إزاي تعرف إنك بتستغل اللي حواليك وأنت مش حاسس؟

زي ما شوفتوا كده في العنوان، هل أنت بتستغل حد؟ سواء صديق أو حد بتحبه؟ لو أنت عارف إنك بتعمل كدة فدي مشكلة كبيرة تستلزم إنك تقابل طبيب نفسي لإن ده شيء مش كويس وممكن الشخص ده يكون بيحبك فمش حاسس إنك بتستغله، ولكن ماذا لو بتستغل اللي حواليك وأنت مش حاسس أو مش قاصد تعمل ده؟ ولذلك موقع A Conscious Rethink و موقع insider بيقولولنا على 12 علامة تعرف بيهم لو أنت شخص بتستغل الطرف التاني.

1- بيركز على نفسه وبس:

بيشوف نفسه إنه محور الكون، وهو واحتياجاته أهم من أي شيء تاني، ويحبوا جدا يشوفوا الطرف التاني بيخصص من وقته عشان يسمعهم ويديهم أي اهتمام، فحين إن الطرف التاني لو طلب من الشخص المستغل أي اهتمام.. مش هيديله حاجة.

2- مش بيفتكر التفاصيل:

مهما حكيت مع الشخص اللي بيستغلك عن مشاكلك في الحياة سواء في البيت ولا الشغل ولا أي حاجة تانية، هتلاقيه مش فاكر أي حاجة، وده لإنه أي حاجة بتقولها هما مش بيسمعوها ومش مهتمين إنهم يسمعوها أصلا، وده مؤشر قوي جدا على إن الشخص ده مينفعش يبقى صاحبك أو تبقى في علاقة معاه.

3- الفلوس الفلوس الفلوس

إحنا كمصريين معروفين دايما بالجدعنة، ولما بنبقى في خروجة بنتخانق مين يحاسب، ولكن في نفس الوقت ماينفعش إنك كل مرة تحاسب، ممكن تلاقي الشخص اللي بيستغلك بيقولك لا استنى هحاسب أنا وبتاع بس طالما سابك تستلم الشيك وتحاسب، فدي علامة على إنك الشخص ده بيستغلك ماديًا.. وطبعا لو بيتطلب منك فلوس كتير برا إطار الخروج وكدة فده استغلال بشكل مؤكد.

4- بيحملوك جمايل

عادة الشخص المستغل دايما يحب يصور نفسه إنه سوبر هيرو وأنت من غيروه هتضيع، ولما يقدملك خدمة ولو حتى صغيرة، هيحسسك إنها حاجة كبيرة جدا وإنها قد إيه كنت صعبة وخدت منه وقت، فده بالتالي بيحسس الطرف التاني بالذنب وبالتالي برضه يطلبوا من الطرف التاني خدمة أكبر بكتير في المقابل ويلعبوا على حتة معينة واللي هي أنا عملت عشانك كذا كذا عشان يحسسوك بالذنب وتبقى حاسس إنك مدين ليهم

5- عامل إيه أزيك.. بقولك صحيح

عشان الشخص مستغل صايع بكفاية، بيعرف إمتى يبقى حلو معاك عشان يطلب منك حاجة، والنوع الأصيع منهم بيكمل في اللطافة والشخصية الجميلة بتاعته بعد ما تنفذله اللي هو عايزه برضه لفترة قصيرة.. وواحدة واحدة يختفوا تماما.. لحد ما يرجعوا تاني لما يكونوا عايزين حاجة.

6- مش بيحبوا يبذلوا مجهود

الطرف التاني بيكون مطلوب منه يجري في أي حاجة، فحين إن الشخص المستغل لا بيحط خطط ولا بيبذل مجهود عشانك ولا يجبلك هدية مثلا، فلو أنت في Relationship بالمنظر ده.. إجري!

