إيه تأثير التعرض للشمـــــس.. وليــــه ضروري تحـــــط Sunscreen.. وإزاي تختار واقي الشمس المناسب ليك؟

الشمس مفيدة وبتدينا فيتامين D وكل حاجة بس الصهد بتاعها لا يُطاق وزي ما ليها فوايد فالتعرض للأشعة بتاعتها ليه أضرار كبيرة للجلد هنكلمك على شوية منها ونقولك كمان ليه ضروري تحط واقي شمس/  Sunscreen وإيه انواعه وكمان إزاي تختار واقي الشمس المناسب ليك

بيحصل إيه لما نتعرض للشمس؟

• الأشعة فوق البنفسجية بتاعة الشمس بتبوظ ألياف الكولاجين والإيلاستين الموجودين في الجلد وده بيسبب حروق والتهابات في الجلد 
• ولما الألياف دي بتضر الجلد بيفقد مرونته وبتبدأ تظهرلك تجاعيد وخطوط وكمان بقع داكنة.. وده بيخلي الجلد يحصله شيخوخة مبكرة 
• التعرض الكتير لأشعة الشمس بيزود إنتاج الميلانين في مناطق معينة في الجلد فبتحصل تصبغات بشكل مفرط في المناطق دي.. واللي اسمها “بقع الكبد” أو “بقع الشمس”
• الأشعة فوق البنفسجية الطويلة (UVB) بتسبب إعتام لعدسة العين
• حسب مؤسسة سرطان الجلد.. فالتعرض لخمس حروق شمس أو أكتر فخطر الإصابة بسرطان الجلد بيتضاعف خاصة لو مابتستخدمش واقي شمس.. وده عشان الأشعة البنفسجية بتضر الحمض النووي لخلايا الجلد فبتتكون خلايا سرطانية

ليه ضروري نحط واقي شمس/ Sunscreen؟

• بيمنع حروق الشمس والشيخوخة المبكرة للجلد وسرطان الجلد.. فحسب مؤسسة سرطان الجلد فوضع واقي شمس بعامل حماية 15 أو أكتر على الأماكن المعرضة للشمس بيقلل خطر الإصابة بسرطان الجلد بنسبة 50% 
• بيمنع إن الأشعة فوق البنفسجية تخترق حاجز الجلد وتوصل للطبقات العميقة منه 
• واقي الشمس اللي بيكون فيه أكسيد التيتانيوم بيحمي بروتينات الجلد الأساسية زي الكيراتين والكولاجين والإيلاستين ودي البروتينات الضرورية عشان تحافظ على صحة ونعومة البشرة
• بيحمي الجلد من إنه تظهر فيه حبوب وبيقلل ظهور الأوردة الحمراء الصغيرة على الجلد وأي مشاكل جلدية زي التصبغات والبقع الداكنة اللي اتكلمنا عنها.. فبيخلي بشرتك موحدة 
• لما بتنزل البحر أو حمام السباحة في الشمس فالجلد بتاعك بيفقد زيوت مرطبة كتيرة بتخلي الجلد ملمسه خشن ويقشر فبيكون ضروري ساعتها تحط واقي شمس يصلح الأضرار دي كلها

إزاي تختار واقي شمس/ Sunscreen؟ ونصايح وانت بتحطه

• لازم عامل الحماية من الشمس (SPF) يكون 30 أو أعلى عشان يحمي بشرتك بشكل كامل
• لو بشرتك دهنية اختار واقي الشمس اللي قوامه مائي.. أما لو بشرتك جافة اختار واقي شمس فيه مواد مرطبة
• لازم تحط واقي الشمس قبل ما تتعرض للشمس بنص ساعة
• لازم تجدد واقي الشمس كل ساعتين وبعد ما تنزل البحر أو حمام السباحة وكمان مع العرق

إيه أنواع واقي الشمس؟ وأنهي أحسن فيهم؟

• واقي الشمس الفيزيائي 

بتعكس وبتشتت الأشعة فوق البنفسجية وفيه بيكون فيه نوعين من المركبات الفيزيائية وهما أكسيد الزنك وثاني أكسيد التيتانيوم 

