القصة ورا طبق عاشوراء.. وإيه أصل المناسبة وفضل اليوم؟

النهاردة يوم عاشوراء والاسم بيجي من اليوم العاشر من شهر محرم.. وهو من الأشهر الحرم في الإسلام.. والمسلمين بيصوموا فيه وبيتهادوا أطباق حلو العاشوراء.. واليوم ده ليه مكانة كبيرة وثوابه كبير.. فهنقولك قصة اليوم والأعمال المستحبة فيه

إيه قصة يوم عاشوراء؟

حسب وزارة الأوقاف.. يوم 10 محرم ربنا أخرج سيدنا موسى وقومه اللي آمنوا بيه من أسر فرعون وقهره ليهم.. ونجاهم وشق البحر لسيدنا موسى وغرق فرعون وجنوده.. فسيدنا موسى قرر صيام اليوم ده شكرًا لمساعدة ربنا ليهم.. حسب الآية الموجودة في سورة إبراهيم: “ولقد ارسلنا موسى بآياتنا ان اخرج قومك من الظلمات الى النور وذكرهم بأيام الله إن في ذلك لآيات لكل صبار شكور، وإذ قال موسى لقومه اذكروا نعمة الله عليكم إذ انجاكم من آل فرعون يسومونكم سوء العذاب ويذبحون ابناءكم ويستحيون نساءكم وفي ذلكم بلاء من ربكم عظيم”

ليه بنصومه؟

لما وصل سيدنا محمد للمدينة المنورة بعد الهجرة .. لقى اليهود بيصوموا يوم عاشوراء.. ولما عرف السبب قال إن صيام اليوم ده هيكون نيته الشكر والامتنان على نصرة ربنا لأوليائه.. وقال: “فَنَحْنُ أَحَقُّ وَأَوْلَى بِمُوسَى مِنْكُمْ”.. ومن هنا اشترك المسلمين وأهل الكتاب في أصل تعظيم يوم عاشوراء

الأعمال المستحبة في اليوم

1- صيام: يوم عاشوراء بيكفر ذنوب سنة كاملة فاتت وده حسب حديث سيدنا محمد: “أَحْتَسِبُ عَلَى اللهِ أَنْ يُكَفِّرَ السَّنَةَ الَّتِي قَبْلَهُ» (رواه مسلم).. 

2- التوبة: خاصة إن شهر محرم من الأشهر الحرم اللي بتعظم فيها الأجور 

3- كثرة تلاوة القرآن الكريم: خلي فيه ورد قرآن مكثف للنهاردة وتدبر في الآيات وقصص الأنبياء

طب إيه علاقة اليوم بطبق عاشوراء؟

– في الأول طبق عاشوراء ده هو عبارة عن حلويات مكونة من القمح واللبن وتشبه في قوامها الرز بلبن والبليلة

• اختلفت القصص عن تاريخ طبق عاشوراء فهنقولك على الروايات المختلفة: لدولة الفاطمية: كانت بتحتفل بيوم عاشوراء بالطبق ده ومش بس اليوم ده.. لأ كمان بتعملها في المولد النبوي وليلة النصف من شعبان 

• صلاح الدين الأيوبي: لما دخل مصر كان بيمحي أي عادة من عادات الدولة الفاطمية فمنع كل الحلويات اللي بتتعمل وقت الفاطميين وبدلها بأصناف تانية واللي كان منها طبق عاشوراء

• الرواية التالت هي إن الطبق ده مرتبط بسيدنا نوح وده الاعتقاد اللي كان منتشر في الدولة العثمانية.. وكانوا بيقولوا عليها “أشوري” أو “حلوى نوح”.. وبيقولوا إن الطبق بدأ مع النبي نوح اللي لما لقى إن الأكل على السفينة بقى بيجمع بقايا الأكل الموجود على السفينة ويطبخه وكان النتيجة بقى طبق العاشوراء اللي انت بتاكله النهاردة ده