أسوأ 15 حاجة ممكن تعملها وإنت عندك برد 

الناس اللي بتحب الشتا دايما بتحبه عشان الهدوء والقعدة في البيت والسحلب والهوت شوكليت والبس الحلو بس برضه موسم الشتا هو موسم نزلات البرد وده من أغلس الأمراض اللي ممكن تواجها سواء كان في الصيف أو الشتا، بس في الشتا مشكلته إنك ممكن تتعب أكتر لو اتعرضت لشوية هوا أو برد أكتر.

واكتشف الباحثين في  جامعة ييل في 2015 إن الجو البارد اللي بيجي مع الشتا بيضعف نظام المناعة وده اللي بيخلي جسمك يبقى معرض أكتر لنزلات البرد بمجرد ما الجو يسقع، فطبعا أول ما بيجيلنا برد خصوصا في الشتا بنبقى متعوديين على الموضوع جدا فمحدش بيروح لدكتور والكل بيستخدم وصفات متعود عليها، بس الحقيقة إن فيه عادات أو وصفات بتبقى فاكرين إنها ممكن تخلينا نخف بس هي أسوأ حاجات ممكن تعملها وإنت عندك برد زي ما قال موقع bestlifeonline:

1-  إنك تاخد مضاد حيوي:

عن طريق تعريف المضادات الحيوية فهي بتتاخد عشان تواجه بكتريا في الجسم، بس إنت بتاخدها عشان البرد والبرد عبارة عن فيروس مش بكتريا، ولما بتاخد المضادات الحيوية من غير سبب ده بيخلي جسمك مايستخدمهاش لما بتبقى محتاجها، فبلاش تاخد المضادات الحيوية من نفسك وماتخدهاش إلا لو دكتور كتبهالك.

2- تشرب عصير برتقان:

بالرغم كل اللي اتعودنا عليه من واحنا صغيرين، بس عصير البرتقان بيسبب ضرر وقت البرد أكتر ما بينفع، لإن عصير البرتقان هو عصير حمضي فبيحرق الأغشية في زورك لما بتكون تعبان، ” مايكل كلابر” حذر تعلى الموقع بتاعه من السوائل الحمضية وقال إنها بتحرق الأغشية، وقال إن الناس لازم تتجنب عصير البرتقان والأناناس والكولا وأي سائل حمضي.

3- ماتنفش جامد:

كبرت وكل الناس قالولك وإنت صغير إنك لازم تنف كويس عشان تخرج كل اللي في مناخيرك، بس فيه بحث علمي اتنشر في مجلة ” Clinical Infectious” سنة 2000 وقال إنك بتلهب مناخيرك بسبب قوة الدفع دي، لإن كده المخاط ممكن يسبب إلتهاب في جيوب الأنفية.

4- ماتنفش كتير برضه:

إنك تنف كتير زي بالظبط إنك بتنف جامد، وفقا لمقال اتنشر في 2016 لخبير في جامعة  كاليفورنيا في بيركلي، النف كتير ممكن يسبب انفجار في الأوعية الدموية في المناخير ويسبب نزيف، خصوصا إن الغشاء المخاطي بتبقى مهيجة أصلا من البرد.

5- ماتنمش نوم كفاية:

لما بيجيلك نزلة برد الأجسام المضادة لمقاومة البرد بتشتغل بليل، لكن الحرمان من النوم بيمنع الجهاز المناعة بتاعك من إنه يمارس وظيفته، ووفقا لدراسة اتنشرت في مجلة ” Sleep” في سنة 2017 فلو نمت أقل من 7 ساعات في اليوم ده هيضعف نظام المناعة عندك حتى لو ماعندكش برد، وقالوا في بحث تاني في نفس المجلة إن الأشخاص اللي مابيناموش كويس بيقوا عرضه للزكام أكتر.

6- الضغط:

حاول إنك تهون الأمور على نفسك لما تبقى تعبان، ووفقا  لجمعية علم النفس الأمريكية فالتوتر ممكن يضعف جهاز المناعة بتاعك وده بيخلي الجسم مايقدرش يقاوم البكتريا والفيروسات، وده مهم بشكل أكبر للناس اللي كبروا في السن، وده لإن الشيخوخة بتضعف جهاز المناعة أصلا.

