إيه سر تسمية “بيتزا مارجريتا” بالإسم ده؟ ومين مارجريتا دي أصلًا؟

تقريبًا من أكتر الحاجات اللي الناس بتجتمع عليها من غير جدالات كتير هي حب الأكل.. بالذات “الأكلة الحلوة”.. فحبينا نسرح بخيالنا ونتأمل في الأكل اللي حوالينا وبنحبه.. ونسأل نفسنا شوية أسئلة عنه.

وعشان أي قعدة صحاب أو خروجة سريعة أو حتى سهرة بالليل قدام التليفزيون لا تخلو من الأكلة المدورة المتقطعة مثلثات متغرقة موتزاريلا دي.. فحبينا إن أول سؤال يبقى عنها.

ألا وهو.. مين الست مارجريتا اللي البيتزا اتسمت على اسمها؟

القصة بدأت من زمان.. سنة 1889 لما زارت ملكة إيطاليا مدينة نابولي.. أيوه هي الملكة  “مارجريتا”..  وفي يوم من أيام ربنا.. كانت بتتمشى مع جوزها لا بيهم ولا عليهم في شوارع وسط البلد.. المهم ماطولش عليك قول طول.. شموا ريحة حاجة حلوة جاية من مطعم من مطاعم البيتزا اللي هناك.

وقالت هاتولي الشيف اللي بيعمل الأكل ده.. اللي بالمناسبة اسمه “رافاييل إسبوزيتو”.

وأخدوا عم “رافاييل”  لقصر “كابوديمونتي”.. القصر الملكي يعني.. عشان يعملهم الطبق ده هناك.. والشيف استغل الفرصة وقرر يعملهم 3 أنواع بيتزا مختلفين.. واحدة منهم استخدم فيها مكونات مستوحاه من ألوان العلم الإيطالي.. الطماطم هتمثل اللون الأحمر.. جبنة موزاريلا للون الأبيض والأخضر هيبقى شوية أعشاب واللي استخدمهم كانوا “الريحان” ورجع بعدها الشيف “رافاييل” بيته في سلام وأمان.

عشان يصحى تاني يوم ويلاقي رسالة من “كاميلو غالي” رئيس طهاة البلاط الملكي بنفسه.. ومكتوب فيها: “استاذ رافاييل إسبوزيتو الكريم.. الـ 3 بتايز اللي عملتهم لصاحبة السمو الملكي كانوا عشرة على عشرة وفوق مستوى التقييم”.

وبالرغم أن الملكة عجبها كل الأنواع إلا أنها قالت إن البيتزا الحمراء والبيضاء والخضراء هي المفضلة بالنسبالها وعجبتها أكتر من الباقي.

فصاحبنا الشيف ماكدبش خبر وسماها بإسم الملكة “مارجريتا”.. وبس يا سيدي من هنا جه إسم واحد من أشهر الأطباق الكلاسيكية الإيطالية المحبوبة في العالم كله.

وعشان تعمل البيتزاية الحلوة دي:

هتحتاج كوبايتين دقيق.. ملعقة صغيرة خميرة.. ملعقة صغيرة سكر ونصها ملح وملعقتين كبار زيت.. حوالي ¾ كوباية ماية دافية.. طماطم متقطعة شرايح على فص توم مفروم.. شوية ريحان وحبة جبنة موزاريلا.

حط الدقيق مع الخميرة والسكر والملح.. وبعدين زود الماية والزيت واعجنهم لحد ما العجينة تبقى طرية.. وسيبها في حالها تخمر حوالي ساعة.

افردها وحط عليها الزيت والتوم والموتزاريلا والطماطم والريحان وعلى الفرن.

وبألف هنا وشفا.. ماتنساش بس تفتكر الشيف وانت بتاكل وتقوله تسلم إيدك يا عم “رافاييل”.