5 حاجات تعملها عشان تحمي خصوصياتك في موبايلك
![](https://theglocal.com/wp-content/uploads/2022/01/1-1.png)
انتشر مؤخرا كلام كتير عن فيلم “أصحاب ولا أعز” اللي أثار الجدل بسبب قصته واللي فيها الصحاب قرأوا الرسايل اللي جاتلهم قدام بعض وردوا على التليفونات اللي جاتلهم وهما فاتحين الـ”سبيكر”، ووضح الفيلم قد إيه كل حاجة في حياة كل شخص جوا موبايله وقد إيه الموبايل شئ خاص جدا لدرجة إن الخصوصية دي لو اتشالت هتحصل مشاكل تبوظ حياة الشخص حتى قدام أقرب الناس له.
وبما إن مش شرط الخصوصية دي تكون خيانة لأي علاقة، ممكن مثلا تبقى حاجة خاصة بالأهل ومش عايز الصحاب يعرفوها أو العكس أو أسرار شغل مثلا أو صور خاصة بيك أو أسرار عموما ومش شرط تكون بتعمل حاجة غلط بس في الأول والآخر هي خصوصية، موقع “indiatoday” قال في واحد من مقالاته إزاي تحمي خصوصية موبايلك:
1- كل إجراءات الأمان مهمة:
بلاش تكسل تعمل رمز أمان أو باسورد أو “باتارن” أو بصمة، هو شئ بديهي بس فيه ناس بتكسل تعمل لكن دي من الخطوات الأساسية عشان تحافظ على خصوصيتك خصوصا إن ده بيحمي موبايلك في حالة السرقة أو إن حد يسرق بيانات شخصية مهمة، وبلاش كمان تخلي الباسورد (1234) ولا علامة الصح وبلاش برضه تخليه صعب أوي لدرجة إنك ماتفتكرهوش.. وكمان اظبط وقت قفل الشاشة تلقائي يبقى كل 30 ثانية أو دقيقة مثلا
2- حمل تطبيقات الـ “lock app”:
سواء كانت صور أو محادثات عايز تحتفظ بيها من غير ما حد متطفل يشوفها حمل الـ “lock app” واعملها بباسورد برضه جوا موبايلك عشان مهما كان الشخص المتطفل قادر يبص في موبايلك أو يتجسس عليك أو يفتحه من وراك فيبقى صعب يشوف حاجات خاصة بيك.
3- ممكن تعمل وضع “Mode/Parental Lock”:
لما تدي تليفونك لحد ممكن تعمل موود “Mode/Parental Lock” وده ممكن تعمله خصوصا لو هتدي الموبايل لحد يشوف حاجة، الـ “Mode/Parental Lock” هو عبارة عن User Profile بتعمله عشان اللي يمسك موبايلك يقدر يشوف محتوى معين أنت اللي محددة من غير ما يدخل في تفاصيل كتير عنك أما الـ “Profile” الأساسي فبيكون محمي بباسورد أثناء ما الشخص ماسك موبايلك.
4- اعمل “ابديت” بشكل منتظم لموبايلك:
مطورين البرامج بينزلوا “ابديتس” جديدة دايما لبرامجهم ولما بتظهر التحديثات دي سواء كانت كبيرة أو صغيرة اعمل “ابديت” بشكل منتظم لموبايلك لإنها بيكون فيها حلول لمشكلات الأمان اللي كانت مش مظبوطة في الإصدار اللي قبله.
5- احترم خصوصية غيرك:
أكيد طبعا آخر نصيحة بلاش تلعب أي لعب زي بتاعت فيلم أصحاب ولا أعز وخليك واثق في اللي حواليك.. بلاش تفتش في خصوصيات حد واحترم مساحة شريكك أو أهلك أو صحابك الشخصية وبلاش تخلي حد يفتش في خصوصياتك لإن زي ما حقك تزعل وتضايق لو لقيت حاجة غلط في حقك فهو كمان هيفضل تصرف مش سليم إنك تخترق خصوصية حد بس عشان تتأكد إن مفيش غلط بيحصل من ورا ضهرك.