في عيد ميلاده.. ليه أحمد يونس مذيع مختلف؟

كتب: عمر هشام

النهاردة 30 يناير عيد ميلاد الإعلامي ومذيع الراديو “أحمد يونس”.. واحد من أشهر مذيعين الراديو في مصر.

أحمد يونس من أكتر المذيعين الناجحين والمختلفين.. طول الوقت بيقدم شغل مختلف وبرامج متنوعة.. وبيعمل أكتر من حاجة في نفس الوقت.. فشغله الأساسي إنه مذيع ومقدم برامج راديو لكن بيقدم حاجات مختلفة من شغل خبري ومجتمعي ورعب.. وفتح مطعم وكافيه كبيزنيس خاص بيه بعيدا عن شغل الإذاعة والبرامج.. ومع ده كمان بقى كاتب وروائي وقدم روايات وكتب كتير.

أحمد يونس.. ماينفعش يبقى مذيع راديو!

ناس كتير مش عارفين القصة دي.. بس في بدايات أحمد يونس لما كان بيحاول يبقى مذيع راديو.. اترفض بسبب إن “صوته مش مناسب كمذيع راديو”.. لو كان استسلم وأحبط واقتنع بفكرة إن “صوته مش مناسب” أو إنه “ماينفعش” كنا خسرنا مذيع راديو ناجح ومختلف.. لكن بسبب إصراره، وطموحه، وإبداعه كمان، بقى واحد من أهم وأشهر مذيعين الراديو في مصر.

يونس.. مذيع الراديو

يونس قدم برامج راديو كتير، على فترات مختلفة، وبأشكال متنوعة.. كان أشهرهم إنه بدأ مع راديو “نجوم إف إم” في بداياتها وقدم برنامج “نص ساعة مع أحمد يونس” وبعد كده برنامج “عالقهوة”.. وبعد كده اشتغل في راديو 9090 وقدم برنامج “كلام معلمين” و”صباحك ومطرحك”.

يونس.. الرعب والملفات السرية

كان من أكتر الحاجات اللي خلت يونس مذيع مختلف ومتميز إنه بدأ يقدم في برامجه فقرة خاصة بالرعب.. فقرة أسبوعية لمدة ساعة بيحكي فيها يونس قصص مرعبة ” وملفات سرية، بعضها تأليف وبعضها حقيقي، باستخدام موسيقى ومؤثرات صوتية عشان تعيش أكتر في القصة.. وكانت فقرات الرعب من أكتر الحاجات اللي شهرت يونس، لدرجة إنه بنى قاعدة جماهيرية من محبي الرعب، وفيه ناس ماكنتش بتسمع الحلقات اليومية ليونس بس بيسمعوا حلقات الرعب.

يونس.. وفن صناعة التريند

أيا كان التريند على تويتر وقت إذاعة برنامج أحمد يونس.. بيجي يونس بمنتهى البساطة والسلاسة ودايما بيتصدر تريند تويتر في أي وقت برنامجه شغال فيه.. ومن غير لجان إلكترونية أو مشاكل أو إثارة جدل.. في بدايات يونس، السوشيال ميديا كانت بالنسبه لجمهوره حاجة جديدة.. لكن دلوقتي أغلب جمهور يونس من جيل السوشيال ميديا.. العادي بالنسبة ليونس واللي بيعرف يعمله إنه يبقى تريند رقم واحد على تويتر.. مش تريند وخلاص.. والتريند مش بيفرق إذا كان برنامجه الصبح أو بالليل.. فقرة عادية أو فقرة رعب.. ولازم نركز على إن البرنامج على الراديو مش برنامج على السوشيال ميديا مثلا.. وبالتالي أغلب المتفاعلين، لو مش كلهم، هم متفاعلين حقيقيين بيسمعوا البرنامج ومتابعين يونس.. فـ يونس حرفيا نقل تأثيره من وسيلة إعلامية قديمة زي الراديو لمنصة حديثة زي تويتر أو إكس X.

يونس.. المؤلف والكاتب

أحمد يونس ماكتفاش بس بنجاحه وشهرته كمذيع راديو واتجه لكتابة روايات وكتب، أغلبها قصص رعب، والجزء الأكبر منها لشخصية “نادر فودة” اللي بيقدمها يونس في أجزاء كتير من فقرات الرعب في برنامجه، واللي انتقلت من البرنامج للكتب والروايات، وهي شخصية خيالية لصحفي بيعمل تحقيقات صحفية عن حاجات غامضة ومرعبة.. وقدر يونس بذكاء وبراعة إنه يبني الشخصية دي وتكون جزء لا يتجزأ من عالم ” يونس المرعب”.. وكتب يونس بتنجح جدا وبتتباع وبيعمل منها أجزاء مختلفة.

قصة صعود ونجاح “أحمد يونس” قصة مهمة وملهمة.. وفي عيد ميلاده بنقوله: كل سنة وأنت مبدع ومختلف يا يونس!