7- إنك تغسل إيدك كتير:

بالرغم إن الدكاترة دايما بيوصوا بغسيل الأيدين كتير وقت البرد عشان البكتريا إلا إن غسيل الأيدين كتير بيضعف نظام المناعة وبيخليك عرضه أكتر للإصابة بالأمراض، فيه بحث اتعمل في  الصحة العامة بجامعة ميشيغان في 2011 بيثبت إن غسيل الأيدين بشكل مستمر وزيادة بيضعف جهاز المناعة بتاعك  وبيمنع الجسم من مكافحة العدوي بشكل صحيح.

8- مابتشربش مياه كتير:

فيه سبب أكيد بيخلي كل الدكاترة بيوصوك تشرب 8 كوبايات مياه على الأقل في اليوم، لإنك لما بتقلل مياه جسمك بيجي له جفاف وده اللي بيسبب نقص  البروتينات المضادة للميكروبات في اللعاب، والبروتينات بتلعب دور كبير في دفاع الجسم، وشرب كميات مياه كفاية بيخلي العدوى على الأقل ماتزيدش.

9- تدرب جامد:

بالرغم إنك مابتبقاش عايز توقف التدريب عشان شوية برد إلا إنه مهم توقف لإن التمرين ممكن يزود فترة التعب، والكلام ده اتنشر في مجلة دولية للطب الرياضي 1994، لكن الدراسات الحديثة في 2017 لقيت إن التمرين لمدة معتدلة حوالى 20 دقيقة في اليوم ممكن يبقى بيساعد على مكافحة العدوى.

10- إنك تستخدم قطرات لمناخيرك:

خلي بالك من الاستخدام الكتير لقطرات الأنف اللي بتساعدك عشان تتنفس، لإن كتر استخدامه بعد كده بيخلي الأوعية الدموية محصنة ضده وبيزود انسدادها.

11- التدخين:

لما بيكون عندك نزلة برد بتخليك أصلا تكح لوحدك والسجاير بتخلي الموضوع أصعب، وقال  براندي بلاك خبير التغذية الشامل إن السجاير أصلا بتضعف الجهاز المناعي، فلما بتكون عندك نزلة برد رئتك بتعمل مجهود مضاعف عشان تتخلص من العدوى.

12- الكحول:

أول ما تشتبه إن عندك نزلة برد بلاش تفكر في أي خطط فيها كحوليات خالص، فيه دراسة اتعملت سنة 2015 إن ليلة واحدة بس من الشرب قادرة تضعف جهازك المناعي وبتأثر على أداءه.

13- إنك تروح الشغل:

حتى لو كنت مش عايز تعترف إن عندك برد وعايز تقاوح بس مش صح خالص إنك تنزل الشغل في وقت البرد وتعرض كل زمايلك في العمل بخطر الإصابة بالعدوى، وعموما لما بتروح الشغل بتنسى إيه اللي جسمك محتاجة وبتنسى حاسس بإيه، فمثلا لو روحت الشغل مش هيبقى عندك وقت كفاية للراحة أو إنك تشرب كمية كفاية من السوائل أو تاكل الأكل اللي جسمك محتاجة.

14- إنك ماتخدش فيتامين C:

مش معنى إنك ماينفعش تشرب عصير برتقان وإنت عندك برد يعني ماينفعش تاخد حاجة فيها فيتامين C ، فيه باحثين في جامعة هلسنكي عملوا بحث في 2017 درسوا فيه تأثير الفيتامين على الفيروسات ولقوا إن الأشخاص اللي بياخدوا فيتامين C كل يوم كانت مدة البرد بتاعهم أقل بنسبة 19%.

15- تعطس أو تكح في إيدك:

أول ما الواحد بيبقى عايز يعطس في مكان عام مابيستناش منديل أو حاجة وبيستخدم ايده على طول عشان يمنع انتشار الجراثيم، لكن الحقيقة إنك لما تعطس في إيدك بيبقى أوحش من لما تعطس في الهوا.