8 حاجات لازم تعرفها عن التراث الفلسطيني

فلسطين من أكتر الدول العربية اللي بتتميز إن ليها تاريخ وتراث طويل بتحافظ عليه دايما علشان كده في الموضوع ده هنقولك على أكتر الحاجات المشهورة بيها فلسطين وفقا لموقع وكالة الأنباء والمعلومات الفلسطينية.

1-المسجد الأقصى:

هو من أكبر وأقدم مساجد العالم و أول القبلتين في الإسلام عشان كده ليه مكانة كبيرة عند العرب والمسلمين.

2-أكبر شجرة زيتون في العالم:

فلسطين مشهورة بزراعة الزيتون لأن أراضيها من أفضل الأراضي الزراعية وده بسبب مناخها المعتدل في الشتاء عشان كده فيها أكبر شجرة زيتون في العالم شجرة “زيتونة البدوي” اللي عمرها أكتر من 5 ألاف سنة .  

3-الدبكة الفلسطيني:

فلسطين بتشتهر باهتمامها بالفلكلور الشعبي والموسيقى والرقص ومن أشهر تراثها الفني هي رقصة الدبكة الفلسطينية المميزة اللي بيرقصوها الرجالة والستات في الأعياد والاحتفالات.

4-المطبخ الفلسطيني:

فلسطين بتتميز  بأكلاتها الشهية المميزة زي المنسف والمقلوبة وغيرهم كتير ومن أهم الأطباق الوطنية الرسمية وجبة “المسخن” اللي بتتكون من العيش والبصل والسماق والفراخ المسلوق وزيت الزيتون.

5-المشروبات الفلسطينية:

من المشروبات الأيقونية عند الفلسطينيين القهوة العربية لأنهم بيعتبروا تعبير عن حسن الضيافة وبيتم تقديمها في المناسبات المختلفة وكمان من المشروبات المهمة شاي الميرمية.  

6-الزي الفلسطيني:

من أكتر الحاجات اللي بتتميز بيها فلسطين هي حفاظها على هويتها الثقافية من خلال الهدوم اللي بتشهد على تاريخها زي الكوفية اللي بترمز لنضالهم على مر العصور وكمان زي المرأة الفلسطينية اللي بيتكون من البشنقية (المنديل) والشملة (الحزام) والثوب المجدلاوي والشروقي.

7-فن التطريز:

هو فن شعبي من التراث الفلسطيني وبقى أساسي في ثقافتهم خاصة في تزيين وتطريز ملابس العروسة ومفارش البيت وكل منطقة ليها ألون تطريز ونقاشات معينة بتعبر عنها وبترمز ليها. 

8-  الشعر الفلسطيني:

الشعر كان بيمثل وسيلة مهمة للشعب الفلسطيني للتعبير عن نفسه خاصة بعد نزوح الفلسطينيين سنة 1948م ومع الوقت بقى جزء من السياسة ومن أهم الشعراء الفلسطينيين الشاعر الكبير محمود درويش اللي أُطلق عليه “شاعر العالم العربي”.