• واقي الشمس الكيميائي

الجلد بيمتصه بمجرد ما تحطه عليه وبيمتص الأشعة فوق البنفسجية بمجرد ما توصل للجلد ويحولها لحرارة بسيطة الجسم بيتخلص منها.. وبيكون فيه مركبات كيميائية زي السينامات والساليسيلات والبنزوفينون

الأحسن فيهم ده بتحدده حسب نوع بشرتك وده عشان كل نوع فيهم ليه مميزاته وعيوبه.. فمثلًا واقي الشمس الكيميائي مابيسيبش طبقة بيضا على الجلد وبيقاوم المياه والعرق ومابتحتاجش تستنى غير من 15 لـ 20 دقيقة بعد ما تحطه عشان تخرج للشمس.. عيبه إنه ممكن يعمل تهيج لبعض أنواع البشرات الحساسة فلازم تجربه على جزء بسيط من الجلد قبل ما تحطه على وشك  

أما واقي الشمس الفيزيائي فهو مابيعملش تهيج للبشرة زي الكيميائي وعشان كده بيكون مناسب لأصحاب البشرة الحساسة وحالات البشرة اللي بتتأثر بالحرارة زي البشرة الوردية والحوامل والأطفال اللي أكبر من 6 شهور.. وكمان فاعليته بتبدأ بمجرد ما بتحطه على البشرة وبتكون فاعليته أكبر على البشرة الجافة غير المبلولة.. عيبه بقى إنه بيسيب آثار بيضا على البشرة وقوامه ممكن يبقى تقيل فبيبقى صعب تفرده على البشرة في بعض المنتجات

5 أماكن بتنساها وانت بتحط واقي الشمس

• الأذن

حسب موقع cleveland clinic فالأذن هي تالت أكتر الأماكن شيوعًا للإصابة بسرطان الجلد.. ودكتورة الأمراض الجلدية المعتمدة ومديرة برنامج سرطان الجلد في مستشفى “بروفيدنس سانت جوزيف” تانيا نينو بتقول إنها بتشوف حالات مصابة بسرطان الجلد في كل أجزاء الأذن الخارجية وبتمتد كمان لقناة الأذن وإن ورا الأذن منطقة شائعة لتكوين سرطانات الجلد.. عشان كده ضروري تحط واقي شمس على الأذن 

• الجفون

حسب موقع الجمعية الأمريكية لعلم الأورام السريري فسرطان الجلد على الجفون بتوصل نسبته لـ 10% من سرطانات الجلد وده عشان الجلد اللي حوالين العين رقيق جدًا وعرضة أكتر لعلامات الشيخوخة زي التجاعيد وبقع الشمس.. فاستخدم واقي شمس على الجفون فيه ثاني أكسيد التيتانيوم أو أكسيد الزنك أو استخدم كريم عيون فيه عامل حماية من الشمس والبس نضارة شمس تحميك من أشعة الشمس فوق البنفسجية 

• الشفايف

لو فاكر إن شفايفك مش جلد فانت غلطان.. الأكاديمية الأمريكية للأمراض الجلدية بتقول ضروري تحط مرطب شفايف فيه عامل حماية من الشمس عشان تمنع فكرة تطور سرطان الجلد أو التجاعيد في المكان ده.. ولو مش معاك ممكن تحط واقي الشمس عادي عليها 

• الرقبة

حسب مقال اتنشر في مجلة JAMA Otolaryngology Head and Neck Surgery سنة 2019 فيه حوالي 20% من حالات سرطان الجلد الجديدة في منطقة الراس والرقبة.. فلازم تحط واقي الشمس على رقبتك كمان قبل ما تنزل للشارع وتواجه حرارة الشمس 

• القدمين

الأبحاث بتقول إن من 3 لـ 15% من سرطانات الجلد الميلانينية بتحصل في القدم أو الكاحل.. وعشان كده ضروري تحمي رجلك بواقي شمس من الأشعة فوق البنفسجية خاصة لو كنت على البحر