أغرب 8 قوانين في العالم: اللبان ممنوع

13 سبتمبر هو اليوم العالمي للقانون، بتكون فرصة كويسة لاستحضار أهمية القانون في حياة الدول والشعوب، وقد إيه القانون وسيلة فعالة لتنظيم شؤون الحياة، ولكن على جانب تاني، في قوانين غريبة جدا هتلاقيها في بعض الدول، ويمكن تكون سمعت عن جزء منهم بس الأكيد إنك هتستغرب لما تعرفهم كلهم.. ولذلك، حبينا نستعرض سوا أغرب 8 قوانين في العالم حسب موقع “Far And Wide” وموقع “Insider”:

1- سنغافورة: اللبان ممنوع:

مجلس الإسكان والتنمية في سنغافورة كان بيصرف سنويًا 150 ألف دولار عشان ينضف اللبان اللي مرمي في الشارع لحد ما تم حظره في 1992، وأي حد بيستوردها أو يصنعها أو يبيعها بيبقى معرض لعقاب من الاتنين يدفع غرامة أو يتسجن، باستثناء العلكة الطبية.

2- كندا: الراديو الكندي للكنديين:

محطات الإذاعة الكندية بيتم مطالبتهم بتشغيل أغاني للمطربين الكنديين على الإذاعات بنسبة 35% على الأقل خلال فترة البث وخصوصا من 6 الصبح لـ 6 بليل ومن الاتنين للجمعة.

3- ألمانيا: طريق الأوتوبان أو الطريق السريع الألماني:

هو طريق زي طريق السويس بتاعنا كدة أو صلاح سالم، لو بنزينك خلص على الطريق وعطلت فدي مخالفة قانونية ممكن تدفع بسببها غرامة كبيرة.

4- إيطاليا: متأكلش الحمام وهو لسه واكل:

السياح لما بيروحوا فينيسيا أو البندقية في إيطاليا يحبوا يقعدوا يأكلوا الحمام ويالا نصورهم ونزلها ستوري، فالمشرعين اتضايقوا من الحوار ده لإنه  كل سنة بيكلف المواطن 275 يورو في السنة فقالوا لو لقينا حد بيأكل الحمام هيدفع غرامة 700 يورو، وابقى روح صور أي حاجة تانية غير الحمام وأنت بتأكلوا.

5- فرنسا: أوعى تموت من غير مدفن:

في منطقة “ساربورنكس” في فرنسا، عمدة القرية أصدر قرار في 2008 بيمنع السكان يموتوا على أراضي القرية إلا وهما عندهم مدفن، أيوة أنت قريت صح، طيب هو عمل كده ليه؟ قال إنه خد القرار العجيب ده للاحتجاج على حكم قضائي بيمنعه من توسيع المقابر في القرية، يعني لو لقدر الله مت في القرية دي هتبقى عامل زي الهضبة “عايش ومش عايش” بالنسبة للمسؤولين في القرية.

6- الدنمارك: إيه الاسم ده!:

في دولة الدنمارك قانون عجيب شوية، وهو إنك ماينفعش تسمي ابنك أي اسم وخلاص، لا هما 7000 اسم نقي منهم براحتك ولو عايز اسم جديد و”كريتيف” تروح للحكومة تاخد إذنهم.

7- جورجيا: خد بالك من فراخك:

مدينة “كويتمان” قررت في مرة تعلي على كل اللي فوق دول وأصدرت قانون بيمنع الفراخ إنها تعدي الطريق، يعني لو أنت صاحب مزرعة فراخ وسبت واحدة منهم تخرج وتعدي الشارع هيتم تغريمك.

8- البرتغال: شكرا يا سيدي متسخنش المياه:

دولة البرتغال سنت قانون بيمنع أي حد إنه يعمل حمام في المحيطات، الحقيقة إحنا مش عارفين هيقدروا يعرفوا إزاي الشخص اللي عمل كده! ولكن على كل حال خليك إنسان حضاري وامسك نفسك لأقرب حمام لإن سواء في قانون أو لا ده شيء مش حلو.