7- بكلمك عشان عندي مشاكل 

في دايما في أي شلة، الصاحب بتاع القعدة الحلوة، لكن تقوله مشوار مصيري ولا عندي ظروف يقولك أنا مش سامعك من الدي جي، وكذلك الشخص المستغل بقى بس ده لما يكون في مشاكل أو ظروف تلاقي يكلمك فجأة ويلا ننزل ونروح ونيجي وأنت تبقى مستغرب إيه ده من إمتى!.. وفي لحظة يختفي.. بس طبعا أنت كشخص بالغ بعد اللي أنا قولته استحالة تسمحلهم يرجعوا تاني بالمنظر ده صح؟ أوعى ها!

8- أوعى تقول لا!

الشخص المستغل صايع جدا في نقطة التلاعب بالطرف التاني، بيمارس ضغط كبير عليك ولو قولت لا فا أنت كدة عملت كارثة وهيحسسك إن العلاقة سواء صداقة/عاطفية  هتنتهي فأنت تضطر تقبل وتبقى حاسس بالعجز ويفضلوا يتلاعبوا بيك أكتر وأكتر لحد ما توصل لمرحلة إنك مش بتقول لا على أي حاجة.. زي كأنك قُرص الطعمية والطعمجي بيعمله كورة ويشكله قبل ما يرميه في الزيت!

9- يحبوا يكلموك بليل

هو موضوع غريب شوية إن يكون فيه علاقة بين الشخصية المستغلة وإنه يتصل بيك بليل خصوصا في العلاقات العاطفية، ولكن ده علامة على إن مفيش أي حاجة تانية يعملها الشخص المستغل وإنك أنت أخر “شيء” قرر يلجأ له وهو زهقان بليل.

10- بيكلمك لما صاحبه يبقوا مشغولين

النقطة دي تخص أوي علاقات الصداقة، وهو إن الشخص اللي بيستغلك يكلمك لما صحابه ميكونوش موجودين، وأنت للأسف فاكر إنه بيحبك وبيتواصل معاك يطمن عليك.

اللي بيحصل إنه بيبقى عايز يفضل ماسكك أو حاطك في الـ”استبن زون” وهو إن كل ما صحابه يكونوا مشغولين فيكلمك ولكن في نفس الوقت لما هينزل مع صحابه مش هيقولك تعالى معايا مثلا أو تعالى نخرج في المطلق.. وهنا أنت محتاج تعيد النظر في العلاقة دي واللي واضح فيها جدا إن بيتم استغلالك بشكل سيء.

11- الشخص المستغل مش بيوفي بوعده

لو في مرة عملت صفقة مع شخص مستغل، إنك تقدمله حاجة وفي المقابل هو هيقدملك حاجة، هتلاقي نفسك وفيت من ناحيتك ومن ناحيته هيقولك برضه “أنا مش سامعك من الدي جي”.

12- خلصت خلاص وفاض بيا

أي علاقة صحية سواء صداقة أو عاطفية لازم تبقى متوازنة، وماتبقاش عامل زي الفنان عبد الباسط حمودة لما قال: “مخدتش بس بدي”، فأنت بتدي وبتهتم وبتسمع ولكن في المقابل مفيش حاجة، وبالتالي ده هيخليك تحس بإنك أُرهقت وجبت أخرك.. فهنا هتكون وصلت للمرحلة الأخيرة وهي إنك شخص مٌستغل بنسبة 100%

….

وفي النهاية يا عزيزي وعزيزتي.. مش وحش إنك تكون شخص حاضر دايما مع غيرك، وبتسمع وتهتم وتساعد وتستقبل حتى مكالمات من ناس في وقت متأخر عشان هما محتاجين يتكلموا مع حد.. كل ده جميل.. ولكن فكر أنت لما تبقى مكانهم مين بيكون موجود معاك؟ لو مش موجودين فأنت محتاج تعيد تقييم علاقاتك مع الناس دي.. ولو طلع فيك الصفات دي وبتعملها مع حد وأنت مش واخد بالك محتاج تشوف هتتصرف إزاي عشان اللي ماتقبلوش على نفسك ياريت ماتقبلوش على الناس.