ليه نهائي الـ NBA سرق الأضواء من كأس العالم في أمريكا؟

رغم إن أمريكا مستضيفة كأس العالم 2026 ومنتخبها بدأ البطولة بفوز كبير 4-1 على باراجواي إلا إن الحدث الرياضي اللي شغل الأمريكيين فعلًا في الأيام الأولى للمونديال ماكانش كرة القدم لكنه تتويج نيويورك نيكس بلقب دوري الـNBA لأول مرة من 53 سنة

الصحف البريطانية اللي كانت موجودة في نيويورك خلال انطلاقة كأس العالم رصدت مشهد غريب شوية.. مدينة من أهم المدن المستضيفة للمونديال لكن أغلب الكلام في الشوارع والمطاعم والكافيهات كان عن نيويورك نيكس مش عن مباريات كأس العالم

1- نيويورك كانت عايشة على حلم بقاله 53 سنة

يوم تتويج نيويورك نيكس كانت الجماهير مستنية لحظة تاريخية بقالها أكتر من نصف قرن.. الفريق ماكسبش لقب الدوري الأمريكي للمحترفين من 53 سنة وعشان كده المباراة الحاسمة ضد سان أنطونيو سبيرز كانت بالنسبة لسكان المدينة أهم بكتير من أي رياضة تانية عمومًا

واحد من مشجعي الفريق صرح لـ BBC: “إحنا مهتمين بالنيكس أكتر بكتير من كأس العالم دلوقتي”.. مشجع تاني قال إن سكان نيويورك بيعيشوا وبيعيطوا عشان كرة السلة وإن اللحظة دي بالنسبة لهم كانت حلم عمر كامل بيتحقق

2- البرازيل والمغرب بيلعبوا واللي شاغل الناس “السلة”

المفارقة إن مباراة البرازيل والمغرب في كأس العالم كانت بتتلعب على بعد أقل من 10 أميال من ماديسون سكوير جاردن لكن آلاف المشجعين فضلوا يتجمعوا حوالين معقل نيويورك نيكس لمتابعة النهائي.. صحيفة الجارديان وصفت المشهد إن مانهاتن كلها كانت لابسة ألوان النيكس.. قمصان الفريق كانت في كل مكان من الموظفين في الفنادق لحد الطلبة والسياح

حتى الكافيهات اللي كانت ناقلة مباريات كأس العالم أول ما خلصت مباراة البرازيل والمغرب حولت الشاشات فورًا على نهائي الـNBA وسط هتافات الجماهير.. السبب مش مجرد إن نيويورك نيكس فريق محبوب لكن كمان لأن نهائي الـ NBA كان واحد من أكتر النهائيات مشاهدة خلال العقود الأخيرة

بحسب أرقام الـ NBA الرسمية المباراة الأولى من السلسلة حققت متوسط مشاهدة وصل إلى 16.9 مليون مشاهد مع ذروة عدت 19.6 مليون أما المباراة الثالثة فوصل متوسط مشاهدتها إلى 23.8 مليون شخص وسجلت المباراة الرابعة حوالي 20.9 مليون مشاهد

الأهم إن متوسط أول أربع مباريات في السلسلة وصل إلى 19.6 مليون مشاهد وده أعلى معدل مشاهدة لنهائي الدوري الأمريكي للمحترفين من سنة 1998.. الأرقام دي بتوضح ليه كان الكلام كله في الإعلام الأمريكي عن جالين برونسون ورحلة نيكس التاريخية أكتر من الحديث عن انطلاقة كأس العالم

3- ليه الأمريكيين اختاروا السلة؟

الإجابة ببساطة إن الثقافة الرياضية في أمريكا مختلفة عن باقي العالم.. في أوروبا وأفريقيا وأمريكا الجنوبية المنتخب الوطني بيكون هو محور الاهتمام وقت كأس العالم لكن في أمريكا الانتماء الأكبر غالبًا بيكون للفرق المحلية

مشجع نيويورك نيكس عنده ارتباط عاطفي بالفريق على مدار السنة كلها وخصوصًا لما يكون مستني لقب بقاله 53 سنة عشان كده كان طبيعي إن نهائي الـNBA ياخد الأولوية عند قطاع كبير من الجماهير.. كمان كرة السلة جزء أساسي من الهوية الرياضية لمدينة نيويورك في الوقت اللي كرة القدم لسه بتحاول تزود شعبيتها مقارنة برياضات زي السلة والبيسبول وكرة القدم الأمريكية

رغم إن المنتخب الأمريكي افتتح مشواره في كأس العالم بفوز كبير على باراجواي بنتيجة 4-1 إلا إن أجواء الاحتفال بالانتصار ماوصلتش أبدًا لمستوى الهوس اللي صاحب تتويج نيويورك نيكس.. وسائل الإعلام المحلية خصصت ساعات طويلة للحديث عن اللقب التاريخي وعن احتفالات الجماهير في تايمز سكوير وشوارع مانهاتن، أكتر بكتير من تغطية مباراة الافتتاح في المونديال

حتى عمدة نيويورك أعلن مباشرة إقامة موكب احتفالي ضخم للفريق في شوارع المدينة وهو الحدث اللي استحوذ على اهتمام السكان خلال الأيام التالية

الولايات المتحدة أصلًا مش مستضيفة كأس العالم علشان تحقق مكاسب سياحية أو تبني ملاعب جديدة لأنها بالفعل عندها بنية تحتية ضخمة واقتصاد عملاق.. الهدف الحقيقي من الاستضافة هو زيادة شعبية كرة القدم وتحويلها لرياضة أكثر تأثيرًا داخل المجتمع الأمريكي

وده نفس اللي حصل بعد كأس العالم 1994 اللي كان نقطة التحول الأكبر في تاريخ اللعبة داخل أمريكا وساهم بعد كده في نمو الدوري الأمريكي وتحويل كرة القدم لصناعة بتكبر سنة بعد سنة.. علشان كده التأثير الحقيقي لمونديال 2026 مش هيبان خلال أول أسبوع في البطولة لكنه هيبان بعد شهور وسنين، خصوصًا لو المنتخب الأمريكي قدر يوصل لأدوار متقدمة.