مانويل بيلجريني.. مسيرة مدرب أندرريتد في أوروبا
مانويل بيليجريني مش مجرد مدرب نجح في نادي أو اتنين لكن حالة استثنائية قدرت تسيب بصمة في كل مكان راح له من أمريكا الجنوبية لحد أقوى دوريات أوروبا.. المميز في قصته إنه مش بيعتمد على الضجة الإعلامية لكن على بناء فرق بتنافس وتكسر أرقام تاريخية.
بيليجريني اللي داخل على 73 سنة وواحد من أقدم المدربين حاليًا في كرة القدم قدر يثبث أنه واحد من أعظم المدربين اللي جم في تاريخ كرة القدم ببصماته المميزة واللي عاش فيها مع الفرق اللي دربها حالات تقدر تصنفه فعلا كمدرب مظلوم.
فياريال.. بداية الحلم الأوروبي لفريق صغير
لما بيليجريني وصل فياريال سنة 2004 النادي الإسباني كان لسه بيحاول يثبت نفسه في الليجا ومكانش معروف أوروبيًا لكن في أول موسم قدر يحقق المركز الثالث في الدوري الإسباني ويأهل الفريق لأول مرة في تاريخه لدوري أبطال أوروبا
الأهم من التأهل إن الفريق ما وقفش عند المشاركة لكنه وصل لنصف نهائي دوري الأبطال 2005-2006 وده كان إنجاز تاريخي خلى الصحف الإنجليزية وقتها توصف فياريال بأنه “أحد أفضل القصص في أوروبا”.
الفكرة الأساسية هنا إن بيليجريني اعتمد على كرة منظمة جدًا.. واستحواذ هادئ.. وتحويل فريق محدود الإمكانيات لخصم صعب على الكبار زي إنتر ومانشستر يونايتد في الرحلة الأوروبية.
مالاجا.. معجزة الأندلس الصامتة
تجربة مالاجا كانت مختلفة لأن النادي وقتها كان في مرحلة إعادة بناء بعد استثمارات قوية لكن من غير استقرار طويل.. بيليجريني قدر يوصل بالفريق لأول مرة في تاريخه لدوري أبطال أوروبا في واحد من أفضل مواسم النادي محليًا.
وفي موسم 2012-2013 الفريق وصل لربع نهائي دوري الأبطال وخسر بصعوبة قدام بوروسيا دورتموند في مباراة درامية اتوصفت في الصحافة الإسبانية بـ”الظلم الكروي في اللحظات الأخيرة”… اللي ميز التجربة دي إن مالاجا لعب كرة منظمة جدًا دفاعيًا وهجوميًا رغم مشاكل مالية كبيرة بعد كده أثرت على مستقبل المشروع.. لكن تأثير بيليجريني الفني فضل ثابت.
ريال مدريد.. موسم الأرقام القياسية رغم الرحيل
في 2009 بيليجريني استلم ريال مدريد في فترة “الجالاكتيكوس” وكان تحت ضغط ضخم جدًا.. حقق رقم قياسي وقتها بـ96 نقطة في الدوري الإسباني وهو رقم تاريخي للنادي وقتها.. لكن خسر اللقب بفارق بسيط لبرشلونة.
رغم إنه اتقال عليه إنه “مدرب مرحلة انتقالية” إلا إن الموسم ده كان من أعلى المواسم تهديفيًا واستقرارًا للنادي في تلك الفترة لكن سياسة التعاقدات وعدم الاستقرار الإداري كانت سبب في رحيله بعد موسم واحد فقط.
ومسك بعدها جوزيه مورينهو.. اللي قدر بناًء على الأساس اللي حطه بيلجريني يكسب الدوري الإسباني مع الفريق بـ100 نقطة في موسم 2011\12 واللي فضل رقم قياسي ماتكسرش من وقتها.. ومدربين كتير مسكت من بعده أهمهم زيدان وأنشيلوتي.. اللي ناس كتير اعترفوا إن من غير الأساس اللي بناه بيلجريني.. مكانوش هيوصلوا للي وصلوله.
مانشستر سيتي.. أول لقب كبير في العصر الحديث
تجربة مانشستر سيتي كانت نقطة تحول في تاريخ النادي .. بيليجريني قاد الفريق للفوز بالدوري الإنجليزي موسم 2013-2014 وده كان واحد من أهم ألقاب النادي لأنه رسخ فكرة إن السيتي بقى فريق بطولات مش مشروع فقط.
كمان الفريق تحت قيادته لعب كرة هجومية جدًا وسجل أرقام تهديفية ضخمة وصلت لـ151 هدف في كل البطولات في موسم واحد.. وده رقم قياسي وقتها في إنجلترا.. الصحافة الإنجليزية وصفت الفريق وقتها بأنه “أمتع نسخة هجومية في تاريخ السيتي قبل عصر جوارديولا”.
وست هام وتجربة إنجلترا الصعبة
بعدها راح ويست هام لكن التجربة ما كانتش ناجحة بنفس شكل محطاته السابقة.. الفريق عانى من عدم استقرار في الأداء وده أدى لإنهاء التعاقد بعد فترة قصيرة.
رغم كده التجربة دي ماقللتش من صورته العامة لكنها أكدت إن أسلوبه بيعتمد على وجود مشروع متكامل مش ظروف انتقالية سريعة.
ريال بيتيس.. أعظم قصة استمرارية في مسيرته
من 2020 بيليجريني بدأ مرحلة جديدة مع ريال بيتيس ودي تعتبر واحدة من أنجح فتراته التدريبية في أوروبا الحديثة.. قدر يوصل بالفريق لكأس ملك إسبانيا 2022 أول بطولة كبرى للنادي من 17 سنة وده وثقته الصحافة الإسبانية كأحد أهم إنجازات النادي في تاريخه الحديث.
كمان تحت قيادته بيتيس بقى فريق ثابت في المنافسة الأوروبية ونجح في الوصول لنهائي أوروبي في بطولة دوري المؤتمر الموسم اللي فات 2024\25 ولكن اتصدم وقتها بفريق تشيلسي بقيادة ماريسكا اللي بعد الفوز ده بقى “بطل العالم” وده أكد إن المشروع مش لحظي لكن استمراري.
وفي الموسم دة الفريق كمان نجح في العودة لدوري أبطال أوروبا بعد غياب سنين وكان لحظة تاريخية للنادي وجماهيره.
بيلجريني مدرب مشروع
وفي النهاية، نقدر نقول إن بيلجريني مدرب مش متسلط عليه الضوء بالشكل الكافي.. رغم إن إنجازاته مش قليلة.. ومش أقل أهمية من إنجازات مدربين كتير. لكن لأنه مش من النوع اللي بيحب يطلع يتكلم في وسائل الإعلام كتير.. فممكن يكون ده سبب يخليه مياخدش حقه الكامل في الكورة.
