في اليوم العالمي لجائزة نوبل.. اعرف أكتر عن الجائزة ومجالاتها والمصريين اللي كسبوها
Awarded for “the greatest benefit to humankind”
تُمنح لمن حقق “أعظم فائدة لصالح البشرية”
بمناسبة اليوم العالمي لجائزة نوبل خلونا نعرف أكتر ايه هي جائزة نوبل ومجالاتها.. ونعرف كمان علاقتها بـ مصر ومين اللي كسبها وكسبها في مجال ايه؟
عن جائزة نوبل:
هي مجموعة جوائز دولية سنوية في مجالات الفيزياء والكيمياء والطب والأدب والسلام والاقتصاد، الأب الروحي ليها هو “ألفريد نوبل” ولد عام 1833 وتوفي عام 1896 وهو مخترع الديناميت.. اللي كان مادة غير آمنة ممكن تنفجر في أي وقت وده اللي حصل مع أخوه في مصنع ليهم وأدى لوفاته ومن بعدها قرر يخليها مادة أكثر أمان وشعر ألفريد نوبل بالذنب بعد الاستخدام الموسع للديناميت في الحروب.. فقرر يخصص جزء كبير من ثروته كجوائز للاختراعات العلمية اللي بتفيد تحقيق السلام.
العالم السويدي كتب في وصيته سنة 1895 “إن الشهرة تروح لجوائز نوبل اللي بيتم منحها سنوياً للناس اللي بتقدم أعظم فائدة بشرية في المجالات دي، وجائزة نوبل اتحطت في وصيته عشان كان خايف من استخدام التكنولوجيا والعلوم دي في الحرب.. فا وصى إنها “تكون للناس اللي بتعمل جهود إستثنائية لتعزيز السلام وحل النزاعات بين الأمم”.. حسب الموقع الرسمي للجائزة “Nobel Prize” إن ما بين 1901-2022 مُنحت جوائز نوبل 621 مرة لـ 1000 شخص ومنظمة والجائزة بتديرها مؤسسة نوبل في ستوكهولم بالسويد.
عام 1968 أنشأ البنك المركزي السويدي جائزته في العلوم الاقتصادية تخليداً لذكرى ألفريد نوبل مؤسس جائزة نوبل وكل جائزة فيهم بتتكون من ميدالية وشهادة شخصية ومبلغ مالي.
مين المصريين اللي كسبوا جائزة نوبل؟
نجيب محفوظ
ولد نجيب محفوظ سنة 1911 بحي الجمالية في القاهرة، التحق بالكتاب واتعلم القراءة والكتابة وسنة 1930 التحق بكلية الآداب جامعة فؤاد الأول “القاهرة حالياً” وحصل على ليسانس الفلسفة وبدأ رحلة الماجستير لكنه ماكملهاش بسبب العمل.. كان مدير الرقابة الفنية ومدير عام مؤسسة دعم السينما وفي الآخر رئيساً لها لحد ما طلع عالمعاش سنة 1971.
بعد المعاش كان بداية تركيز نجيب محفوظ على الأدب واللي أغلبه مستوحى من أعماق أحياء القاهرة خصوصاً حي الجمالية اللي اتولد فيه، كانت انطلاقته لكتابة أكتر من 30 رواية أغلبهم كان مشهور وتم توظيفه في السينما أو التليفزيون.
من أشهر كتاباته الثلاثية “بين القصرين – قصر الشوق – السكرية” وكمان ثرثرة فوق النيل، الكرنك، بداية ونهاية، اللص والكلاب، أولاد حارتنا، والحرافيش.
عام 1988 حصل الأديب المصري نجيب محفوظ على جائزة نوبل في الأدب ومن بعدها أُطلق عليه لقب “العربي الوحيد الحاصل عليها” وبيتقال إن مفيش حد سبقه في التقدير المادي والمعنوي كأديب يكتب بلغة الضاد من الأدباء العرب ولا حتى جه بعده وتوفي سنة 2006.
أحمد زويل
ولد أحمد زويل سنة 1946 وحصل على شهادته الجامعية في مصر وبعدها سافر الولايات المتحدة الأمريكية عشان ياخد الدكتوراه من جامعة بنسلفانيا وسافر لجامعة كاليفورنيا عشان يحصل على الزمالة.. وفي الآخر التحق بهيئة التدريس في معهد كاليفورنيا للتكنولوجيا.
في 2009 عينه رئيس أمريكا أوباما في المجلس الاستشاري الرئاسي في البيت الأبيض، وكمان عينه أول مبعوث علمي للولايات المتحدة إلى دول الشرق الأوسط.. حصل على 50 درجة فخرية في مجالات العلوم ومجالات تانية كتير، ومُنح أكتر من 100 جائزة عالمية من بينها جائزة ألبرت أينشتاين، وفي مصر حصل على وسام الاستحقاق من الطبقة الأولى وعلى قلادة النيل وهي أرفع وسام مصري.
سنة 1999 حصل زويل على جائزة نوبل في الكيمياء لأبحاثه الرائدة في الفيمتو ثانية واللي فتحت مساحة لمراقبة حركات الذرات أثناء التحولات الجزيئية في زمن الفيمتو ثانية وهو جزء من مليون مليار جزء من الثانية وتوفي عام 2016.
محمد أنور السادات
ولد السادات في 1918 بمحافظة المنوفية واتخرج من الكلية الحربية سنة 1938 واختاره جمال عبدالناصر نائباً له وعقب الوفاة تولى رئاسة الجمهورية في 1970.. كان صاحب قرار العبور في حرب أكتوبر 1973 وأعاد فتح قناة السويس.
عام 1977 اتخذ قراره بزيارة القدس عشان يحقق السلام وعام 1978 أسس الحزب الوطني الديمقراطي وبعدها في نفس السنة حصل على جائزة نوبل في السلام عشان تحقيقه للسلام في منطقة الشرق الأوسط في مفاوضات استمرت لمدة 12 يوم.
محمد البرادعي
عالم قانون ودبلوماسي مصري ولد في حي الدقي بمحافظة الجيزة سنة 1942 واتخرج من كلية الحقوق جامعة القاهرة، اشتغل في منصب المدير العام للوكالة الدولية للطاقة الذرية من 1997 لحد 2009.. واتعين نائب رئيس مصر لمدة شهرين تقريباً في 2013.
عام 2005 اختارت لجنة جائزة نوبل “الوكالة الدولية للطاقة الدولية” ومديرها محمد البرادعي عشان يكسبوا جائزة نوبل في السلام عشان الجهود اللي بذلوها في عدم استخدام الطاقة الذرية لأغراض عسكرية وضمان الاستخدام السلمي ليها.
