نادي “هارتس”.. من حلم الفوز بالدوري للسقوط الحر

نادي هارتس الاسكتلندي كان على بعد خطوة من عمل موسم تاريخي بالفوز بالدوري لأول مرة من 62 سنة وكمان أول بطولة خارج سيلتيك ورينجرز من 1984 لما السير أليكس فيرجسون كسب البطولة مع أبردين

النادي خسر كل حاجة ومعنوياته بقت في الأرض بعد ما كان كل اللي محتاجه التعادل للفوز بالدوري بس خسر الدوري في آخر 10 دقائق قدام سيلتيك بنتيجة 3-1 وكمان فقد المقعد المؤهل مباشرة لدوري أبطال أوروبا

رحيل جماعي للاعبين والمدرب

ومن وقتها الفريق مش في أحسن حالاته.. لإنه من بعدها خسر ثاني هدافين الدوري وهداف الفريق “لوريانس شانكلاند” بـ16 هدف للغريم “رينجرز” 

واللاعب جاء بناء على طلب مدرب هارتس السابق “ديريك ماكينيس”.. اللي مضى برضه مع رينجرز

وحارس المرمى الأول للفريق الألماني “ألكسندر شفولو” مشي من النادي عشان عايز يرجع لبلده

وبعد سلسلة الخسارات دي بقى من الصعب تدعيم الفريق وأغلى صفقة حتى الأن 1.15 مليون يورو كانت المدافع “مالاكي فاغان-والكوت” 

بداية رد الفعل في موسم 2026\2027

النادي قال مش مشكلة.. خسرنا الدوري وخسرنا المقعد المباشر لدوري الأبطال جاب المدرب البلجيكي “ووتر فرانكين” من نادي سينت ترويدن.. وقالوا خلاص هنبدأ البناء فهنحاول نتأهل من التصفيات والخصم كان “شتورم جراتس” البولندي.. ولكن اللي حصل كان مفاجأة 

الفريق بيخسر 6-0 في مجموع المباراتين.. وماحتاجش مباراة العودة على ملعبة لإنه خسر 4-0 في الذهاب وهيشاركوا في التصفيات المؤهلة لدوري الأوروبي قدام بنفيكا في مهمة صعبة قدام المدرب ماركو سيلفا ولاعيبته أهمهم المهاجم الهداف اليوناني “بافليديس”

وقالوا برضه مش مشكلة احنا هنحاول نبدأ كويس في الدوري الأسكتلندي ونحاول نفوز به ولكن اللي حصل كان غير كده.. الفريق خسر من أبردين بنتيجة 2-1 في أول جولة بالدوري

هارتس في غيبوبة.. وبيحاول يستفيق!

من المتوقع إن مهمة هارتس هتبقى صعبة جدا الموسم ده ولكن الأكيد.. أن القصة دي بتورينا  قد إيه المجهود اللي بيتاخد طول الموسم ممكن يضيع في لحظة لو مافنشتش صح بالذات في كرة القدم.. وإن نتيجة واحدة دمرت النادي معنويًا ولسه بيحاول يستفيق

وهنشوف الأيام الجاية في موسم 2026\2027 وفي نهايته هارتس هيقدر يوصل لإيه ولا هيفضل مجرد قصة من قصص الـUnderdogs في الكورة؟