7 خطوات عشان تعمل باسورد قوي

كلمة المرور أو الـ Password بتاعك ده أهم شيء ليك كمستخدم للإنترنت، قوتها ممكن يحميك من مشاكل كتير، ولو ضعيفة فا ممكن تتأذي ويحصلك مشاكل لا حصر لها ممكن توصل لسرقة فلوسك.

على الرغم من حملات التوعية على مستوى العالم والمواضيع الكتير اللي بتتكلم عن أهمية إنك تعمل باسورد قوي لحسابك سواء على مواقع التواصل الإجتماعي أو حسابك الإلكتروني المرتبط بحسابك على تطبيق البنك بتاعك، إلا أن لسه الناس بتعمل كلمات مرور ضعيفة جدا وسهلة التوقع وكمان يوحدوا الباسورد في كل حساباتهم.. وده كأنك بتسلم حياتك للهاكر اللي يخترقك.

ولذلك موقع Terranova Security بيقولنا على نصائح عشان نعمل باسورد قوي:

1- ماتعملش باسورد مكون من حروف أو أرقام متسلسلة، زي QWERTY أو 123456

2- متحطش معلومات شخصية كلمة المرور بتاعتك، سواء سنة أو يوم أو شهر ميلادك لإن دي معلومات سهل الوصول ليها.

3- كل ما الباسورد كان طويل ومتنوع وميكس بين حروف وأرقام مختلفة، أصبح توقعها صعب أكتر وأكتر، زي ده مثلا K-56d$g25!B

4- ممكن تستخدم كلمات مختلفة وغير مرتبطة في كلمة السر بتاعتك لإن ده بيصعب تخمين الباسورد، زي مثلا 9SpidErscalKetobogGaN

5- تعمد إنك تعمل أخطاء إملائية في كلمة المرور بتاعتك، يعني الكلمات خلي يكون ناقصها حرف أو زايد عليها حرف فا ميديش الكلمة الصح

6- متحتفظش بكلمات المرور بتاعتك في فايل على الكمبيوتر أو اللاب توب بتاعك لإن ده كأنك بتسلم كل حاجة لأي هاكر هيخترق جهازك.

7- متوحدش الباسورد بتاعك في كل حتة، لإنه لو اتعرف، هيكون من السهل اختراق حساباتك التانية، خلي كل باسورد في كل موقع مختلف عن غيره.

وبعد كل النصائح دي، دايما تاخد بالك من إن اختراقك ممكن يحصل من بريد إلكتروني مزيف، فا تأكد دايما لو جالك إيميل مزيف وفيه شعار جوجل أو فيسبوك أو تويتر أو من البنك اللي بتتعامل معاه، حتى لو من مكالمة تليفون، مفيش أي جهة على وجه الأرض هتطلب الباسورد بتاعك تماما، دي معلومة حساسة وسرية ماتقولهاش حتى لأبوك وأمك.

Related Articles

Back to top button