9 حقايق عن الجسم موجودة عند نسبة قليلة من البشر

أجسامنا أماكن غامضة جدا لدرجة إن فيه حاجات كتير نقدر نعملها ومانعرفش إيه هي حتى، من أول إننا نقدر ننحني لدرجة كبيرة لحد إننا نقدر نسمع أدق نغمة، وللسبب ده دورنا على أكتر حاجات غريبة جسمنا بيقدر يعملها بس مانعرفش وده اللي ذكره موقع “Bright side” في واحد من مقالاته:

1- حل مكعب روبيك:

حوالى 6% من سكان الأرض بس هما اللي يقدروا يحلوا مكعب روبيك، وبعض الناس بتقول إنها موهبة والبعض التاني بيقول إنهم بيبقوا مولودين وبيعرفوا يحركوا صوابعهم بسرعة كده بالفطر، لكن من الواضح إن الشخص بيبقى محتاج موهبة وذكاء وقدرة على تحريك صوابعه بسرعة عشان يحل اللعبة المحيرة دي.

2- تقدر تنفخ مناخيرك:

كل جزء في الجسم أكيد له “تريكات” معينة والمناخير مش استثناء، 30% من الناس يقدروا ينفخوا مناخيرهم أو يفتحوا مناخيرهم بسهولة.. العضلة اللي بتشارك في الحركة دي اسمها عضلة المناخير واللي بتضغط على جسر المناخير وده تقدر تشوفه غالباً لما بتاخد نفس عميق أو في الحالات العاطفية جدا لما تاخد نفس كبير وتتنهد كده.

3- مش كل الناس تقدر تهز ودانها بسرعة:

حاول تهز أو تحرك ودانك بسرعة كبيرة كده.. لو عرفت تعمل كده فخليك عارف إنك مميز ومن ضمن 10% من البشر اللي يقدروا يعملوا الحركة دي بجسمهم والحركة دي اسمها “الميزة الأثرية” وهي بتشمل عضلات الودان واللي بيسميها العلماء العضلات الأذنية.

الحركة دي شائعة ومنتشرة جدا بين الحيوانات واتضح إن البشر كمان يقدروا يعملوها.

4- تني الإبهام لدرجة كبيرة:

مش كل الناس تقدر تعمل كده بالابهام عندهم، وحركة تني الإبهام دي اسمها “إبهام المسافر” وهو قدرة الشخص على تني الإبهام وده يعتبر شكل من أشكال فرط حركة الإبهام ومش مؤلم وأكيد مابيشكلش أي تهديد على الشخص من الناحية الصحية ول و عرفت تعمل الحركة دي فأنت أكيد محظوظ.

5- فيه ناس تقدر تتني صوابع رجلها زي الشمبانزي:

فيه ناس صوابع رجلها بتكون منحنية بالفطرة، وفيه شخص واحد بس من ضمن كل 13 شخص هو اللي عنده الرجل اللي زي كده، وده معناه إن رجلهم بتكون مهيأة لتسلق الأشجار وده بيرجع لمرونة الأربطة اللي بتسمح لهم بتني أقدامهم بشكل مايقدرش بعض الناس التانية يعملوه، وده لإن الأربطة عندهم بتكون أكتر ليونة وده اللي بيسمحلهم بتني رجلهم بالطريقة دي.

6- بعض الناس عمرهم مابيحسوا بصداع:

الصداع تعب شائع جدا بين الناس لكن في الواقع فيه مجموعة صغيرة جدا من الناس عمرهم ما حسوا أو بيعتقدوا ده، الدراسات بتقول إن 90% من الناس اللي بتتراوح أعمارهم من 18 لـ 65 سنة عانوا من الصداع أو حتى الصداع النصفي في مرحلة ما في حياتهم أما الـ 10% الباقيين مايعرفوش إيه الإحساس ده أصلا وده بسبب قدرتهم على تحمل الألم وده بيخلي طريقة الصداع اللي بيجيلهم معتدل شوية ومش ملحوظ.

7- بعض الناس تقدر تكتب بإيدها الاتنين:

غالبًأ ما بتستخدم ايد واحدة بس في يومك يا اليمين يا الشمال بس، وأكيد بتستخدم إيد واحدة عشان “تسكرول داون” في المقال ده وأنت بتقراه دلوقتي، لكن المفاجأة إن فيه ناس بتقدر تستخدم اليمين والشمال الاتنين بنفس القدرة والكفاءة ونسبتهم حوالى 1% من سكان الأرض وماعندهمش أي إيد هي اللي مسيطرة.

لكن اللي قدر يوصله العلماء لحد دلوقتي هو إن الحركة دي مش مرتبطة بالوراثة ولكن مرتبطة بنصف فص المخ لإن هو اللي بيتحكم في حركة الإيد.

8- بعض الناس يقدروا يشوفوا بالأشعة فوق البنفسجية:

العين فيها شوية قدرات مذهلة وممكن جينات الشخص المتعلقة بالعين في بعض الأحيان تخليه يشوف صور مميزة وواحد من الشروط دي اسمه “Aphakia” والحالة دي هي ناتجة من عدم وجود عدسة العين.

عدسة العين بتحمينا من الأشعة فوق البنفسجية دي ومن غيرها يقدر الشخص يشوف الألوان كده ودي اسمها “الرؤية فوق البنفسجية”. بمعنى تاني دي الحالة اللي بتخلي الشخص يشوف ما وراء حدود الإنسان.

9- التذوق الفائق عند بعض الناس:

فيه حالة وراثية تانية ليها علاقة ببراعم التذوق عندنا ودي بتعتمد على أعداد براعم التذوق وبتعتمد على عدد براعم التذوق اللي عند الشخص وبتكون أكتر من المتوسط وبيتقال عليهم إنهم أبطال خارقين وتقريبا حوالي 25% عندهم الحالة دي، والحلو في الحالة دي هو إنها بتخلي طعم الأكل أكتر كثافة وطبعا بيخلي الشخص صعب يرضي بسهولة بطعم الأكل لإنه بيتذوق حلو جدا.