في أوائل شهر سبتمبر 2025.. انتشر مقطع فيديو لفتاة سودانية اسمها “قسمة علي عمر” من قبيلة “الزغاوة” -وهي قبيلة غير عربية بتسكن منطق دارفور وبتمتد كمان لدولة تشاد- وهي بيتم تعذيبها من أحد أفراد ميليشيا الدعم السريع لاتهامها بالتعاون مع “جهات معادية”.. “قسمة” تم تعليقها على شجرة من دراعها وتعذيبها لحد ما فقدت حياتها.. وتم تصويرها من الشخص اللي كان بيقوم بالتعذيب.

بس قصة “قسمة” مش هي الوحيدة اللي فيها معاناة وجرائم ضد المرأة السودانية وسط الصراع اللي قائم من سنة 2023.. 

تقرير منظمة أطباء بلا حدود

يوم الخميس 25 سبتمبر.. أصدرت منظمة أطباء بلا حدود تقرير بعنوان ” السودان: استهداف المدنيين بعنف جنسي ممنهج”

في التقرير تم توثيق زيادة عدد عدد الضحايا اللي تلقوا الرعاية الطبية فوصل لـ 121 بين إبريل ويونيو ووصل لـ 339 في يوليو وأغسطس.. واللي بيبين زيادة عدد الضحايا بشكل ملحوظ.. كمان -وبحسب التقرير- فكثير من الضحايا لما بيوصلوا لأماكن تلقى الرعاية الطبية بيفيدوا بتعرضهم لاعتداء جنسي أثناء محاولتهم للهروب.

وفي حادثة من الحوادث اللي وثقتها المنظمة.. ففيه فتاة قالت إنه تم دهس والدتها تحت عربيات ميليشيا الدعم السريع وبعد ما قتلوا والدتها تم اغتصابها وبعدها رجعوها عند جثة والدتها تاني وسابوها ومشيوا.

كمان التقرير قال إن فيه شهادات بوقوع اعتداءات جنسية على الرجال لكن الوصمة الاجتماعية والخوف بيخليهم مايقولوش اللي حصل عشان كده مفيش أرقام معروفة.

الأزمة في السودان مستمرة والتقارير بتقول إن حوالي 13 مليون شخص تم تهجيرهم قسريًا للبحث عن أماكن آمنة.. منهم 8.6 مليون شخص نزحوا داخل السودان من مكان لمكان.