ساعة الرقص بتاعت نص الليل وانت قاعد مع نفسك طلعت علاج
أكيد بالليل وانت قاعد مع نفسك مرة حسيت إن إيه ده أنا عايز أقوم أرقص أو حتى تعمل أي حركات تطلع فيها شوية طاقة.. مش لازم بالليل طبعًا ده ممكن يحصل في أي وقت تعمله في الشغل أو البيت وساعات لو ماشي مع نفسك في الشارع عادي تعملها إنك تتحرك بطاقة زيادة.. فهل ده علاج فعلًا؟
حسب Frontiers و NIH و Uclahealth
1- التأثير على الاكتئاب والقلق
بص يا سيدي حسب مراجعات حصلت إن العلاج بالحركة “DMT” بيقلل من أعراض الاكتئاب مقارنة بالحالات اللي مبتاخدش علاج من النوع ده.. كمان الرقص حسب تجارب سريرية بيحسن الحياة ويقلل القلق والتوتر.. وبرضه الناس اللي اتعرضت لصدمات نفسية فيه دراسات كتير قالت إنه بيقلل من أعراضها وبيساعدك تتخطاها
2- بيظبط الإدراك والمعرفة
حسب bmcgeriatr فيه دراسة حديثة اتعملت لمرضى كبار السن إن العلاج بالرقص بيحسن الأداء في الذاكرة والانتباه والحالة النفسية.. فكرة كمان إن الدماغ قادر على التكيف “neuroplasticity” مدعومة في سياق الرقص لأن الرقص بيحتاج تنسيق حركات مع الموسيقى.. يعني من الآخر بيخليك تشغل دماغك وتمرنها
3- طب ليه الرقص مفيد أصلا؟
- الرقص محتاج حركة ونشاط بدني والموسيقى عبارة عن إيقاع وموسيقى بتحفزك وتديك مساحة للتعبير العاطفي فكل الكوليكشن ده على بعضه بيعمل تكامل بين الجسم والعقل
- وقت الرقص الجسم غالبًا بيفرز هرمونات “السعادة” أو ناقلات عصبية زي الإندورفين “endorphins” وبيقلل من هرمون التوتر “الكورتيزول”
- أوقات كده مبتبقاش عارف تتكلم ولا تعبر بالكلام.. غالبًا وقت بالليل المنيل بنيلة ده وتحس إنك مخنوق.. وساعتها الرقص أو الحركة ممكن تعبر عن المشاعر دي بدل الكلام
4- بس خلي بالك!
1- مش معنى إن تعبان نفسيًا أو عندك مشكلة كبيرة إن لما ترقص مشاكلك هتتحل والحياة هتبقى وردي
2- الرقص عبارة عامل بسيط من العوامل اللي بتساعد في المشاكل كبيرة.. بس وقت لما تكون الحاجات اللي مزعلاك بسيطة ومش كارثية ساعتها ممكن يكون علاج لوحده عادي
3- فيه حالات نفسية زي “الاضطرابات الحركية” وحالات طبية تانية معينة بيكون فيها ممنوع أصلا تتحرك أو ترقص غير باستشارة طبية
في النهاية التعبير الحركي أو الرقص أو أيًا كان المسمى أكيد بيخرج شوية طاقة موجودين وقارفينك حبة.. أو حتى بيزود معاك شوية هرمونات تخليك تتبسط لو انت عادي أو مبسوط شوية صغيرين ويزود الانبساط والأكيد إنه مش علاج كامل لمرض ولكن ماتبخلش على نفسك إنك تديها من وقت للتاني واحدة “شيك.. شاك.. شوك”
