للأمهات.. إزاي تحمي طفلك من التحرش؟

كل أم وأب بيكونوا حريصين على حماية أطفالهم وتوفير الأمان اللي يمنع عنهم أي أذى.. بس ممكن يفقدوا الدور ده لو الطفلة أو الطفل بعيد عنهم سواء مدرسة أو حضانة أو عند بعض القرايب.. وبحسب منظمة الصحة العالمية فـحوالي مليار طفل في المرحلة العمرية 2-17 سنة تعرضوا لعنف بدني أو جنسي.. حوالي 1 من كل 10 فتيات تحت سن الـ20 أجبرن على ممارسة الجنس أو القيام بأفعال جنسية أخرى بحسب اليونيسف…
وعشان ده مايحصلش ونحمي أطفالنا من العنف الجنسي أو التحرش.. هنقولكم على 10 خطوات وفقًا لموقع Child Mind و  voice of child و American Academy of Pediatrics

1- تسمية أجزاء الجسم: الكلام مع الطفل عن أجزاء الجسم وتسميتها بشكل مناسب لسنهم عشان يقدروا يعبروا لو حصل أذى جسدي ليهم.

2- خصوصية بعض الأماكن: تعليم الطفل إن الأجزاء دي من الجسم خاصة وماينفعش حد يشوفها.. زي أنه مايغيرش لبسه بره البيت إلا بوجود بابا وماما.. ومين مسموح له يدخل معاه الحمام.. وممنوع تصوير أجزاء جسمه دي.

3- حدود الجسم: تعليم الطفل بحدود التلامس في اللعب أو الهزار.. وأنه ماينفعش حد يلمس أعضائه الخاصة.. زي برضه ماهو ماينفعش الطفل يلمس الأجزاء الخاصة لحد لو اطلب منه ده.

4- مافيش أسرار: تعليم الطفل أن الأفعال دي اللي زي لو اتعرض لها لازم يحكي عنها.. حتى لو مرتكب الفعل أقنعه أنه يفضل سر بينهم.. لأن الحاجات دي مافهاش أسرار حتى لو الجاني هدده بأنه هيؤذيه.

5- الخروج من المواقف المخيفة أو غير المريحة: تعليم الطفل أنه يرفض لو حس بعدم ارتياح ويقول “لا” عادي للشخص حتى لو أكبر سنًا منه.. ولو الطفل كبير شوية يمشي ويسيب المكان لو حس بحاجة غلط.

6- طلب المساعدة: تعليم الطفل إزاي يطلب المساعدة من حد في المكان اللي هو فيه لو حس بحاجة مضيقاه.. أو اتفاق على كلمة “سيم” تبقى إشارة لو بابا وماما معاه في نفس المكان بس مشغولين.

7- التواجد وسط مجموعات: تنبيه الطفل بعدم الذهاب مع أى شخص لا يعرفه.. والحرص على الجلوس مع أصدقائه أو وسط مجموعة.. وتعويد أنه يحافظ على وجود مسافة آمنة بينه وبين الآخرين.

8- التعليمات تسري  على المقربين: توعية الطفل بأن ده ماينطبقش بس على الغرباء.. لكن الأصدقاء أو العمات أو الأعمام.. أو المعلمين والمدربين. حتى لو كنت بتحبهم.. فـممنوع يلمسوا أعضائه الخاصة.

9- المراقبة: ضروري تراقب/ي محتوى الفيديوهات اللي بيشوفها الطفل وتكون/ي حريص/ـة أنه مايتعرضش لأي محتوى جنسي.

10- مراجعة المعلومات باستمرار: اتكلم مع طفلك دايمًا وخصوصًا الأوقات وهو بيغير ملابسه زي الاستحمام.. ووقت النوم.. وزيارة الطبيب.. وقبل أي موقف جديد بشكل عام.

وفيه 12 علامة تقدر تعرف منهم لو طفلك اتعرض للتحرش كنا اتكلمنا عنهم قبل كده