تصريح عاجل.. مش هتلاقي السعادة غير لما يبقى عندك 60 سنة!
بيقولوا إن العشرينات أسعد فترة في الحياة.. شباب بقى فاتح صدرك للدنيا بعد ما تخرجت وعايز تنبسط.. بس كل ده كذب وواضح إنك متفق مع الكلام ده وانت بتقرأ الموضوع.. بس فيه أمل تلاقي السعادة في سن الـ 60 وانت طالع وده اللي اسمه منحنى السعادة!
إيه هو منحنى السعادة [ U-Shaped Happiness Curve]؟
نظرية في علم الاجتماع بتقول إن السعادة بتاخد منحنى على شكل حرف “U” على مدار حياتك.. فالسعادة بتكون منخفضة في مرحلة الشباب (العشرينات والثلاثينات).. بعد كده في الأربعينات لأوائل الخمسينات بتتنكد ورضاك عن حياتك بيقل.. وبترتفع السعادة وتزيد بعد كده في سن الستين والسبعين ومع التقدم في العمر
طب ليه المنحنى ده بيزيد مع التقدم في العمر؟
1- تنظيم المشاعر: احتمال تعرض كبار السن لتقلبات مزاجية شديدة قليل.. وبيتحكموا في مشاعرهم السلبية.. ده غير إنهم مابيهتموش بالتفاصيل وبيكبروا دماغهم لأن على مدار خبراتهم لحد ما وصلوا السن ده اتعلموا التحكم في القلق والتوتر
2- مابقاش فيه أهداف كبيرة أو طويلة المدى: بقوا كارفين ومركزين على الحاضر والحاجات اللي تبسطهم.. عكس فترة الشباب اللي بتبقى فيها مهتم بالشغل والحاجات اللي هتأمن بيها مستقبلك
3- التركيز على الإيجابيات: وده في علم النفس اسمه “انحياز الانتباه والذاكرة” وهو إن الواحد بيفتكر ذكرياته الجميلة اللي عاشها في شبابه.. غير إن التصوير العصبي لكبار السن لقى إن اللوزة الدماغية بتتفاعل أقل مع المحفزات السلبية مقارنة بالشباب
4- تغيير الأولويات: عالمة النفس “ستيفاني هاريسون” بتقول إن قلة الجري ورا الانجاز بيخلي الواحد راضي عن الحياة وبيخلي النفسية أحسن.. والعضمة بتكون كبرت فبيركزوا يختاروا الناس والحاجات اللي تبسطهم.. وده اللي اسمه نظرية الانتقائية الاجتماعية العاطفية
طب لو انت في شبابك وعايز تنبسط.. تعمل إيه؟
- ماتعلقش تعاستك على العمر: حدد المشكلة اللي مخلياك تعيس وابدأ فصصها وحدد حلول ليها
- استثمر في علاقاتك: خليك على تواصل مستمر مع الناس القريبة ليك وبتحبها.. وزي ما المثل بيقول من جاور السعيد يسعد
- اعرف ناس من فئات عمرية مختلفة: سواء أصغر أو أكبر.. لأن ده هيخليك تشوف وجهات نظر مختلفة.. وخبراتك هتكبر في الحياة فده هيساعدك على تنظيم مشاعرك وبالتالي هترتاح وتنبسط زي ما كنا بنتكلم فوق
وفي الآخر مش لازم تستنى عمر معين عشان تنبسط وتبقى سعيد.. السعادة بتيجي للي جاهز يستقبلها وبيعمل اللي عليه عشان يوصلها.. وكده كده الحياة أقصر من إنك تنكد على نفسك.. فانبسط كده وروق محدش واخد منها حاجة!
