبير من الملوك في العصر الفرعوني القديم.
5- جنب كل كبش بيكون فيه تمثال بحجم صغير للملك اللي أنشأوه.
6- كل كبش من طريق الكباش الأثري فيه ملك هو اللي نفذه.
7- أثناء أعمال الحفر تم العثور على مصانع للنبيذ ومصانع للفخار ومستلزمات تانية.
8- الطريق اتقابل باهتمام دولي كبير خلال الفترة اللي فاتت بالتحديد مع قرب ميعاد افتتاحه.
9- مشروع تطوير طريق الكباش بدأ في سنة 2007 وتوقف في 2011، وتم استكمال العمل فيه تاني بداية من 2017 لحد السنة دي.
10- طريق الكباش معروف بإنه طريق مواكب الآلهة وبيرجع لعصر الأسرة الـ 18 من الدولة المصرية القديمة في عهد الملكة حتشبسوت للاحتفال بموسم الفيضان، ومعروف “بعيد الأوبت” وده قبل ما يختفي الطريق تحت الأرض.
11- مظاهر الاحتفال بالمناسبة الفرعونية المقدسة دي كانت بتستمر فترة بين 11 لـ 27 يوم وكانت بتتضمن مراسم شعبية ومراسم رسمية زي موكب كان بينطلق من معبد الكرنك لمعبد الأقصر بمشاركة الإله آمون والإله خونسو والإله موت.
12- جدران معبد الأقصر بتوثق مظاهر الاحتفال بالتفصيل اللي بتتكون من حاملين المراكب المقدسة والعازفين والأضاحي اللي كانت بتتدبح في المناسبة دي.
13- عروض الحفلة هتبقى متنوعة وهيكون منها عروض فرعونية استعراضية وغنائية وده بمشاركة عدد كبير من الفنانين.
14- أبرز الفنانين اللي هيشاركوا في تقديم العروض أسماء أبو اليزيد، ولسه فيه احتمالية يشارك محمد حماقي وعلي الحجار.
