5 أسباب لعدم ظهور شعر الدقن غير قلة هرمون التستوستيرون

بعض الناس ممكن يكونوا بيعانوا من إن دقنهم مش بتطلع أو خفيفة، فلو مابتطلعش ماتفضلش تحلق فيها كتير لإنها مش هتطلع برضه، وده حسب ما قال موقع “Healthline”.

لإن الموضوع بيجي من البصيلة نفسها اللي موجودة تحت الجلد، فبالتالي الحلاقة ملهاش علاقة بنمو شعرك.

وموقع Healthline بينفي أسطورة تانية وهي إن الأشخاص اللي دقنهم تقيلة عندهم هرمون التستوستيرون أكتر من الناس اللي دقنهم خفيفة، هو أه في علاقة بين الهرمون ده ونمو شعر الوجه ولكن نادر إن يكون انخفاض الهرمون له سبب في قلة شعر الوجه.

ولذلك، موقع Healthline بيقولنا على 5 أسباب لخفة شعر الدقن:

1- علم الوراثة أو الجينات:

سماكة اللحية بتتحدد من خلال العوامل الوراثية، يعني لو أبوك أو أجدادك عندهم دقن تقيلة فده هيكون عندك أنت كمان بالتبعية.

الأندروجينات هي عبارة مجموعة من الهرمونات اللي بتكون عندك السمات الذكورية زي دقنك وصوتك التخين.. وحسب الموقع، فيه انزيم اسمه 5-alpha reductase بيحول هرمون الأندروجين لهرمون تاني اسمه dihydrotestosterone (DHT).

ولما بيحصل ارتباط بين الـDHT وبين المستقبلات الموجودة في بصيلات الشعر، ده بيحفز نمو شعر الوجه، وبيتحدد قوة التأثير من خلال حساسية بصيلات الشعر للـDHT والحساسية دي بقى نفسها، بتتحدد من خلال العوامل الوراثية الخاصة بيك.

2- السن:

الخبر السعيد بقى، اللحية بتكبر مع تقدمك في العمر، يعني لو خفيفة العشرينات، ممكن ع التلاتينات تلاقيها تقلت.

3- العِرق:

لا مش العرق اللي بنعرقه في الحر، ولكن المقصود بيه هو العِرق اللي أصولك بترجعله، ده ممكن يكون له تأثير على نمو شعر وجعك، على سبيل المثال، الأشخاص اللي من دول البحر المتوسط ممكن يكون عندهم شعر دقن أتقل مقارنة بأشخاص من مناطق تانية.

وحسب دراسة ألمانية اتعملت في 2016، قالت إن نمو شعر الوجه عند الصينيين أقل من الراجل القوقازيين، وإن نمو الشعر عند الصينيين بيتركز أكتر حوالين الفم، ولكن بيطلع على الخدين والرقبة والذقن عند القوقازيين.

ونفس الدراسة قالت إن قُطر الشعراية بيتراوح بين 17 لـ 180 ميكرومتر وده بيكون عامل مساهم في سماكة الدقن نفسها وإن ده بيؤدي إلى إن الشخص يكون عنده دقن أتقل والشعر فيها أكتر.

4- الثعلبة:

مرض الثعلبة هو من أمراض المناعة الذاتية، اللي بيحصل إن جهازك المناعي بيبدأ في محاربة بصيلات الشعر، وده بيؤدي لتساقطه من فروة الرأس ومن مناطق تانية في الجسم، وبتبقى على شكل بقع.

مفيش علاج معين للثعلبة، ولكن بالمتابعة مع دكتور بينصح بكذا دواء أو خيار للعلاج زي أدوية أو كريمات أو حقن أو أقراص.

5- انخفاض مستويات هرمون التستوستيرون:

في بعض الحالات انخفاض مستوى الهرمون التستوستيرون بيؤدي لضعف نمو اللحية، أو مايكونش فيه شعر تماما.

ولو في انخفاض في الهرمون بيكون في علامات تانية زي:

– انخفاض الدافع الجنسي

– ضعف الانتصاب 

– تعب

– مشاكل في بناء العضلات

– زيادة دهون الجسم

– التهيج وتغيرات المزاج

طيب في حل للقصة دي؟

حسب موقع Healthline، لو مفيش حالة طبية بتمنع نمو دقنك، في عدة طرق تخليها تبقى أتقل زي:

– اتباع نظام غذائي صحي بيديك كل العناصر الغذائية اللي محتاجها.

– لو كنت في بداية العشرينات فاصبر، دقنك بتكبر مع الوقت على فكرة.

– التقليل من التوتر هيساعد، لإن بعض الأبحاث وجدت علاقة بين فقدان الشعر، والإجهاد بيأثر على سمك اللحية، ولكن الرابط ما بينهم مش واضح في الوقت الحالي.

– نام كتير، النوم بيحسن من الصحة بشكل عام.

– التدخين ممكن يأثر بشكل سلبي على صحة بشرتك وشعرك، تجنبه.

في النهاية، قصة شعر الدقن دي ليها عوامل كتير ولكن أهمهم هي الوراثة، ودي حاجة مش هتتغير خلاص، ولكن مع اتباع النصائح اللي فوق، ممكن ده يساهم ولو بشكل بسيط في إنماء شعر الدقن، ولو حاسسها خفيفة، فاتقل شوية ممكن على التلاتين كده تلاقيها تقلت ومن الآخر.. دقنك في النهاية هتبقى عامله زي دقن أبوك، فلو بتقرأ الموضوع وهو صاحي قوم بص على دقنه وتفحصها بس متخلهوش يخاف ويقلق.