7 طرق تطرد بيهم الناس الـ”توكسيك” من حياتك
الناس المؤذية أو الـ”Toxic” شبه إعلانات المطهرات اللي بتيجي في التلفزيون وبتقول “الأوساخ تتواجد حولنا دائما باستمرار” وهكذا الناس المؤذية حوالينا في أي حتة.. مدرسة أو جامعة أو شغل أو حتى صحاب وممكن من العائلة ولكن في وقت ما أنت هتحتاج تقطع مع الناس دي.. تمسحهم من حياتك حرفيا حفاظا على صحتك النفسية في المقام الأول وعشانك أنت لإن نفسك هي الأهم من أي حاجة.
حسب موقع “Delaware Psychological Services”.. في 7 طرق عشان تشيل الناس المؤذية من حياتك وهما الآتي:
1- عرفهم أنت حاسس بإيه: مبدئيا لو حابب تقطع معاهم من غير ما تشرح اعمل ده عادي، ولكن لو عايز تخرج مشاعرك وماتكتمش.. طلع كل اللي جواك وعرفهم أنت حاسس بإيه.
2- اقطع.. اقطع.. اقطع: بص ممكن يكون في ناس صعب القطع معاهم خصوصا لو كنت هضطر تقابلهم بشكل يومي أو هما من العائلة، ولكن حط مساحة بينك وبينهم، يعني لو عايزين يشوفوك قول إنك مشغول، لو عندك على السوشيال ميديا اعملهم أنفولو أو طيرهم ببلوك لو ينفع.
3- التزم بالحدود اللي حطيتها: لازم تواجه النوع ده من الناس بصرامة وقوة شديدة، ممكن يحاولوا يخلوك ترجع عن قرارك، فحاول تلتزم بده عشان هيحاولوا يرجعوا لحياتك بعد فترة أو على المدى الطويل.
4- ماتنجرش ورا الصعبانيات: الشخص التوكسيك ممكن يلعب على حتة الأزمات، يعني هيكلمك ويقولك إلحقني أنا عندي مشكلة أو متخانق في البيت حالتي النفسية والحاجات دي، أه ممكن تتواجد معاهم لو في أزمة ولكن خلاص كل حاجة اتحلت؟ يلا مع السلامة برضه واديهم رياكشن خالد الصاوي في الباشا تلميذ.
5- قضي وقت مع السالكين: بدل ما أنت مضيع وقتك وصحتك مع الناس المؤذية، قضي وقت مع الناس الكويسين اللي بيحبوك وبتحبهم وبتستمتع بالوقت معاهم.
6- اتكلم مع حد: ممكن الخطوة دي تسببلك حزن على إنك أنهيت العلاقة دي رغم معرفتك إنه مهم تعمل ده، ولكن لما تتكلم مع متخصص هيساعدك تتعامل مع مشاعرك وتعرف تديرها.
7- ماتديش فرصة تانية: عملا بمبدأ “كان فيه وخلص”.. ماترجعش الناس دي لحياتك، ممكن أه تسامحهم ده لو أنت عايز، بس متنساش اللي حصل واللي اتعمل معاك.
وفي النهاية.. أنت بتعمل ده علشانك أنت، مفيش أي شخص يستاهل إنه يكون مصدر أذى نفسي أو يكون بيستغلك بأي شكل أو بأي نوع، طرد الناس من حياتك ممكن يكون مؤلم ليك في الأول لو كان في بينكم أحيانا ذكريات كويسة ولكنه زي ما قولنا فوق إن ده هيساعدك في شخص متخصص عشان تقدر تتحكم في مشاعرك وتديرها بشكل كويس وماتضعفش وترجع للشخص المؤذي ده.
